சினிமாவுக்கு டாட்டா.. ஃபுல் டைம் அரசியல்வாதி ஆகிறார் உதயநிதி

சென்னை: மின்னல் வேகத்தில் அரசியலில் உயர்வைக் கண்ட முதல் நடிகர் என்ற பெயரை உதயநிதி ஸ்டாலின் பெற்று விடுவார் போல. அந்த அளவுக்கு அவரை படு வேகமாக தூக்கிக் கொண்டு உயரத்தில் உட்கார வைக்க திமுகவினர் தடபுடலாக ஓடிக் கொண்டுள்ளனர்.

திமுக தலைவர் மு.க.ஸ்டாலின் மகனும், நடிகருமான உதயநிதி, நடைபெற்று முடிந்த மக்களவைத் தேர்தல் மற்றும் இடைத்தேர்தலுக்காக அனைத்து தொகுதிகளிலும் பிரச்சாரம் மேற்கொண்டார்.

சென்ற இடங்களில் எல்லாம் அவரின் பேச்சுக்கு மக்களிடம் நல்ல வரவேற்பு கிடைத்ததாக திமுக சீனியர் நிர்வாகிகளே ஸ்டாலினிடம் கூறினார்கள்.

மேலும், உதயநிதிக்கு இளைஞர் அணிச் செயலாளர் பதவி தரக்கோரி அனைத்து மாவட்டங்களிலும் அணி வாரியாக தீர்மானம் நிறைவேற்றி அதை அறிவாலயத்துக்கு அனுப்பி வைத்து வருகிறார்கள்.

இந்நிலையில் இது தொடர்பாக மூத்த நிர்வாகிகள் மற்றும் தனக்கு நம்பகமான நெருக்கமான ஊடகவியலாளர்களிடம் ஸ்டாலின் சீரியஸாக விவாதித்தாராம்.

அப்போது தற்போதய சூழலில் அரசியல் களத்தில் கடும் போட்டி நிலவுவதால், உதயநிதி நடிப்பதை நிறுத்திவிட்டு முழுநேர அரசியல் செய்ய வேண்டும் என அறிவுஜீவிகள் ஸ்டாலினுக்கு ஆலோசனை தந்துள்ளார்களாம்.

இதனை மனதில் வைத்துக் கொண்ட ஸ்டாலினும், அவரது மகன் உதயநிதியிடம் இது பற்றி விரிவாக பேசினார் எனக் கூறப்படுகிறது. இதனால் நடிப்புக்கு முழுக்கு போட்டு தந்தைக்கு உதவியாக முழு நேர மக்கள் சந்திப்பு பயணங்களை நடத்த திட்டமிட்டுள்ளாராம்.

ஆந்திராவில் ஜெகன் வெற்றிக்கு காரணமே அவரது மக்கள் சந்திப்பு நடை பயணம் தான். அதையே தாமும் பின்பற்றினால் என்ன என யோசிக்கிறாராம் உதயநிதி.

English summary

Udayanidhi Stalin is all set to don the mantle of DMK's youth wing soon.