திராவிட கட்சிகளுடன் கூட்டணி.. 28 ஆம் தேதி முடிவு.. யூடர்ன் போடும் ராமதாஸ்.. அப்போ தவெக?

சென்னை: திராவிடக் கட்சிகளோடு தான் கூட்டணி இருக்கும் என்று பாமக நிறுவனர் ராமதாஸ் கூறியுள்ளார். ராமதாஸ் தவெக உடன் கூட்டணியில் இணையக்கூடும் எனப் பேசப்பட்டு வரும் நிலையில், திராவிடக் கட்சிகளுடன் கூட்டணி என அவர் தெரிவித்துள்ளது பரபரப்பை ஏற்படுத்தி உள்ளது.

தமிழகத்தில் சட்டசபை தேர்தல் தேதி விரைவில் அறிவிக்கப்பட உள்ளதையொட்டி கூட்டணி பேச்சுவார்த்தை, தொகுதிப் பங்கீடு பேச்சுகள் இறுதிக்கட்டத்தை எட்டியுள்ளன. எனினும், பாமகவின் ராமதாஸ் தரப்பு இதுவரை கூட்டணி குறித்த அறிவிப்பை வெளியிடவில்லை.

தமிழக சட்டசபைத் தேர்தல் நெருங்கி வரும் நிலையில், தமிழக அரசியல் கட்சிகள் மும்முரமாக தேர்தல் பணிகளில் ஈடுபட்டு வருகின்றன. இந்நிலையில், வட மாவட்டங்களில் வலுவாக உள்ள பாட்டாளி மக்கள் கட்சி உட்கட்சிப் பூசலால், ராமதாஸ் தரப்பு மற்றும் அன்புமணி தரப்பு என இரு அணிகளாக பிரிந்து செயல்பட்டு வருகிறது. அன்புமணி தரப்பு பாமக ஏற்கனவே, என்.டி.ஏ கூட்டணியில் இணைந்துவிட்ட நிலையில், ராமதாஸ் தரப்பு இன்னும் எந்தக் கூட்டணியிலும் இணையாமல் இருந்து வருகிறது.

ராமதாஸ் தரப்பு திமுக கூட்டணியில் இணைய பேச்சு வார்த்தை நடத்தி வருவதாக கூறப்பட்டது. ஆனால், விசிக நிலைப்பாடு காரணமாக திமுக கூட்டணியில் ராமதாஸ் தரப்பு இணைய முடியாமல் போனதாக கூறப்படுகிறது. இதையடுத்து, தவெகவுடன் கூட்டணி பேச்சுவார்த்தை நடந்து வருவதாகவும் தகவல்கள் வெளியாகின.

இந்நிலையில் தைலாபுரத்தில் இன்று தமது ஆதரவாளர்களுடன் ஆலோசனை நடத்திய பிறகு செய்தியாளர்களைச் சந்தித்துப் பேசினார் பாமக நிறுவனர் ராமதாஸ். அப்போது, திராவிடக் கட்சிகளுடன் கூட்டணி இருக்குமா? என்ற செய்தியாளர்களின் கேள்விக்குப் பதிலளித்த ராமதாஸ், "இருக்கும்" என்று தெரிவித்தார்.

மேலும் பேசிய ராமதாஸ், "கூட்டணி குறித்து இன்றே முடிவு செ முடியாது. ஏனென்றால் அதற்கான களம் சரியாக அமையவில்லை. அதனால் நேரம் வரும்போது கூட்டணி குறித்து அறிவிப்பேன். நமக்கான தேர்தல் வாகனம் தயாராகிவிட்டது. வருகிற பிப்ரவரி 28 ஆம் தேதி கூட்டணி குறித்த அறிவிப்பை வெளியிடுவேன்" எனறு தெரிவித்துள்ளார்.

திராவிடக் கட்சிகளுடன் கூட்டணி என ராமதாஸ் தெரிவித்துள்ளதன் மூலம், அவர் திமுக அல்லது அதிமுக கூட்டணி முடிவையே வெளிப்படுத்தி உள்ளதாக கருதப்படுகிறது. அன்புமணி அதிமுக கூட்டணியில் ஏற்கனவே இருப்பதால் ராமதாஸ் அந்தக் கூட்டணியில் இணைய வாய்ப்பு உள்ளதா என்ற விவாதங்களும் தீவிரமாக எழுந்துள்ளன.

English summary

PMK founder Ramadoss has said that there will be an alliance with Dravidian parties. While there has been talk that Ramadoss may join an alliance with TVK, his statement about an alliance with Dravidian parties has caused a stir.