விசிக ஆபிஸில் புதிய மாற்றம்.. முக்கிய முடிவுக்கான சிக்னலா இந்த சோபா?

Updated: Saturday, May 9, 2026, 12:32 [IST]

Subscribe to Oneindia Tamil

சென்னை: சட்டமன்ற தேர்தலில் தவெக தமிழகத்தின் தனிப்பெரும் கட்சியாக உருவெடுத்துள்ளது. தவெக 108 தொகுதிகளில் வெற்றி பெற்றுள்ளனர். ஆட்சியமைப்பதற்கு தேவையான 118 தொகுதிகள் அவர்களிடம் இல்லை. காங்கிரஸ் முதல் ஆளாக தவெகவுக்கு ஆதரவு தெரிவித்தது. சிபிஎம், சிபிஐ, விசிக, ஐயூஎம்எல் கட்சிகளிடம் தவெக ஆதரவு கோரியது. சிபிஎம், சிபிஐ கட்சிகள் தவெகவுக்கு ஆதரவு தெரிவித்துள்ளன. விசிக நிலைப்பாட்டும் விரைவில் வெளியாகவுள்ளது. விசிக அலுவலகத்தில் புதிய சோபா ஒன்று வந்திறங்கியுள்ளது. விசிக அறிவித்த பிறகு விஜய் உள்ளிட்ட தவெக நிர்வாகிகள் அங்கு வரவுள்ளதாக தகவல் வெளியாகியுள்ளது.

தமிழக சட்டமன்ற தேர்தலில் தினசரி பல்வேறு திருப்பங்கள் ஏற்பட்டு வருகின்றன. தவெகவுக்கு மெஜாரிட்டி இல்லை என்பதால் அவர்களை ஆட்சியமைக்க அழைக்க முடியாது என்று ஆளுநர் ராஜேந்திர விஸ்நாத் அர்லேக்கர் உறுதியாக உள்ளார். தவெகவுக்கு காங்கிரஸ், சிபிஐ, சிபிஎம் கட்சிகள் ஆதரவு தெரிவித்தன. ஐயூஎம்எல், அமமுக தவெகவுக்கு ஆதரவில்லை என கூறிவிட்டனர். விசிக தங்களின் நிலைப்பாட்டை இன்னும் சிறிது நேரத்தில் அறிவிக்கவுள்ளனர்.

விசிக நிலைப்பாடு

இதற்காக அசோக்நகரில் உள்ள விசிக அலுவலகம் பரபரப்பாக உள்ளது. 300க்கும் மேற்பட்ட விசிகவினர் அவர்களின் அலுவலகத்தில் திரண்டுள்ளனர். தவெக விஜய்க்கு ஆதரவாகவும், திருமாவளவனை வரவேற்றும் விசிக தொண்டர்கள் பதாகைகளை ஏந்தியபடி நின்றுள்ளனர். திருமாவளவனின் அறிவிப்பை தவெக, விசிக நிர்வாகிகள் மட்டுமல்லாமல் தமிழக மக்களும் ஆர்வத்துடன் பார்த்து கொண்டிருக்கிறார்கள்.

இந்நிலையில் விசிக அலுவலகத்தில் திடீரென புதிய சோபா வந்திறங்கியுள்ளது. விசிக தலைவர் திருமாவளவன் தங்களின் நிலைப்பாட்டை அறிவித்த பிறகு, தவெக தலைவர் விஜய் விசிக அலுவலகத்திற்கு நேரடியாக வருகை புரியவுள்ளதாக கூறப்படுகிறது. அதற்காக தான் சிவப்பு நிறத்தில் ஒரு புதிய சோபா வண்டியில் வந்து இறங்கியுள்ளது. அதனை விசிக அலுவலகத்தில் வைத்துள்ளனர்.

புதிய சோபா

விசிக அலுவலகத்தில் புனரமைப்பு பணிகள் நடந்து வருகின்றன. அங்குள்ள திருமாவளவன் அறையில் இந்த சோபா வைக்கப்பட்டுள்ளது. விஜய் மற்றும் தவெக நிர்வாகிகள் அமர்ந்து பேசுவதற்காக தான் சோபா வந்துள்ளதாக கூறப்படுகிறது. இந்த அறிகுறிகள் மூலம் விசிக மாற்றத்திற்கு தயாராகிவிட்டது, தவெகவுக்கு ஆதரவு வழங்குவது கிட்டத்தட்ட உறுதியாகிவிட்டுது என்றே விசிக அலுவலக சூழல்கள் உணர்த்துகின்றன.