ஆயிரம் விளக்கு அல்லது திருவாரூர்.. தொகுதி மாறும் உதயநிதி ஸ்டாலின்.. திமுக தலைமை முடிவு என்ன?

Updated: Wednesday, January 7, 2026, 12:01 [IST]

Subscribe to Oneindia Tamil

சென்னை: 2026 சட்டசபைத் தேர்தலில் சேப்பாக்கம் - திருவல்லிக்கேணி தொகுதியில் யாரை நிறுத்தினாலும், அதிக வாக்குகள் வித்தியாசத்தில் வெற்றி பெற வைக்க வேண்டும் என்று துணை முதல்வர் ஸ்டாலின் பேசி இருப்பது பல்வேறு சந்தேகங்களை எழுப்பி இருக்கிறது. இதனால் உதயநிதி ஸ்டாலின் திருவாரூர் அல்லது ஆயிரம் விளக்கு தொகுதியில் போட்டியிட ஆலோசித்து வருவதாக கூறப்படுகிறது.

2021 சட்டசபைத் தேர்தலில் உதயநிதி ஸ்டாலின் சேப்பாக்கம் - திருவல்லிக்கேணி தொகுதியில் போட்டியிட்டார். முதல்முறையாக தேர்தலில் போட்டியிட்ட உதயநிதி ஸ்டாலின், மிகப்பெரிய வெற்றியை பெற்றார். இதையடுத்து 2 ஆண்டுகளுக்கு பின் விளையாட்டுத்துறை அமைச்சரான உதயநிதி ஸ்டாலின், அடுத்த ஓராண்டில் துணை முதல்வராக கொண்டு வரப்பட்டார்.

இந்த நிலையில் சேப்பாக்கம் திருவல்லிக்கேணி தொகுதியில் நடைபெற்ற பொங்கல் விழாவில் உதயநிதி ஸ்டாலின் பங்கேற்றார். அப்போது உதயநிதி ஸ்டாலின் பேசுகையில், சேப்பாக்கம் திருவல்லிக்கேணி தொகுதி திமுகவின் கோட்டை. யார் வேட்பாளராக நிறுத்தப்பட்டாலும், கடந்த முறையை விட அதிக வாக்குகள் வித்தியாசத்தில் வெற்றிபெற வைக்க வேண்டும் என்று பேசி இருக்கிறார்.

இதனால் உதயநிதி ஸ்டாலின் இம்முறை தொகுதி மாறுகிறாரா என்ற கேள்விகள் எழுந்துள்ளது. ஏற்கனவே SIR பணிகள் காரணமாக சேப்பாக்கம் - திருவல்லிக்கேணி தொகுதிகளில் அதிகளவிலான வாக்குகள் பறிபோனது. அதேபோல் சில மாதங்களாகவே உதயநிதி ஸ்டாலின் வேறு தொகுதிக்கு மாறப் போவதாக சொல்லப்பட்டு வந்தது.

அந்த வகையில் உதயநிதி ஸ்டாலின் இம்முறை மறைந்த முன்னாள் முதல்வர் கருணாநிதி போட்டியிட்ட திருவாரூர் தொகுதியில் போட்டியிட வாய்ப்புகள் உள்ளதாக கூறப்படுகிறது. 2011 மற்றும் 2016 ஆகிய சட்டசபைத் தேர்தல்களில் திருவாரூர் தொகுதியில் போட்டியிட கருணாநிதி மிகப்பெரிய வெற்றியை பெற்றார். அதன்பின் அந்த தொகுதியில் பூண்டி கலைவாணன் போட்டியிட்டு வென்றார்.

இம்முறை உதயநிதி ஸ்டாலின் திருவாரூர் தொகுதியில் போட்டியிட வாய்ப்பு உள்ளது என்று பார்க்கப்பட்டாலும், ஆயிரம் விளக்கு தொகுதியும் பரிசீலனையில் இருப்பதாக கூறப்படுகிறது. ஆயிரம் விளக்கு தொகுதியில் மருத்துவர் எழிலன் தீவிரமாக களப்பணியில் ஈடுபட்டு வருகிறார். ஏற்கனவே அந்த தொகுதியில் போட்டியிட்டு வென்றுள்ள அவர், கடைசி நேரத்தில் உதயநிதி ஸ்டாலினுக்கு விட்டுக் கொடுப்பாரா என்ற கேள்வியும் எழுந்துள்ளது.