பெரம்பூரில் தனி வீடு வாங்கும் விஜய்.. 'அந்நியன்' இமேஜை உடைக்க மாஸ்டர் பிளான்.. களமிறங்கிய ப்ரோக்கர்

சென்னை: முதல் சட்டசபை தேர்தலை சந்திக்க தயாராகி வரும் த.வெ.க தலைவர் விஜய், இப்போது அடுத்த கியருக்கு வண்டியை மாற்றியிருக்கிறார். கட்சி மாநாடு, உறுப்பினர் சேர்க்கை என அதிரடி காட்டியவர், இப்போது 'வேட்பாளர்' அவதாரத்திற்கான அஸ்திவாரத்தைப் பலமாகப் போடத் தொடங்கிவிட்டார்.

விஜய் வரும் சட்டமன்றத் தேர்தலில் எந்தத் தொகுதியில் களம் காண்பார் என்பதுதான் தற்போதைய அரசியல் வட்டாரத்தின் ஹாட் டாபிக். தென் மாவட்டமா அல்லது கொங்கு மண்டலமா எனப் பல யூகங்கள் இறக்கை கட்டிய நிலையில், இப்போது விஜய்யின் பார்வை 'சென்னை' பக்கம் திரும்பியிருக்கிறது. குறிப்பாக, வடசென்னை பகுதியான பெரம்பூர் தொகுதிதான் விஜய்யின் 'சாய்ஸ்' என்கிறார்கள் அவருக்கு நெருக்கமான ரத்தத்தின் ரத்தங்கள்.

தமிழக வெற்றிக் கழகத்தின் தலைவர் விஜய், வரும் சட்டமன்றத் தேர்தலில் பெரம்பூர் தொகுதியில் போட்டியிட வாய்ப்புள்ளதாகக் கட்சி வட்டாரங்களில் பேச்சு பலமாக எழுந்துள்ளது. இதனை உறுதிப்படுத்தும் வகையில், இன்று பெரம்பூர் தொகுதியில் அக்கட்சியின் சார்பில் உற்சாகமான நிர்வாகிகள் ஆலோசனைக் கூட்டம் நடைபெற்றது.

ஏன் பெரம்பூர்?

பெரம்பூர் தொகுதி என்பது உழைக்கும் மக்கள் அதிகம் வாழும் பகுதி மட்டுமல்ல, விஜய்யின் ஆரம்பகால ரசிகர் மன்றங்கள் வலுவாக வேரூன்றிய இடமும் கூட. ஆனால், இங்கே ஒரு சிக்கல் இருப்பதை அரசியல் ஆலோசகர்கள் சுட்டிக்காட்டியிருக்கிறார்கள். "விஜய் பனையூரில் வசிக்கிறார், அவர் ஒரு 'அவுட்சைடர்' (வெளியூர் ஆள்) என்கிற முத்திரை குத்தப்பட வாய்ப்பிருக்கிறது" என்பதே அந்தச் சிக்கல்.

1. சிறுபான்மையினரின் வாக்கு வங்கி

பெரம்பூர் தொகுதியில் கிறிஸ்தவர்கள் மற்றும் இஸ்லாமியர்கள் உள்ளிட்ட சிறுபான்மையின மக்கள் கணிசமான எண்ணிக்கையில் உள்ளனர். பொதுவாக, தமிழக அரசியலில் சிறுபான்மையினரின் வாக்குகள் ஒரு கட்சியின் வெற்றி-தோல்வியைத் தீர்மானிப்பதில் முக்கியப் பங்கு வகிக்கின்றன. விஜய் தனது அரசியல் நிலைப்பாட்டில் "மதச்சார்பின்மை" மற்றும் "சமூக நீதி" ஆகியவற்றை வலியுறுத்துவதால், இந்த வாக்கு வங்கி அவருக்குச் சாதகமாக இருக்கும் என அக்கட்சியினர் கணக்கு போடுகின்றனர்.

2. திராவிடக் கட்சிகளின் பிடிமானம்

பாரம்பரியமாக பெரம்பூர் மற்றும் அதனைச் சுற்றியுள்ள வட சென்னை பகுதிகள் திமுகவின் கோட்டையாகக் கருதப்படுகின்றன. எனினும், அங்குள்ள உழைக்கும் வர்க்க மக்கள் மற்றும் சிறுபான்மையினரிடையே விஜய்க்கு இருக்கும் தனிப்பட்ட செல்வாக்கு, அந்தப் பிடிமானத்தை உடைக்க உதவும் என்று தவெக நினைக்கிறது.

3. நகர்ப்புற மற்றும் நடுத்தர வர்க்கம்

பெரம்பூர் ஒரு வளர்ந்த நகர்ப்புற தொகுதி. இங்கு பல்வேறு சமூகங்களைச் சேர்ந்த மக்கள் கலந்து வாழ்ந்தாலும், குறிப்பாக தலித் மற்றும் சிறுபான்மையின மக்களின் ஒருங்கிணைந்த வாக்குகள் இங்கு அதிகம். முன்னாள் அதிமுக எம்.எல்.ஏ வி.எஸ். பாபு போன்றவர்கள் தவெக-வில் இணைந்திருப்பது, இந்த வாக்கு வங்கிகளை ஒருங்கிணைக்க உதவும் என எதிர்பார்க்கப்படுகிறது.

4. 'மாற்று அரசியல்' எதிர்பார்ப்பு

திமுக மற்றும் அதிமுக ஆகிய இரு கட்சிகளுக்கும் மாற்றாக ஒரு புதிய தலைவரைத் தேடும் வாக்காளர்களுக்கு, குறிப்பாக இளைஞர்களுக்கு விஜய் ஒரு நம்பிக்கையாகத் தெரிகிறார். பெரம்பூர் போன்ற தொகுதிகளில் உள்ள கிறிஸ்தவ மற்றும் இதர சமூகத்தைச் சேர்ந்த இளைஞர்கள் விஜய்யின் வருகையை ஒரு பெரிய மாற்றமாகப் பார்க்கக்கூடும்.

வீடு தேடும் படலம்!

இந்த 'அந்நியன்' டேக்-ஐ உடைக்க விஜய் ஒரு பலமான முடிவை எடுத்திருப்பதாகத் தெரிகிறது. பெரம்பூர் தொகுதியிலேயே நிரந்தரமாக ஒரு வீட்டையோ அல்லது ஒரு பங்களாவையோ விலைக்கு வாங்கத் திட்டமிட்டுள்ளார் விஜய். ப்ரோக்கர் மூலம் வீடு பார்க்கும் படலம் இதற்காக நடக்கிறது.

வெறும் தேர்தல் அலுவலகமாக இல்லாமல், அது தங்குவதற்கும் மக்கள் சந்திப்பிற்கும் ஏற்ற இடமாக இருக்க வேண்டும் என்பதில் தளபதி கறாராக இருக்கிறாராம்.

"மக்களோடு மக்களாக இங்கேதான் இருப்பேன்" என்கிற செய்தியைத் தொகுதி மக்களுக்குச் சொல்லவே இந்த வீடு வாங்கும் படலம் என்கிறார்கள் உடன்பிறப்புகள்.

எதிர்க்கட்சிகளின் ரியாக்ஷன்!

விஜய் பெரம்பூரில் கால் பதிக்கத் திட்டமிடுவதை அறிந்த ஆளுங்கட்சி தரப்பு, இப்போதே அங்கு தங்கள் 'கணக்குகளை' சரிபார்க்கத் தொடங்கிவிட்டது.

சினிமாவில் எல்லா ஏரியாவுக்கு என் ஏரியா என வசனம் பேசும் விஜய், நிஜ அரசியலில் பெரம்பூர் ஏரியாவில் வீடு எடுத்து 'அட்ரஸ்' மாற்றப் போவது உறுதியாகிவிட்டது.

English summary

TVK Vijay is searching for a portential house in the Perambur ahead of assembly elections