"இன்னும் நீ இருக்கிறாய் அண்ணா!" பேரறிஞர் பிறந்தநாளில் கவிதை எழுதிய வைரமுத்து!

சென்னை: தமிழ்நாட்டின் முன்னாள் முதலமைச்சர் பேரறிஞர் அண்ணாவின் நினைவு தினத்தையொட்டி வைரமுத்து ஒரு கவிதை எழுதி வெளியிட்டுள்ளார்.

தமிழ்நாட்டின் முன்னாள் முதலமைச்சரும், திமுக நிறுவனருமான அண்ணாதுரையின் நினைவு நாள் இன்று அனுசரிக்கப்படுகிறது. நவீன தமிழ்நாட்டின் சிற்பி என்றழைக்கப்படும் அண்ணா, அவர் மறைந்து அரை நூற்றாண்டு காலம் கடந்த பின்னும், இன்றைய அரசியலின் பேச்சாகவும் மூச்சாகவும் இருக்கிறார்.

அண்ணா தொடங்கிய கட்சியும், அண்ணா பெயரில் தொடங்கப்பட்ட கட்சியுமே கடந்த 57 ஆண்டு காலமாக தமிழ்நாட்டில் ஆட்சியில் உள்ளன. தமிழ்நாடு என பெயர் சூட்டியது முதல் சுயமரியாதைத் திருமணங்களுக்கு சட்ட வடிவம் கொடுத்தது, இருமொழிக் கொள்கை வகுத்தது வரை அண்ணா விதைத்த விதை நவீன தமிழ்நாட்டின் முற்போக்குப் பாதைக்கு அடித்தளமாக அமைந்தது.

அறிஞர் அண்ணாவின் 55வது நினைவு நாள் இன்று அனுசரிக்கப்படும் நிலையில், அண்ணா நினைவாக கவிஞர் வைரமுத்து தனது சமூகவலைத்தள பக்கத்தில்,

“இருமொழிக்கொள்கை
இறந்துபடவில்லை

மாநில சுயாட்சிக்கான
காரணங்கள் இன்னும்
காலமாகிவிடவில்லை

பகுத்தறிவின் வேர்கள்
பட்டுவிடவில்லை
இனமானக் கோட்டை
இற்றுவிடவில்லை
சமூக நீதிக்கொள்கை
அற்றுவிடவில்லை

மதவாத எதிர்ப்பு
மாண்டுவிடவில்லை

எப்படி நீமட்டும்
இறந்துபடுவாய் அண்ணா?

நிழல் விழுந்தால்
பொருள் இருக்கிறது
என்று பொருள்

லட்சியம் வாழ்ந்தால்
அந்த மனிதன் வாழ்கிறான்
என்று பொருள்

இன்னும் நீ இருக்கிறாய்
அண்ணா!

எங்கள் கொள்கை வணக்கம்!” என்று குறிப்பிட்டுள்ளார்.

English summary

Poet Vairamuthu has written and published a poem on the occasion of the death anniversary of Tamil Nadu's former Chief Minister CN Annadurai.