அனல் மீது மழைத்துளி..சுள்ளென அடிக்கும் வெயிலோடு ஜில்லென பெய்யும் மழை..வானிலையின் கூல் அறிவிப்பு

சென்னை: தமிழகத்தில் இரண்டு நாட்களுக்கு ஒருசில இடங்களில் அதிகபட்ச வெப்பநிலை இயல்பிலிருந்து 2 - 3 டிகிரி செல்சியஸ் அதிகமாக இருக்கக்கூடும் என சென்னை வானிலை ஆய்வு மையம் அறிவித்துள்ளது. தென் தமிழக மாவட்டங்களில் ஓரிரு இடங்களில் லேசானது முதல் மிதமான மழை பெய்யக்கூடும் எனவும் வானிலை ஆய்வு மையம் வெளியிட்டுள்ள அறிவிப்பில் தெரிவிக்கப்பட்டுள்ளது.

அக்னி நட்சத்திர காலம் முன்கூட்டியே ஆரம்பித்து விட்டதோ என்று அஞ்சும் வகையில் வெளியே தலைகாட்ட முடியாத அளவிற்கு வெயில் சுட்டெரித்து வருகிறது. வெப்பத்தை தாக்கு பிடிக்க முடியாமல் வீடுகளுக்குள் மக்கள் முடங்கியுள்ளனர்.

சுட்டெரிக்கும் வெயிலில் இருந்து தப்பிக்க கோடை மழை பெய்ய வேண்டும் என வருண பகவானை வேண்டிக்கொண்டிருக்கின்றனர். மக்களின் பிரார்த்தனைக்கு மனமிரங்கும் வகையில் சில நாட்களுக்கு இதமான மழை பெய்யப்போகிறது என வானிலை ஆய்வு மையம் அறிவிப்பு வெளியிட்டுள்ளது.

தென் இந்திய பகுதிகளின் மேல் வளி மண்டலத்தின் கீழடுக்குகளில் கிழக்கு திசை காற்றும், மேற்கு திசை காற்றும் சந்திக்கும் பகுதி நிலவுகிறது. இதன் காரணமாக இன்றும் நாளையும் தென் தமிழக மாவட்டங்களில் ஓரிரு இடங்களில் லேசானது முதல் மிதமான மழை பெய்யக்கூடும்.

21,22,23ஆம் தேதிகளில் தமிழ்நாடு, புதுச்சேரி மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

இன்றும் நாளையும் தமிழகத்தில் ஒருசில இடங்களில் அதிகபட்ச வெப்பநிலை இயல்பிலிருந்து 2 - 3 டிகிரி செல்சியஸ் அதிகமாக இருக்கக்கூடும். சென்னை மற்றும் புறநகர் பகுதிகளில் அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 36-37 டிகிரி செல்சியஸ் மற்றும் குறைந்தபட்ச வெப்பநிலை 26-27 டிகிரி செல்சியஸ் அளவில் இருக்கக்கூடும்.

கடந்த 24 மணி நேரத்தில் பதிவான மழை அளவு ஏதுமில்லை. மீனவர்களுக்கான எச்சரிக்கை ஏதுமில்லை என தெரிவிக்கப்பட்டுள்ளது.

English summary

The Chennai Meteorological Department has announced that the maximum temperature may be 2-3 degrees Celsius above normal at a few places in Tamil Nadu for two days. According to the announcement issued by the Meteorological Department, there may be light to moderate rain at a couple of places in South Tamil Nadu districts.