ஸ்டாலின், கருணாநிதி கொடுக்காத.. மிகப்பெரிய பரிசை உதயநிதிக்கு தேடிப்போய் கொடுத்த விஜய்!
சென்னை: தமிழக அரசியலில் நேற்று அரங்கேறிய சம்பவங்கள், திமுகவின் இளைஞரணி தலைவர் உதயநிதி ஸ்டாலினின் அரசியல் பயணத்தில் ஒரு மிகமுக்கியமான திருப்புமுனையாக அமைந்துள்ளன. திமுகவின் முன்னோடிகள்.. ஸ்டாலின், கருணாநிதி ஆகியோர் தர முடியாத பெருவாய்ப்பை விஜய் உதயநிதிக்கு கொடுத்துள்ளார்!
காவிரி நீர் உரிமை தொடர்பாகத் தஞ்சாவூரில் நடைபெற்ற கண்டன ஆர்ப்பாட்டத்தில், முதல்வர் சி. ஜோசப் விஜய் மற்றும் பிரபல நடிகை தொடர்பான சர்ச்சைக்குரிய பேச்சுக்காக உதயநிதி ஸ்டாலின் மீது வழக்குப் பதிவு செய்யப்பட்டது. இதனைத் தொடர்ந்து, சென்னை நீலாங்கரையில் உள்ள அவரது இல்லத்தில் வைத்து காவல் துறையினரால் அவர் கைது செய்யப்பட்டு தஞ்சாவூருக்கு அழைத்துச் செல்லப்பட்டார்.
அங்குள்ள செங்கிப்பட்டி காவல் நிலையத்தில் சுமார் 90 நிமிடங்கள் நடைபெற்ற தீவிர விசாரணைக்குப் பிறகு, அன்றைய தினமே மாலையில் காவல் நிலைய ஜாமீனில்உதயநிதி விடுதலை செய்யப்பட்டார்.
நீலாங்கரை இல்லத்தில் அரங்கேறிய பரபரப்பு
நேற்று காலை நீலாங்கரையில் உள்ள உதயநிதியின் இல்லத்தைச் சுற்றிலும் காவல்துறையினர் குவிக்கப்பட்டனர். முதல்வர் விஜய்யின் இல்லத்திற்கு மிக அருகிலேயே அமைந்துள்ள இந்த வீட்டின் முன் தொண்டர்கள் திரளத் தொடங்கினர். திமுக வழக்கறிஞர்களும், மூத்த நிர்வாகிகளும் காவல் துறையினருடன் சட்டப் போராட்டத்தில் ஈடுபட்டனர். 80 வயதைக் கடந்த திமுக பொதுச்செயலாளர் துரைமுருகன் நேரில் வருகை தந்தது கட்சியினருக்குப் பெரும் உற்சாகத்தை அளித்தது. அதேபோல உதயநிதியின் மைத்துனர் வி. சபரீசன் வழக்கறிஞர்களுடனும் காவல் துறையினருடனும் ஆலோசனையில் ஈடுபட்டார்.
திமுகவின் இளைஞரணி சின்னம் பொறித்த வழக்கமான வெள்ளை டி-சர்ட் மற்றும் கருப்பு பேண்ட் அணிந்து வெளியே வந்த உதயநிதி, புன்னகையுடனே காவல் வாகனத்தில் ஏறினார். செய்தியாளர்களிடம் பேசிய அவர், நான் எந்தத் தவறான கருத்தையும் தெரிவிக்கவில்லை. இந்த கைது நடவடிக்கை ஒரு காமெடி நாடகம். நாங்கள் இதனைச் சட்டப்பூர்வமாக எதிர்கொள்வோம் என்று கூறினார்.
மாநிலம் தழுவிய போராட்டம்
உதயநிதி ஸ்டாலின் கைது செய்யப்பட்ட செய்தி பரவியதும், தமிழகம் முழுவதும் திமுக தொண்டர்கள் வீதிகளில் இறங்கிப் போராட்டம் நடத்தத் தொடங்கினர். கிழக்குக் கடற்கரைச் சாலை வழியே அவரைத் தஞ்சாவூருக்கு அழைத்துச் சென்றபோது, பல இடங்களில் தொண்டர்கள் காவல் வாகனத்தை மறித்து முழக்கமிட்டதால் பெரும் போக்குவரத்து நெரிசல் ஏற்பட்டது.
சென்னை உயர் நீதிமன்றத்தில் அவசரக் கால முன்ஜாமீன் மனுத் தாக்கல் செய்யப்பட்ட போதிலும், விசாரணை முடிவதற்குள்ளேயே காவல் துறை அவரைத் தஞ்சாவூருக்கு அழைத்துச் சென்றது.
வாரிசு நிழலிலிருந்து தனித்துவ அடையாளத்தை நோக்கி
கருணாநிதி மற்றும் மு.க.ஸ்டாலின் ஆகிய இருபெரும் தலைவர்களின் வழியில் வந்த உதயநிதிக்கு, 2021-ல் அமைச்சராகவும், பின்னர் துணை முதல்வராகவும் பொறுப்பேற்பது எளிதான ஒன்றாக இருந்தது. ஆனால், தவெக வெற்றி பெற்று ஆட்சி அமைத்ததைத் தொடர்ந்து, அவர் எதிர்க்கட்சி வரிசைக்குத் தள்ளப்பட்டார்.
திரையுலகில் நெருங்கிய நண்பர்களாகவும், ரெட் ஜெயண்ட் மூலம் திரைப்படங்களைத் தயாரித்து வந்த சூழலிலும், தற்போது விஜய்யும் உதயநிதியும் சட்டப்பேரவையில் நேருக்கு நேர் மோதிக்கொள்ளும் அரசியல் எதிரிகளாக மாறியுள்ளனர்.
இதுவரை அரசு பாதுகாப்பு மற்றும் குடும்பப் பின்னணியின் நிழலில் செயல்பட்டு வந்த உதயநிதிக்கு, இந்த கைது சம்பவம் ஒரு அரசியல் வாய்ப்பாக பார்க்கப்படுகிறது. ஒரு எதிர்க்கட்சித் தலைவருக்குத் தேவையான அரசியல் வடுக்களையும் போராட்ட அனுபவத்தையும் இந்த நிகழ்வு அவருக்கு வழங்கியுள்ளது.
அரசியல் நகர்வு
காவிரி விவகாரத்தில் கர்நாடக அரசின் நிலைப்பாட்டால் விஜய் அரசுக்கு ஏற்பட்ட நெருக்கடியைத் திசைதிருப்பவே இந்த கைது நடவடிக்கை மேற்கொள்ளப்பட்டதாக திமுக குற்றம் சாட்டுகிறது. மறுபுறம், பெண்களின் கண்ணியத்தைக் காக்கவே நடவடிக்கை எனத் தவெக மற்றும் பாஜக தரப்பில் தெரிவிக்கப்பட்டது.
இருப்பினும், திமுக மீது விஜய் அரசு முன்வைத்து வந்த ஊழல் குற்றச்சாட்டுகளின் தீவிரத்தை, இந்த ஒரே கைது சம்பவம் மழுங்கடித்துள்ளது. ஒரு பேச்சு தொடர்பான வழக்கில் உதயநிதியைக் கைது செய்ததன் மூலம், விஜய் அரசே அவருக்குத் தனித்துவமான ஒரு வலுவான அரசியல் பிம்பத்தையும் அனுதாபத்தையும் உருவாக்கிக் கொடுத்துள்ளதாக அரசியல் விமர்சகர்கள் கருதுகின்றனர்.
உதயநிதிக்கு தேவையான மைலேஜ், கட்சி ஆதரவு, தொண்டர்கள் ஆதரவு என்று அனைத்தையும் அள்ளிக்கொடுத்துள்ளார் விஜய்!
பட்ஜெட் கூட்டத்தொடருக்கு முன்னதாக எதிர்க்கட்சித் தலைவரைக் கைது செய்ததை திமுக தலைவர் மு.க.ஸ்டாலின் மற்றும் அதிமுக பொதுச்செயலாளர் எடப்பாடி பழனிசாமி ஆகியோர் கடுமையாகக் கண்டித்துள்ளனர். ஜாமீனில் வெளிவந்துள்ள உதயநிதி ஸ்டாலின், சட்டப் போராட்டத்துடன் சேர்த்துத் தனது அரசியல் களத்தையும் தீவிரப்படுத்தத் தயாராகி வருகிறார்.
Click it and Unblock the Notifications
Sign in with Google
