தவெக ஆர்ப்பாட்டத்திற்கு அனுமதி கோரிய வழக்கு! அவசர வழக்காக விசாரிக்க உயர்நீதிமன்றம் மறுப்பு

Updated: Friday, July 4, 2025, 14:02 [IST]

Subscribe to Oneindia Tamil

சென்னை: மடப்புரம் கோயில் செக்யூரிட்டி அஜித்குமார் மரணம் தொடர்பாக, சென்னையில் தமிழக வெற்றிக் கழகம் ஆர்ப்பாட்டம் நடத்த திட்டமிட்டிருந்தது. இதற்காக காவல்துறையில் அனுமதி கேட்கப்பட்ட நிலையில், அனுமதி மறுக்கப்பட்டிருந்தது. இதனையடுத்து உயர்நீதிமன்றத்தில் வழக்கு தொடரப்பட்டது. இதனை அவசர வழக்காக விசாரிக்க தற்போது உயர்நீதிமன்றம் மறுப்பு தெரிவித்திருக்கிறது.

சென்னை சிவானந்தா சாலையில் நாளை மறுநாள்(ஜூலை 06) ஆர்ப்பாட்டத்திற்கு அனுமதி கேட்டு தவெக வழக்கு தொடர்ந்திருந்தது. மூன்று கோரிக்கைகளை முன்வைத்து இந்த ஆர்ப்பாட்டம் நடைபெறுவதாக தவெக அறிவித்திருந்தது.

1. கடந்த 4 ஆண்டுகளில் 24 பேர் காவல் நிலையத்தில் மரணம் அடைந்தது குறித்து உயர் நீதிமன்றமே அதிருப்தி தெரிவித்துள்ள நிலையில், இதுகுறித்து தமிழக அரசு வெள்ளை அறிக்கை வெளியிட வேண்டும்.
2. அஜித் குமார் மரணம் தொடர்பாக உயர் நீதிமன்றத்தின் நேரடி கண்காணிப்பின் கீழ் சிறப்புப் புலனாய்வுக் குழு அமைத்து நீதி விசாரணை நடத்த வேண்டும்.
3. புவனம் காவல் நிலைய எல்லைக்கு உட்பட்ட மடப்புரம் கோயில் காவலர் அஜித்குமார் மரணத்திற்கு நீதி வேண்டும்.

இந்த கோரிக்கைகளை வலியுறுத்தி தமிழக வெற்றிக் கழகம் ஆர்ப்பாட்டத்திற்கு திட்டமிட்டிருந்தது என்றும், ஆனால் காவல்துறையினர் அனுமதி வழங்கவில்லை என்றும், எனுவே நீதிமன்றம் இந்த விவகாரங்களில் உடனடியாக தலையிட்டு அனுமதி வழங்க வேண்டும் என்று தவெக தாக்கல் செய்திருந்த மனுவில் கறிப்பிடத்ப்பட்டிருந்தது.

சென்னை உயர்நீதிமன்ற நீதிபதி வேல்முருகன் மூன்பு இன்று மதியம் வழக்கை விசாரணைக்கு எடுத்துக்கொள்ள வேண்டும் என்றும் தவெக முறையிட்டிருந்தது. இதனை ஏற்க மறுத்த நீதிபதி, "இந்த வழக்கை அவசர வழக்காக விசாரிக்க என்ன அவசரம்? குற்றங்கள் செய்யாதீர்கள், போக்சோ குற்றங்களில் ஈடுபடாதீர்கள், மனைவியை கொடுமைப்படுத்தாதீர்கள் என்று பொதுமக்களுக்கு விழிப்புணர்வை ஏற்படுத்துங்கள். ஆங்கிலேயர் காலத்து சட்டங்களை திருத்தச் சொல்லுங்கள்." என்று தவெக தரப்புக்கு அறிவுறுத்தினார்.

இந்த மனு எண்ணிடப்பட்டு வந்தால், திங்கட்கிழமை விசாரணைக்கு எடுக்கப்படும், என்று நீதிபதி கூறியுள்ளார். திங்கட்கிழமை தான் தவெக போராட்டத்தை அறிவித்திருந்தது. ஆனால் அன்றைய தினம்தான் மனு விசாரணைக்கு வருகிறது என்பது குறிப்பிடத்தக்கது.