வேலூரில் பாஜக சாதனை விளக்க பொதுக்கூட்டம்.. தமிழகம் வருகிறார் அமித்ஷா.. பயண தேதியில் மாற்றம்

சென்னை: பாஜக மூத்த தலைவரும் உள்துறை அமைச்சருமான அமித்ஷா வரும் 11 ஆம் தேதி தமிழ்நாடு வருகை தருகிறார். வேலூரில் நடைபெறும் பாஜக சாதனை விளக்க பொதுக்கூட்டத்தில் அமித்ஷா கலந்து கொள்கிறார்.

மத்தியில் பிரதமர் மோடி தலைமையிலான பாஜக ஆட்சி அமைந்து 9 ஆண்டுகள் நிறைவடைந்துள்ளது. இந்த 9 ஆண்டுகால சாதனையை விளக்கும் வகையில் மே 30 முதல் ஜூன் 30 வரை நாடு முழுவதும் பொதுக் கூட்டங்களை பாஜக கூட்டம் நடத்தி வருகிறது. அந்த வகையில் தமிழ்நாட்டிலும் பல்வேறு இடங்களில் பொதுக்கூட்டங்களை நடத்த பாஜக திட்டமிட்டுள்ளது.

அந்த வகையில் வேலூரில் பாஜக பொதுக் கூட்டம் நடைபெறுகிறது. வேலூர் பள்ளிக்கொண்டா அருகே கந்தநேரியில் நடைபெற இருக்கும் இந்தக் கூட்டத்தில் மத்திய அமைச்சர்கள் அமித்ஷா, விகே சிங் பங்கேற்க உள்ளனர். இந்தக் கூட்டம் வரும் 8 ஆம் தேதி நடைபெறுவதாக அறிவிக்கபட்டு இருந்தது. இந்த நிலையில், அமித்ஷாவின் தமிழக பயண தேதி மாற்றப்பட்டுள்ளது. அதாவது வரும் 8 ஆம் தேதிக்கு பதிலாக 11 ஆம் தேதி வேலூருக்கு அமித்ஷா வருகை தர உள்ளார்.

இதன்படி வேலூரில் வரும் 11 ஆம் தேதி பாஜக சார்பில் சாதனை விளக்க பொதுக்கூட்டம் நடைபெற உள்ளது. மத்திய அமைச்சர்கள் பங்கேற்கும் பொதுக்கூட்ட இடத்தை டெல்லியில் இருந்து வந்த அதிகாரிகளும் ஏற்கனவே ஆய்வு செய்து விட்டு சென்று இருக்கிறார்கள். தமிழ்நாடு பாஜக தலைவர்களும் இந்தப் பொதுக்கூட்டத்துக்கான ஏற்பாடுகளை தீவிரமாக மேற்கொண்டு வருகின்றனர்.

நாடாளுமன்ற தேர்தலுக்கு இன்னும் சரியாக ஒரு ஆண்டு கூட இல்லாத நிலையில், அமித்ஷாவின் தமிழக பயணம் அரசியல் வட்டாரத்தில் முக்கியத்துவம் பெற்றுள்ளது. நாடாளுமன்ற தேர்தலில் தேசிய ஜனநாயக கூட்டணியின் வியூகம், பாஜகவை வலுப்படுத்துவது உள்ளிட்டவை குறித்து தமிழக பாஜக தலைவர்களுடன் அமித்ஷா இந்த பயணத்தின் போது ஆலோசனை நடத்துவார் எனத் தெரிகிறது.

English summary

Senior BJP leader and Home Minister Amit Shah will visit Tamil Nadu on the 11th. Amit Shah attends the BJP's public meeting in Vellore.