"மொத்தம் 12 மாவட்டங்கள்.." கொட்ட போகுது கனமழை.! உங்க ஊர் இருக்கா பாருங்க.! சென்னையில் என்ன கிளைமேட்

சென்னை: தமிழ்நாட்டில் கடந்த சில நாட்களாக ஓரளவுக்கு மழை பெய்ய ஆரம்பித்துள்ள நிலையில், வரும் நாட்களில் வானிலை எப்படி இருக்கும் என்பது குறித்து வானிலை மையம் முக்கிய தகவல்களைப் பகிர்ந்துள்ளது.

இந்தியாவில் பல்வேறு இடங்களிலும் கடந்த சில வாரங்களாகவே நல்ல மழை பெய்து வந்தது. இருப்பினும், தமிழ்நாட்டில் மட்டும் அதற்கு நேர்மாறான ஒரு வானிலையே நிலவி வந்தது. வெயில் அதிகமாகவே இருந்தது. குறிப்பாகத் தமிழ்நாட்டில் நிலவிய இந்த அதீத வெப்பத்தை வல்லுநர்கள் இரண்டாவது சம்மர் என்றே குறிப்பிட்டனர்.

இந்தச் சூழலில் கடந்த சில நாட்களாகத் தமிழ்நாட்டில் பல இடங்களில் மழை பெய்து வருகிறது. இது மக்களுக்கு மகிழ்ச்சியைக் கொடுத்துள்ளது. இதற்கிடையே வரும் நாட்களில் வானிலை எப்படி இருக்கும் என்பது குறித்த தகவல்களை வானிலை மையமும் பகிர்ந்துள்ளது.

12 மாவட்டங்கள்: அதன்படி தமிழகப் பகுதிகளின் மேல் நிலவும் வளி மண்டல கீழடுக்கு சுழற்சி காரணமாக, இன்று (ஆகஸ்ட் 11) தமிழ்நாடு, புதுச்சேரி மற்றும் காரைக்கால் பகுதிகளில் ஒரு சில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். நீலகிரி, தேனி, திண்டுக்கல், திருச்சிராப்பள்ளி, புதுக்கோட்டை, நாமக்கல், சேலம், கள்ளக்குறிச்சி, திருவண்ணாமலை, திருப்பத்தூர், வேலூர் மாவட்டங்கள் மற்றும் கோயம்புத்தூர் மாவட்ட மலைப்பகுதிகளில் ஓரிரு இடங்களில் கனமழை பெய்யவாய்ப்புள்ளது.

நாளை (ஆகஸ்ட் 12) தமிழ்நாடு, புதுச்சேரி மற்றும் காரைக்கால் பகுதிகளில் ஒரு சில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.. நாளை மறுநாள் (ஆகஸ்ட் 13) தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் என்றும் வரும் ஆகஸ்ட் 14 முதல் 17 வரை தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும் என்று எச்சரிக்கை விடுக்கப்பட்டுள்ளது.

சென்னையில் கிளைமேட்: அதேபோல சென்னை மற்றும் புறநகர்ப் பகுதிகளில் அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி மின்னலுடன் கூடிய லேசான / மிதமான மழை பெய்யக்கூடும். அதிகபட்ச வெப்பநிலை 36 டிகிரி செல்சியஸ் மற்றும் குறைந்தபட்ச வெப்பநிலை 26 டிகிரி செல்சியஸை ஒட்டியே இருக்கக்கூடும் என்று கூறப்பட்டுள்ளது.

கடந்த 24 மணி நேரத்தில் தமிழ்நாட்டில் பல இடங்களில் நல்ல மழை பெய்துள்ளது. சென்னை மற்றும் அதன் சுற்று வட்டார பகுதிகளிலும் கூட பல இடங்களில் மழை பெய்துள்ளது. கேசிஎஸ் மில்-1 அரியலூர் (கள்ளக்குறிச்சி), தண்டராம்பேட்டை (திருவண்ணாமலை) தலா 80 மிமீ மழை பெய்துள்ளது. அதேபோல சென்னையைப் பொறுத்தவரை அதிகபட்சமாக பூந்தமல்லி, அடையாறு ஆகிய பகுதிகளில் 50 மிமீ மழை பெய்துள்ளது. இது தவிர மாநிலத்தில் பெரும்பாலான இடங்களில் நல்ல மழை பெய்துள்ளது.

மீனவர்களுக்கான எச்சரிக்கை: இன்றும் நாளையும் (ஆகஸ்ட் 11, 12) தெற்கு ஆந்திரா கடலோரப் பகுதிகள் மற்றும் அதனை ஒட்டிய மத்திய மேற்கு வங்கக்கடல் பகுதிகளில் சூறாவளிக்காற்று மணிக்கு 40 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும்.

நாளை மறுநாள் (ஆகஸ்ட் 13) தென்கிழக்கு வங்கக்கடல் பகுதிகள் மற்றும் அதனை ஒட்டிய தென்மேற்கு வங்கக்கடல் பகுதிகளில் சூறாவளிக்காற்று மணிக்கு 40 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். வரும் ஆகஸ்ட் 14இல் தென்கிழக்கு வங்கக்கடல் பகுதிகள், இலங்கை கடலோரப் பகுதிகள் மற்றும் தெற்கு வங்கக்கடல் பகுதிகளில் சூறாவளிக்காற்று மணிக்கு 40 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும் என்பதால் மீனவர்கள் இந்த நாட்களில் இந்த இடங்களுக்குச் செல்ல வேண்டாம் என அறிவுறுத்தப்பட்டுள்ளது.

English summary

Meteorological department says Chennai will have good rain for next 48 hours: Many places of Tamilnadu will get rain for next few days.