சென்னை வந்தடைந்தார் அமித்ஷா.. 2024 தேர்தல் ஆட்டம் “ஸ்டார்ட்”! தமிழகத்தில் வெல்லுமா “ஆபரேசன் சவுத்”
சென்னை: பல்வேறு நிகழ்வுகளில் கலந்துகொள்வதற்காக மத்திய உள்துறை அமைச்சர் அமித்ஷா இன்று இரவு சென்னைக்கு வந்து இருக்கிறார். வேலூரில் நடைபெற உள்ள பாஜக பொதுக்கூட்டத்தில் அவர் கலந்துகொள்ள உள்ளார்.
2024 லோக் சபா தேர்தலுக்கு இன்னும் ஒரு ஆண்டு உள்ளது. இந்த நிலையில் அதற்கான ஆரம்பக்கட்ட பணிகளை பாரதிய ஜனதா கட்சி தொடங்கி உள்ளது. அந்த வகையில் பாஜகவுக்கு சவாலாக இருக்கும் தென்னிந்திய மாநிலங்களை அக்கட்சித் தலைவர்கள் குறிவைக்கத் தொடங்கி உள்ளார்கள்.
கடந்த ஆண்டு ஜூலை மாதம் தெலுங்கானா தலைநகர் ஐதராபாத்தில் நடைபெற்ற பாஜக செயற்குழு கூட்டத்தில் பேசிய மத்திய உள்துறை அமைச்சரும் பாஜக மூத்த தலைவருமான அமித்ஷா ஆபரேசன் சவுத் இந்தியா திட்டத்தை முன்வைத்தார். தென்மாநிலங்களில் பாஜகவுக்கு அதிக எதிர்ப்பு இருக்கும் நிலையில் பிரதமர் மோடி, பாஜக தலைவர் ஜேபி நட்டா, உள்துறை அமைச்சர் அமித்ஷா உள்ளிட்டோர் தொடர்ந்து வருகை தருகிறார்கள்.
இந்த நிலையில் நடந்து முடிந்த கர்நாடக மாநில சட்டசபைத் தேர்தலில் பாஜக படுதோல்வி அடைந்து தென் மாநிலங்களில் ஆட்சியில் இருந்த ஒரு மாநிலத்தையும் பறிகொடுத்தது. இமாச்சல், கர்நாடகா என அடுத்தடுத்து கட்சி 2 மாநிலங்களை காங்கிரஸிடம் பறிகொடுத்து இருக்கிறது. இந்த நிலையில் நாடாளுமன்ற தேர்தல் பணிகளை இப்போதே அக்கட்சி தொடங்கி இருக்கிறது.
அந்த வகையில்தான் இன்று உள்துறை அமைச்சர் அமித்ஷா சென்னை வந்து இருக்கிறார். அவருக்கு மத்திய இணையமைச்சர் எல்.முருகன், முன்னாள் மத்திய அமைச்சர் பொன் ராதாகிருஷ்ணன், பாஜக மூத்த நிர்வாகி எச்.ராஜா உள்ளிட்டோர் அவரை விமான நிலையத்தில் வரவேற்றார்கள்.
2 நாள் பயணமாக சென்னை வரும் அமித்ஷாவை அதிமுக பொதுச்செயலாளர் எடப்பாடி பழனிசாமியும், முன்னாள் முதலமைச்சர் ஓ பன்னீர்செல்வமும் சந்திக்க இருப்பதாக ஏற்கனவே செய்திகள் வெளியாகின. இந்த நிலையில் எடப்பாடி பழனிசாமி அமித்ஷாவை சந்திக்க நேரம் கேட்கவில்லை என்றும், இருவரையுமே அமித்ஷா சந்திக்கவில்லை என்றும் கூறப்படுகிறது.
இந்த தமிழ்நாடு பயணத்தில் வேலூரில் நடைபெற உள்ள பாஜக பொதுக்கூட்டத்தில் அமித்ஷா கலந்துகொண்டு உரையாற்ற உள்ளார். அதேபோல் கட்சியின் மாநில நிர்வாகிகளை சந்திக்கும் அமித்ஷா நாடாளுமன்ற தேர்தல் பணிகள் தொடர்பாக விரிவாக ஆலோசனை மேற்கொள்ள உள்ளதாக கூறப்படுகிறது.
Click it and Unblock the Notifications
Sign in with Google