விஜய்யின் அடுத்த மாஸ்டர் பிளான்.. மாநிலம் முழுவதும் சுற்றுப்பயணம் செய்ய திட்டம்? தவெகவினர் உற்சாகம்
சென்னை: விக்கிரவாண்டியில் கட்சியின் முதல் மாநில மாநாட்டை வெற்றிகரமாக நடத்தி முடித்துள்ள விஜய், அடுத்த கட்டமாக மாநிலம் முழுவதும் சுற்றுப்பயணம் செய்யவும் மாவட்டம் முதல் கிளை வரை நிர்வாகிகளை நியமனம் செய்யவும் திட்டமிட்டுள்ளதாக கட்சி வட்டாரங்கள் கூறுகின்றன. இந்த ஆண்டு இறுதியில் விஜய்யின் சுற்றுப்பயணம் தொடங்கும் என சொல்லப்படுகிறது. இதனால் தவெகவினர் உற்சாகம் அடைந்துள்ளனர்.
நடிகர் விஜய் கடந்த பிப்ரவரி மாதம் தமிழக வெற்றிக் கழகம் என்ற தனது கட்சியை தொடங்கினார். கட்சியின் முதல் மாநில மாநாட்டை கடந்த மாதம் 27 ஆம் தேதி விக்கிரவாண்டியில் நடத்தி முடித்தார். தனது கட்சியின் கொள்கைகள், தான் பயணிக்க போகும் அரசியல் பாதை உள்ளிட்டவற்றை விஜய் மாநாட்டில் பேசினார்.
தன்னுடன் கூட்டணி அமைக்கும் கட்சிகளுக்கு ஆட்சி அதிகாரத்தில் பங்கு என விஜய் பேசியது, தமிழக அரசியல் வட்டாரத்தில் கடும் விவாதப்பொருளாகியுள்ளது. மத்திய மாநில அரசுகளையும் விஜய் விமர்சித்து பேசினார். விஜய் மாநாடு நடத்தி முடித்து கிட்டத்தட்ட ஒரு வாரம் ஆகிவிட்ட நிலையில், மாநாட்டில் விஜய் பேசியது தொடர்பாக அரசியல் கட்சிகள் பதிலடி கொடுத்து வருகின்றன.
வரும் 2026 சட்டமன்ற தேர்தலை எதிர்கொள்ள தயாராகும் வகையில், விஜய் வியூகங்களை அமைத்து வருகிறாராம். கட்சியின் கட்டமைப்பை அனைத்து நிலைகளிலும் வலுப்படுத்த திட்டமிட்டு இருக்கும் விஜய், தமிழகம் முழுவதும் புதிய நிர்வாகிகளை நியமிக்க திட்டமிட்டுள்ளதாக சொல்லப்படுகிறது. மாநாட்டு பணிக்காக பல்வேறு அணிகள் அமைக்கப்பட்டு இருந்தன. அந்த பணிகளை சிறப்பாக நடத்தி முடித்தவர்களுக்கு கட்சியில் புதிய பொறுப்புகள் வழங்கவும் விஜய் திட்டமிட்டு இருக்கிறாராம்.
மாவட்ட நிர்வாகிகள் முதல் கிளை செயலாளர்கள் வரை நியமிக்க விஜய் பிளான் செய்து வருகிறாராம். நிர்வாகிகள் நியமனம் செய்த பிறகு வரும் டிசம்பர் மாதம் இறுதியில் இருந்து மாநிலம் முழுக்க சுற்றுப்பயணம் செய்ய விஜய் திட்டமிட்டுள்ளதாக அவரது கட்சி வட்டாரங்கள் கூறுகின்றன. ஒவ்வொரு மாவட்டத்திலும் இரண்டு நாட்கள் சுற்றுப்பயணம் செய்து கட்சியினருடன் ஆலோசனை நடத்த உள்ளதாகவும் சொல்லப்படுகிறது.
இந்த இரண்டு நாளில் பொதுக்கூட்டம், நல உதவிகள் நிகழ்ச்சி உள்ளிட்டவையும், மற்ற கட்சிகளில் இருந்து வந்தவர்கள் தமிழக வெற்றிக் கழகத்தில் இணையும் நிகழ்ச்சியும் நடத்தப்படலாம் என்று சொல்கிறார்கள். விஜய் சுற்றுப்பயணம் செய்ய ஏதுவாக சிறப்பு வசதிகளுடன் வாகனம் ஒன்றும் ரெடியாகி வருகிறதாம். விக்கிரவாண்டியை போல நெல்லையில் மாநாடு நடத்தவும் திட்டமிட்டுள்ளதாக சொல்லப்படுகிறது.
கட்சியின் கட்டமப்பை வலுப்படுத்த விஜய் தீவிர நடவடிக்கைகள் எடுத்து வருவதால் தவெகவினர் உற்சாகம் அடைந்துள்ளனர். தற்போது நடித்து வரும் தளபதி 69 திரைப்படம் முடிந்ததும் இந்த சுற்றுப்பயணத்தை மெற்கொள்ள விஜய் திட்டமிட்டுள்ளதாக சொல்லப்படுகிறது. கோவை, மதுரை, திருச்சி, நெல்லை என மண்டல வாரியாக பல்வேறு கட்டங்களாக இந்த சுற்றுப்பயணம் அமையும் என்றும் அப்போது பொதுக் கூட்டங்களில் உரையாற்றவும் விஜய் திட்டமிட்டுள்ளாராம்.
Click it and Unblock the Notifications
Sign in with Google