விசிகவில் 3 சிட்டிங் எம்எல்ஏவுக்கு சீட் மறுப்பு.. நேரடியாக களமிறங்கும் திருமாவளவன்.. பாவம் ஷாநவாஸ்!

Published: Sunday, March 29, 2026, 21:31 [IST]

Subscribe to Oneindia Tamil

சென்னை: விசிகவில் சிட்டிங் எம்எல்ஏ-க்களான எஸ்.எஸ்.பாலாஜி, ஆளூர் ஷாநவாஸ் மற்றும் பனையூர் பாபு ஆகிய மூவருக்கும் சட்டசபைத் தேர்தலில் சீட் மறுக்கப்பட்டுள்ளது. அதேபோல் சிட்டிங் எம்எல்ஏ சிந்தனைச் செல்வனுக்கு செய்யூர் தொகுதியில் போட்டியிட வாய்ப்பு அளிக்கப்பட்டுள்ளது. அதுமட்டுமல்லாமல் விசிக தலைவர் திருமாவளவன் காட்டுமன்னார்கோவில் தொகுதியில் போட்டியிட இருப்பதாகவும் அறிவிக்கப்பட்டுள்ளது.

சட்டசபைத் தேர்தலில் திமுக கூட்டணியில் முக்கிய அங்கமாக இருக்கும் விசிகவின் வேட்பாளர்கள் பட்டியல் வெளியிடப்பட்டுள்ளது. திமுக கூட்டணியில் விசிகவுக்கு 8 தொகுதிகள் ஒதுக்கீடு செய்யப்பட்டுள்ளது. அதன்படி விசிகவுக்கு காட்டுமன்னார்கோவில், செய்யூர், திண்டிவனம், அரக்கோணம், திருப்போரூர், பண்ருட்டி, கள்ளக்குறிச்சி மற்றும் பெரியகுளம் ஆகிய தொகுதிகள் ஒதுக்கப்பட்டது.

6 தனித் தொகுதிகளும், 2 பொதுத் தொகுதிகளும் ஒதுக்கப்பட்டன. இந்த நிலையில் விசிக வேட்பாளர்கள் பட்டியலை அக்கட்சியின் தலைவர் திருமாவளவன் அறிவித்துள்ளார். அதன்படி காட்டுமன்னார்கோவில் தொகுதியில் விசிக தலைவர் திருமாவளவன் போட்டியிடுவதாக அறிவிக்கப்பட்டுள்ளது. மாநில அரசியலில் விசிகவின் பிடியை அதிகரிக்க இந்த முடிவை எடுத்துள்ளதாக தெரிவிக்கப்பட்டுள்ளது.

தொடர்ந்து செய்யூர் தொகுதியில் சிட்டிங் எம்எல்ஏ-வும் கட்சியின் துணை பொதுச்செயலாளருமான சிந்தனைச் செல்வனுக்கு போட்டியிட வாய்ப்பு அளிக்கப்பட்டுள்ளது. அதேபோல் திண்டிவனம் தொகுதியில் வன்னி அரசு, அரக்கோணம் தொகுதியில் வழக்கறிஞர் எழில் கரோலின், திருப்போரூர் தொகுதியில் பன்னீர்தாஸ், பெரியகுளம் தொகுதியில் சக்திவேலுக்கு வாய்ப்பு அளிக்கப்பட்டுள்ளது.

அதேபோல் கள்ளக்குறிச்சி தொகுதியில் மாலதி மற்றும் பண்ருட்டி தொகுதியில் அப்துல் ரகுமான் ஆகியோருக்கு வாய்ப்பு அளிக்கப்பட்டுள்ளது. ஆனால் சிட்டிங் எம்எல்ஏக்களான எஸ்.எஸ்.பாலாஜி, ஆளூர் ஷாநவாஸ் மற்றும் பனையூர் பாபு ஆகியோருக்கு வாய்ப்பு மறுக்கப்பட்டுள்ளது. கடந்த முறை ஆளூர் ஷாநவாஸ் நாகை தொகுதியில் போட்டியிட்டு வென்றிருந்தார்.

இம்முறை நாகை தொகுதியில் மமகவுக்கு ஒதுக்கப்பட்டுள்ளது. ஆனால் செய்யூர் தொகுதியில் போட்டியிட்டு வென்ற பனையூர் பாபுவுக்கும், திருப்போரூர் தொகுதியில் போட்டியிட்டு வென்ற எஸ்.எஸ்.பாலாஜிக்கும் வாய்ப்பு வழங்கப்படவில்லை. விசிகவின் 8 வேட்பாளர்களில் 6 ஆண்கள், 2 பெண்களுக்கு வாய்ப்பு வழங்கப்பட்டுள்ளது. அதேபோல் ஒரு இஸ்லாமிய வேட்பாளரும் அறிவிக்கப்பட்டுள்ளார்.

Published On March 29, 2026