35% வாக்குகளுடன் தவெக முதலிடம்! திணறும் திராவிடக் கட்சிகள்! பனையூரில் கொண்டாடும் விஜய் கட்சியினர்!

சென்னை: தமிழக சட்டசபை தேர்தலில் 234 தொகுதிகளிலும் முதல் சுற்று முடிவடைந்த நிலையில் தவெக 35 சதவீத வாக்குகளை பெற்று முன்னிலை வகித்து வருகிறது. அது போல் திமுக 24 சதவீதம், அதிமுக 23 சதவீதம், நாதக 3 சதவீத வாக்குகளையும் பெற்றுள்ளது. இதை தேர்தல் ஆணையம் வெளியிட்டுள்ளது.

தமிழக சட்டசபை தேர்தல் வரலாற்றில் புதிதாக தொடங்கப்பட்ட ஒரு கட்சிக்கு மக்கள் இத்தனை வரவேற்பை கொடுத்திருப்பது பெரும் ஆச்சரியத்தை ஏற்படுத்தியுள்ளது. காலை தபால் வாக்குகள் எண்ணப்பட்டு வந்த நிலையிலேயே திமுகவுக்கு அடுத்த தவெக தொடர்ந்து முன்னிலை வகித்து வந்தது. நடுவில் தவெகவை அதிமுக முந்தியது. ஆனால் அதிமுக, திமுகவை முந்தி தவெக தொடர்ந்து முன்னிலை வகித்து வருகிறது.

தமிழகத்தின் 17-ஆவது சட்டமன்றத் தேர்தலுக்கான வாக்கு எண்ணிக்கை இன்று (மே 4, 2026) காலை 8 மணிக்குத் தொடங்கி விறுவிறுப்பாக நடைபெற்று வருகிறது. தேர்தல் ஆணையம் வெளியிட்டுள்ள அதிகாரப்பூர்வ அறிவிப்பின்படி, தமிழக அரசியலில் இதுவரை கண்டிராத ஒரு மிகப்பெரிய திருப்பம் ஏற்பட்டுள்ளது.

வாக்கு சதவீத நிலவரம்: தவெக-வின் விஸ்வரூபம்

தேர்தல் ஆணையத்தின் தற்போதைய தரவுகளின்படி, கட்சிகள் பெற்றுள்ள வாக்கு சதவீதங்கள் பின்வருமாறு:தமிழக வெற்றி கழகம் (TVK): 35%, திராவிட முன்னேற்றக் கழகம் (DMK): 24%, அனைத்திந்திய அண்ணா திராவிட முன்னேற்றக் கழகம் (AIADMK): 23%, நாம் தமிழர் கட்சி (NTK): 3%

முதன்முறையாகக் களம் கண்டுள்ள நடிகர் விஜய்யின் தவெக, பாரம்பரியமாகத் தமிழகத்தை ஆண்டு வந்த திராவிடக் கட்சிகளை விட 10 சதவீதத்திற்கும் அதிகமான வாக்குகளைப் பெற்று முன்னிலையில் இருப்பது அரசியல் வட்டாரங்களை அதிர வைத்துள்ளது.

முன்னிலை நிலவரம்: தொகுதிகளின் கணக்கு

மொத்தமுள்ள 234 தொகுதிகளில், தற்போது வரை முன்னிலை நிலவரம் பின்வருமாறு பகிரப்பட்டுள்ளது. தமிழக வெற்றி கழகம் 98, அதிமுக 61, திமுக 35, பாமக 6, காங்கிரஸ் 3, கம்யூனிஸ்ட் 2, விசிக 2, பாஜக 1, மார்க்சிஸ்ட் கம்யூனிஸ்ட் 1 என்பது முன்னணி நிலவரம் ஆகும்.

சென்னையில் உள்ள 16 தொகுதிகளிலும் தவெக முன்னிலை பெற்று வரும் நிலையில், தற்போது மாநிலம் தழுவிய அளவிலும் அக்கட்சி வலுவான நிலையில் உள்ளது. தனித்து ஆட்சி அமைக்க 118 இடங்கள் தேவைப்படும் நிலையில், தவெக 98 இடங்களில் முன்னிலை பெற்றுள்ளது.

அதிமுக மற்றும் திமுக ஆகிய கட்சிகள் தங்களது கோட்டைகளாகக் கருதப்பட்ட இடங்களில் கூட கடும் பின்னடைவைச் சந்தித்துள்ளன.

9.15 மணிக்கெல்லாம் ஆட்சி மாற்றம் ஏற்படும் என்று தவெக-வின் செய்தி தொடர்பாளர் ராதன் பண்டிட் தெரிவித்த கணிப்புகள், தற்போதைய முன்னிலை நிலவரத்தோடு ஒத்துப்போவதால் அக்கட்சியின் தொண்டர்கள் உற்சாகத்தில் உள்ளனர்.

வாக்கு எண்ணிக்கை தொடர்ந்து நடைபெற்று வருவதால், மாலைக்குள் தமிழகத்தின் புதிய முதல்வர் யார் என்பது குறித்த முழுமையான படம் கிடைத்துவிடும்.

English summary

After the first round of counting in all 234 constituencies of the Tamil Nadu Assembly elections, Tamilaga Vettri Kazhagam (TVK) is leading with 35% vote share, according to Election Commission data. DMK follows with 24%, AIADMK with 23%, and NTK has secured 3%, reflecting early trends in the ongoing count.