குறை கூறுவதற்கு மட்டும் தலையை வெளியே காட்டும் எதிர்க்கட்சிகள்! உதயநிதி ஸ்டாலின் வேதனை!

சென்னை: குறை கூறுவதற்காக மட்டுமே எதிர்க்கட்சிகள் தலையை வெளியே காட்டுவதாக அமைச்சர் உதயநிதி ஸ்டாலின் வேதனைத் தெரிவித்துள்ளார்.

மிக்ஜாம் புயல் - கனமழை ஏற்படுத்திய வரலாறு காணாத பேரிடரால் சென்னை காஞ்சிபுரம் - திருவள்ளூர் - செங்கல்பட்டு மாவட்டங்களில் ஒரு கோடிக்கும் அதிகமானவர்கள் பாதிக்கப்பட்டுள்ளதாக தெரிவித்துள்ளார். இது குறித்து அவர் விடுத்துள்ள பதிவு வருமாறு;

''முதலமைச்சர், அமைச்சர் பெருமக்கள் அரசு அதிகாரிகள் கழக நிர்வாகிகள் - இளைஞர் அணியினர் - கழக உடன்பிறப்புகள் என அனைவரும் களத்தில் இறங்கி மக்களுக்கான நிவாரண உதவிகளைச் செய்து வருகின்றனர்.

கடந்த டிசம்பர் 3-ஆம் தேதி நள்ளிரவு முதல் தற்போது வரை நானும் தொடர்ந்து களத்தில் நின்று வெள்ள பாதிப்பு தொடர்பாக ஆய்வுகளை மேற்கொண்டு - மக்களுக்கான நிவாரண உதவிகளை வழங்கி வருகிறேன்.

குறை கூறுவதற்காக மட்டுமே தலையை வெளியே காட்டும் எதிர்க்கட்சிகளுக்கு மத்தியில், மக்களுடன் நிற்பதும் அவர்களைப் பேரிடரிலிருந்து மீட்பதுமே நமது தலையாயப் பொறுப்பு. ஆக்கப்பூர்வமான ஆலோசனைகளுக்குச் செவிமடுத்தும் -வன்மத்துடன் வருகின்ற விமர்சனங்களை எதிர்கொண்டும் மக்களுக்கான உதவிகளை, நம் கழகத்தினர் தொடர்ந்து செய்து வருகின்றனர்.

இந்த மாபெரும் மீட்பு - நிவாரணப் பணிகளின் காரணத்தால், சேலத்தில் வருகிற 17-ஆம் தேதி நடைபெறவிருந்த 'மாநில உரிமை மீட்பு' முழக்கமான நம் இளைஞர் அணியின் 2-வது மாநில மாநாட்டை, டிசம்பர் 24-ஆம் தேதி நடத்துவது, என்று தலைமைக் கழகம் அறிவித்திருக்கிறது. இந்த அறிவிப்புக்கேற்ப இளைஞர் அணி மாநில மாநாட்டுக்கான பணிகளை ஒருங்கிணைக்க மாவட்டச் செயலாளர்கள் இளைஞர் அணியின் மாநில - மாவட்ட ஒன்றிய நகர பகுதி - பேரூர் நிர்வாகிகளைக் கேட்டுக் கொள்கிறோம்.

இயற்கைப் பேரிடரிலிருந்து நம் மக்களை இப்போது மீட்போம் 10 ஆண்டு காலமாக பாசிஸ்ட்டுகள் ஏற்படுத்தி வரும் செயற்கைப் பேரிடரிலிருந்து நாட்டை மீட்க, டிசம்பர் 24 அன்று சேலத்தில் கூடுவோம்; இளைஞர் அணி மாநாட்டை வெற்றி பெறச் செய்வோம்.''

English summary

Minister Udhayanidhi Stalin has expressed anguish that the opposition parties are showing their heads only to complain