38 நாட்களுக்கு பின்.. கரூரில் உயிரிழந்த 41 பேருக்கு அஞ்சலி செலுத்திய விஜய்!

Updated: Wednesday, November 5, 2025, 12:37 [IST]

Subscribe to Oneindia Tamil

சென்னை: தவெகவின் சிறப்புப் பொதுக்குழு கூட்டத்தில் கரூர் கூட்ட நெரிசலில் உயிரிழந்த 41 பேருக்கும் 2 நிமிடங்கள் மவுன அஞ்சலி செலுத்தப்பட்டுள்ளது. இதன் மூலமாக கரூர் சம்பவம் அரங்கேறி 38 நாட்களுக்கு பின், முதல்முறையாக உயிரிழந்த 41 பேருக்கு அஞ்சலி செலுத்தப்பட்டுள்ளதாக பார்க்கப்படுகிறது.

செப்டம்பர் 27ஆம் தேதி தவெக தலைவர் விஜய் கரூரில் பிரச்சாரம் மேற்கொண்ட போது, கூட்ட நெரிசலில் சிக்கி 41 பேர் உயிரிழந்தனர். இதன்பின் அங்கிருந்து உடனடியாக புறப்பட்டு சென்னை வந்த விஜய், 3 நாட்களுக்கு பின் வீடியோ ஒன்றை வெளியிட்டு, முதல்வர் ஸ்டாலினுக்கு சவால் விடுத்தார். அதேபோல் கரூர் சம்பவத்திற்கு பின் தவெக நிர்வாகிகள் அத்தனை பேரும் தலைமறைவாகினர்.

கரூரில் கூட்ட நெரிசலில் சிக்கி பலியான 41 பேருக்கும், உங்களது இதயப்பூர்வ இரங்கலை பகிர்ந்து கொள்ளுங்கள்

கரூர் வழக்கை சிபிஐ விசாரணைக்கு மாற்றிய போதும் கூட, தவெகவில் பெரிய நடவடிக்கைகள் இல்லை. கரூரில் பாதிக்கப்பட்ட குடும்பங்களை விஜய் சந்திக்க கூட வரவில்லை. அவர்களுக்காக ஒரு மெழுகுவர்த்தியை ஏந்தி கூட அஞ்சலி கூட்டம் நடத்தப்படவில்லை. இறுதியாக 30 நாட்களுக்கு பின் பாதிக்கப்பட்ட குடும்பங்களைச் சேர்ந்தவர்களை மாமல்லபுரத்திற்கு விஜய் அழைத்தார்.

மாமல்லபுரத்தில் உள்ள தனியார் விடுதியில் பாதிக்கப்பட்டவர்களை சந்தித்த விஜய், அவர்களுக்கு ஆறுதல் கூறி பல்வேறு வாக்குறுதிகளை கொடுத்தார். இதன்பின் அரசியல் பணிகளில் தீவிரம் காட்டிய விஜய், தவெகவின் சிறப்பு பொதுக்குழுவை கூட்டி இருக்கிறார். மாமல்லபுரத்தில் உள்ள தனியார் விடுதியில் இந்த பொதுக்குழு கூட்டம் தொடங்கி இருக்கிறது.

இந்த சிறப்புப் பொதுக்குழுக் கூட்டத்தில் பங்கேற்க தமிழ்நாடு முழுவதும் இருந்து 2 ஆயிரம் பேர் வந்துள்ளனர். பொதுக்குழு கூட்டத்திற்காக கடிதம், அடையாள அட்டை இல்லாமல் யாரும் அனுமதிக்கப்படவில்லை. இதன்பின் தவெக தலைவர் விஜய் பொதுக்குழு கூட்டத்திற்கு வந்தார். அதன்பின் அனைவரும் எழுந்து நின்று கரூர் கூட்டத்தில் உயிரிழந்த 41 பேருக்கும் 2 நிமிடங்கள் மவுன அஞ்சலி செலுத்தி இருக்கின்றனர்.

கரூர் சம்பவத்திற்கு பின் தவெக சார்பாக நடத்தப்பட்ட முதல் அஞ்சலி கூட்டமாகவும் இந்த பொதுக்குழு கூட்டம் அமைந்துள்ளது. 38 நாட்களுக்கு பின் விஜய் கரூரில் உயிரிழந்த 41 பேருக்கும் அஞ்சலி செலுத்தி இருக்கிறார். அதேபோல் 38 நாட்களுக்கு பின் விஜய் முதல்முறையாக பொதுவெளிக்கு வந்துள்ளதாகவும் பார்க்கப்படுகிறது.