பேராபத்து.. தமிழ்நாட்டின் ஒருபகுதியே அழிந்துபோகும்.. கூடங்குளம் அணு உலையை மூடுங்க - வைகோ எச்சரிக்கை!

சென்னை: கூடங்குளம் அணுஉலைகளை மூடி தென்தமிழ்நாட்டை அழிவிலிருந்து காக்க வேண்டும் என மத்திய மாநில அரசுகளுக்கு மதிமுக பொதுச்செயலாளர் வைகோ வேண்டுகோள் விடுத்துள்ளார்.

திருநெல்வேலி மாவட்டம், கூடங்குளம் அணு மின் நிலைய வளாகத்தில், தலா 1,000 மெகா வாட் திறனில், மூன்றாவது மற்றும் நான்காவது அணு உலைகள் அமைக்கும் பணி முழுவீச்சில் நடைபெற்று வருகிறது. மூன்றாவது மற்றும் நான்காவது அணு உலைகளில், 2025 - 26ல் மின் உற்பத்தி துவக்கப்படும் என எதிர்பார்க்கப்படுகிறது.

இந்நிலையில், வைகோ வெளியிட்டுள்ள அறிக்கையில், "கூடங்குளம் அணுஉலைகளால் தென்தமிழ் நாடே அழிந்துபோகும் என நான் பலமுறை எச்சரித்து வருகிறேன். உதாராணத்திற்கு ஜப்பானில் புகுசிமா அணுஉலை அமைக்கப்பட்ட போதே மக்கள் எதிர்த்தார்கள். அமெரிக்காவில் 3 மைல் தீவில் அமைக்கப்பட்ட அணு உலையால் இலட்சக்கணக்கான மக்கள் பாதிக்கப்பட்டடனர்.

அதன்பின்னர் சோவியத் ரஷ்யாவில் அமைக்கப்பட்ட செர்னோபில் அணுஉலையில் விபத்து ஏற்பட்டு இலட்சக்கணக்கான மக்கள் வெளியேறினார்கள். எண்ணற்றவர்கள் இறந்தார்கள். ஜப்பானில் அணுஉலைக் கழிவு நீரை பசிபிக் கடலில் திறந்துவிட்டுள்ளார்கள். இதனால் ஜப்பானியர்கள் அணுஉலையை எதிர்த்துப் போராடி வருகிறார்கள்.

இதே போன்று கூடங்குளம் அணுஉலையில் சேமித்து வைக்கப்பட்டிருக்கின்ற அணுஉலைக் கழிவு நீரை வங்காள விரிகுடாவில்தான் திறந்துவிடுவார்கள். இதனால் இடிந்தகரை உள்ளிட்ட நூற்றுக்கணக்கான கிராமங்கள் அழிந்துபோகும். நம் தலைமீது பேராபத்து கத்திபோல் தொங்குவதால், கூடங்குளத்தில் அணுஉலைகளை மூடுவது ஒன்றுதான் எதிர்காலத்தில் தென்தமிழகத்தை பாதுகாக்கும்.

ஆனால் இதைப்பற்றி எல்லாம் கவலைப்படாத மத்திய அரசுக்கு எச்சரிக்கை செய்கிறேன். நிலவில் கால் வைக்கலாம், ஆனால் தமிழ்நாட்டின் ஒரு பகுதி பூமியே அழிந்துபோகும் என்பதை உணர்ந்து, கூடங்குளம் அணுஉலைகளை மூடி தென்தமிழ்நாட்டை அழிவிலிருந்து காக்க வேண்டும்" எனத் தெரிவித்துள்ளார்.

English summary

MDMK General Secretary Vaiko has appealed to the central and state governments to close the Kudankulam nuclear power plants and protect South Tamil Nadu from destruction.