என்ன ஆச்சு? டிடிவி தினகரன் பிறந்தநாள் கொண்டாட்டம்.. திடீரென ரத்து செய்யப்பட்ட ஸ்பெஷல் விசிட்!

Updated: Monday, December 13, 2021, 19:57 [IST]

Subscribe to Oneindia Tamil

சென்னை: அமமுக பொதுச்செயலாளர் டிடிவி தினகரன் தனது பிறந்த நாளை முன்னிட்டு இன்று எம்.ஜி.ஆர். காதுகேளாதோர் பள்ளியில் உள்ள குழந்தைகளுக்கு நலத்திட்ட உதவிகளை வழங்குவதாக இருந்தது. ஆனால் இந்த விசிட் திடீரென ரத்து செய்யப்பட்டு உள்ளதால் நிர்வாகிகள் குழப்பம் அடைந்துள்ளனர்.

அமமுக பொதுச்செயலாளர் டிடிவி தினகரன் இன்று தனது 58வது பிறந்த நாளை கொண்டாடுகிறார். இதை முன்னிட்டு தமிழ்நாடு முழுக்க அமமுகவினர் பல்வேறு கொண்டாட்டங்களுக்கு ஏற்பாடு செய்துள்ளனர்.

டெல்டா மாவட்டங்களில் பல்வேறு இடங்களில் அமமுகவினர் சார்பாக மக்களுக்கு இனிப்புகள், உணவுகள் வழங்கப்பட்டு தினகரன் பிறந்த நாள் கொண்டாடப்பட்டு வருகிறது.

பூஜை

டிடிவி தினகரன் பிறந்த நாளை முன்னிட்டு நேற்றும் இன்றும் அமமுகவினர் தமிழ்நாடு முழுக்க பல்வேறு இடங்களில் இனிப்பு வழங்கி கொண்டாடினார்கள். அதேபோல் நேற்று மாலை தஞ்சாவூர் புண்ணை நல்லூர் மாரியம்மன் கோவிலில் சிறப்பு வழிபாடு நடத்தப்பட்டது. அமமுகவினர் மூலம் சிறப்பு பூஜை ஏற்பாடு செய்யப்பட்டது.

எம்ஜிஆர் மன்றம்

அதேபோல் எம்ஜிஆர் மன்றம் சார்பாக சிறப்பு பூஜையும் அதே கோவிலில் மேற்கொள்ளப்பட்டது. அமமுகவினர் இணைந்து அந்த கோவிலில் மக்களுக்கு அன்னதானம் அளித்தனர். அதேபோல் அமமுக கட்சி அலுவலகங்களிலும் மக்களுக்கு இலவசமாக உணவு வழங்கப்பட்டு டிடிவி தினகரன் பிறந்தநாள் கொண்டாடப்பட்டது.

பிறந்த நாள்

டிடிவி தினகரன் தனது பிறந்த நாளை முன்னிட்டு இன்று எம்.ஜி.ஆர். காதுகேளாத பள்ளியில் உள்ள குழந்தைகளுக்கு நலத்திட்ட உதவிகளை வழங்குவதாக இருந்தது. வழக்கமாக பிறந்த நாளின் போது அவர் இந்த பள்ளிக்கு செல்வது வழக்கம். அதேபோல் இந்த முறையும் அந்த பள்ளிக்கு சென்று மாணவர்களுக்கு உணவுகள் மற்றும் உதவிகளை வழங்குவார் என்று கூறப்பட்டது.

சந்திப்பாரா

ஆனால் திடீரென இந்த விசிட் ரத்து செய்யப்பட்டது. எம்ஜிஆர் காதுகேளாதார் பள்ளி குழந்தைகளுடன் மதியம் 12 மணி வாக்கில் கொண்டாடவிருந்த தினகரன், அரை மணி நேரத்துக்கு முன்பு அதனை ரத்து செய்துள்ளார். காரணம் தெரியாமல் நிகழ்ச்சி ஏற்பாட்டாளர்கள் குழப்பம் அடைந்துள்ளனர்.

என்ன நடக்கும்?

இது தவிர்த்து இன்று டிடிவி தினகரனை அவருக்கு நெருக்கமான அரசியல் தலைவர்கள், டெல்டா மற்றும் தென் மாவட்ட தலைவர்கள் சந்தித்து பேசுவார்கள் என்றும் எதிர்பார்க்கப்படுகிறது. சசிகலா இன்று டிடிவி தினகரனை சந்திக்க வாய்ப்பு உள்ளதா என்ற எதிர்பார்ப்பு எழுந்துள்ளது. சசிகலா சமீபத்தில் டிடிவி தினகரனை சந்தித்த நிலையில் பிறந்த நாளை முன்னிட்டு இவர்கள் சந்திப்பு நடக்குமா என்ற எதிர்பார்ப்பு எழுந்துள்ளது.