அப்பாவை உரிச்சு வச்ச மாதிரி.. அச்சு அசல் வடிவேல் பாலாஜி தான்! கண்ணை கலங்க வைக்கும் மகனின் கெட்டப்

Updated: Monday, June 9, 2025, 12:27 [IST]

Subscribe to Oneindia Tamil

சென்னை: விஜய் டிவியில் கலக்கப் போவது யாரு, அது இது எது உள்ளிட்ட நிகழ்ச்சிகள் மூலம் பிரபலமான நடிகர் வடிவேல் பாலாஜி கடந்த சில ஆண்டுகளுக்கு முன்பு உடல் நலக்குறைவால் மரணம் அடைந்தார். இந்த நிலையில் தற்போது அவரது மகனின் புகைப்படம் சமூக வலைதளங்களில் அதிகமாக பகிரப்பட்டு வருகிறது. அச்சு அசலாக தந்தையைப் போலவே அதுவும் அவர் போட்ட வடிவேலு கெட்டப்பில் இருக்கும் புகைப்படத்தை பார்த்து ரசிகர்கள் நெகிழ்ச்சியில் ஆழ்ந்துள்ளனர்.

விஜய் டிவி மூலம் ஏராளமானோர் சின்னத்திரையில் இருந்து, திரைத்துறைக்கு வந்திருக்கின்றனர், அப்படி வந்தவர்களில் ஒருவர் வடிவேல் பாலாஜி. விஜய் டிவியில் கலக்கப்போவது யாரு, ராஜூ வீட்ல பார்ட்டி, ஸ்டார்ட் மியூசிக் உள்ளிட்ட பல்வேறு நிகழ்ச்சிகளில் கலந்து கொண்டவர்.

2008 ஆம் ஆண்டு கலக்கப் போவது யாரு நிகழ்ச்சி மூலம் தான் விஜய் டிவியில் கால் வைத்தார் அதற்குப் பிறகு அது இது எது நிகழ்ச்சியில் சிரிச்சா போச்சு மூலம் உலகம் முழுவதும் ஏராளமான ரசிகர்களை பெற்றார். அதற்குப் பிறகு விஜய் டிவியின் அனைத்து நிகழ்ச்சிகளிலும் அவருக்கு இடம் கொடுக்கப்பட்டது.

வடிவேலு கெட்டப்பில் அவர் எந்த கெட்ட போட்டாலும் அச்சு அசலாக பொருந்திப் போகும். குறிப்பாக வசனமே பேசாமல் வடிவேலு போல் ஆக்சன் மூலமே விருந்தினர்களையும், ரசிகர்களை சிரிக்க வைப்பது வடிவேலு பாலாஜியின் ஸ்பெஷல் திறமை. தொடர்ந்து சினிமாவிலும் அவர் நடித்தார். யாருடா மகேஷ், கோலமாவு கோகிலா உள்ளிட்ட படங்களிலும் நடித்திருக்கிறார்.

கடைசியாக 2019 ஆம் ஆண்டு ஸ்டார்ட் மியூசிக் 2 சீசனில் பங்கேற்ற அவர் 2020 ஆம் ஆண்டு உடல் நலக் குறைவு காரணமாக மரணம் அடைந்தார். அவரது இந்த மரணம் ரசிகர்கள் மத்தியில் கடும் அதிர்ச்சியை ஏற்படுத்தியது. அவரது உடலுக்கு சின்னத்திரை பிரபலங்கள், நடிகர் சிவகார்த்திகேயன், ரசிகர்கள் பலர் அஞ்சலி செலுத்தினர்.

ஏழ்மையான குடும்பத்தைச் சேர்ந்தவராக இருந்தாலும் தனது திறமையால் உயர்ந்த வடிவேலு பாலாஜிக்கு ஒரு மகன் இருக்கிறார். தற்போது அவரது புகைப்படம் தான் சமூக வலைதளங்களில் வெளியாகி ரசிகர்களை நெகிழ்ச்சியில் ஆழ்த்தி இருக்கிறது. அதுவும் தனது தந்தையின் பேவரிட் கெட்டப் ஆனா வடிவேலு கெட்டப்பிலேயே அவர் இருக்கிறார் வடிவேலு பாலாஜியின் மகனான ஸ்ரீகாந்த்.

வடிவேலுவின் வெற்றி கொடி கட்டு திரைப்படத்தில் நீல நிற ஜிப்பா லுங்கி அணிந்து காமெடி காட்சிகளில் நடித்திருப்பார். அதே கெட்டப்பை போட்டு வடிவேலு பாலாஜி பல நிகழ்ச்சிகளில் காமெடியில் கலக்கி இருக்கிறார். தற்போது அதே கெட்டப்பை ஸ்ரீகாந்த் பாலாஜியும் போட்டுள்ளார். மேலும், தந்தையின் புகைப்படத்துக்கு முன் அவரது கெட்டப்பை போட்டு தங்கை மற்றும் தாயுடன் இருக்கும் புகைப்படங்களை வெளியிட்டுள்ளார்.

இதை பார்த்து பலரும் பாராட்டி வருவதோடு வடிவேலு பாலாஜியின் நண்பர்கள், சினிமாத் துறையினர் ஸ்ரீகாந்த் பாலாஜிக்கும் சினிமா துறையிலும், சின்னத்திரையிலும் வாய்ப்பு தர வேண்டும் என கோரிக்கை விடுத்து வருகின்றனர்.