அசத்தல்.. விஜயகாந்த்தை வீட்டுக்கே போய் சந்தித்து நலம் விசாரித்த உதயநிதி ஸ்டாலின்
சென்னை: தேமுதிக தலைவர் விஜயகாந்தை இன்று நேரில் சந்தித்து அவரது உடல் நலம் பற்றி விசாரித்துள்ளார் திமுக இளைஞரணி செயலாளரும், எம்எல்ஏவுமான உதயநிதி ஸ்டாலின்.
நடந்து முடிந்த சட்டசபை தேர்தலில், அம்மா மக்கள் முன்னேற்ற கழகம் கட்சியுடன் கூட்டணி அமைத்து இருந்தது தேமுதிக. அக்கட்சி பொருளாளர் பிரேமலதா விஜயகாந்த் விருதாசலம் சட்டசபை தொகுதியில் போட்டியிட்டார். ஆனால் டெபாசிட் இழந்தார்.
அதேநேரம், உடல்நிலை காரணமாக தேமுதிக தலைவர் விஜயகாந்த் சென்னையை தாண்டி எங்கும் பிரச்சார கூட்டத்திற்கு செல்ல முடியவில்லை.
இந்த நிலையில்தான் சாலிகிராமத்தில் உள்ள விஜயகாந்த் இல்லத்திற்கு இன்று மதியம் உதயநிதி ஸ்டாலின் சென்றார். விஜயகாந்துக்கு பொன்னாடை போர்த்தி பிறகு அவருடைய உடல்நிலை பற்றி கேட்டறிந்தார் உதயநிதி ஸ்டாலின்.
அவரிடம் வாழ்த்து பெற்றார். இதற்கு முந்தைய காலகட்டங்களில் திமுக தலைவர் ஸ்டாலின் விஜயகாந்தை நேரில் சந்தித்து உடல் நலம் விசாரித்துள்ளார். ஆனால், உதயநிதி ஸ்டாலின் வீட்டுக்கு சென்று விஜயகாந்தை சந்திப்பது இதுதான் முதல்முறை என்பது குறிப்பிடத்தக்கது.
மதிமுக பொதுச் செயலாளர் வைகோ உள்ளிட்ட கூட்டணி கட்சி தலைவர்களையும் அடுத்தடுத்து உதயநிதி ஸ்டாலின் சந்தித்து பேச திட்டமிட்டுள்ளார்.
Click it and Unblock the Notifications
Sign in with Google