கள்ளக்குறிச்சி, பெரியகுளம் உள்பட விசிக போட்டியிடும் 8 தொகுதிகள் எவை! வெளியானது பட்டியல்

சென்னை: திமுக கூட்டணியில் இடம் பெற்றுள்ள விடுதலைச் சிறுத்தைகள் கட்சி போட்டியிடும் 8 தொகுதிகள் என்னென்ன என்பது அறிவிக்கப்பட்டுள்ளது.

திமுக கூட்டணியில் விசிகவுக்கு 6 தனி தொகுதியும் 2 பொதுத் தொகுதியும் ஒதுக்கப்பட்டன. அந்த வகையில் நேற்றைய தினம் எந்தெந்த தொகுதிகள் என்பது குறித்து ஆலோசனை நடத்த அறிவாலயத்திற்கு விசிக தலைவர் திருமாவளவன் சென்றிருந்தார்.

அங்கு பேச்சுவார்த்தை குழுவுடன் ஆலோசனை நடத்தியிருந்தார். அப்போது அவர் செய்தியாளர்களிடம் கூறியிருப்பதாவது: திமுக பேச்சுவார்த்தையில் விசிகவின் 8 தொகுதிகள் அடையாளம் கண்டு உள்ளோம்.

திமுக- விசிக இடையே தொகுதிகள் அடையாளம் காணப்பட்டு ஒப்பந்தம் கையெழுத்தாகிவிட்டது. எந்தெந்த தொகுதிகள் என முறைப்படி முதல்வர் அறிவிப்பார்.

எங்களுக்கு திருப்திகரமாக பேச்சுவார்த்தை இருந்தது. விருப்பமான தொகுதிகள் கிடைத்துள்ளன. அனைத்து கட்சிகளுக்கும் தொகுதி ஒதுக்கிய பிறகு முதல்வர் நாளை (இன்று) அறிவிப்பார்.

திமுக கூட்டணியில் ஏதாவது பிரச்சனை ஏற்படுமா என காத்திருப்பவர்கள் ஏமாந்துதான் போவார்கள். எங்கள் கூட்டணியில் அதிக கட்சிகள் உள்ளதால் தனித்தனியாக ஒவ்வொரு கட்சியையும் அழைத்துப் பேசும்போது ஒரு கட்சி கேட்கும் தொகுதியை மற்றொரு கட்சியும் கேட்கக் கூடிய சூழல் இருப்பதால் தாமதம் இருக்கத்தான் செய்யும்.

எங்களுக்குள் எந்த இழுபறியும் இல்லை. இன்று இரவு அல்லது நாளை காலை அனைத்து தொகுதிகளும் கூட்டணி கட்சிகளுக்கு ஒதுக்கப்பட்ட பின்னர் முதல்வர் அதிகாரப்பூர்வமாக அறிவிப்பார்.

புதுவையில் பானை சின்னம் ஒதுக்க வேண்டும் என தேர்தல் ஆணையத்திற்கு கடிதம் அனுப்பியுள்ளோம். ஆனால் இதுவரை எந்த பதிலும் இல்லை. எனவே பானைச் சின்னத்தையும் ஒதுக்கவில்லை. சுயேச்சை சின்னத்திலேயே புதுவையில் போட்டியிடவுள்ளோம். இவ்வாறு அவர் தெரிவித்திருந்தார்.

அதன்படி இன்றைய தினம் காலை முதலே திமுக கூட்டணி கட்சிகளின் தொகுதிகள் எவை என்பது குறித்து வெளியாகும் என சொல்லப்பட்டு வந்தது. அந்த வகையில் அண்ணா அறிவாலயத்தில் திமுக பொருளாளர் டி.ஆர்.பாலு, திமுக கூட்டணி கட்சிகள் போட்டியிடும் தொகுதிகள் அடங்கிய பட்டியலை செய்தியாளர்களிடம் கொடுத்தார்.

அதில் விசிக போட்டியிடும் தொகுதிகள் பின்வருமாறு:

காட்டுமன்னார்கோவில் (தனி)
செய்யூர் (தனி)
திருப்போரூர்
அரக்கோணம் (தனி)
திண்டிவனம் (தனி)
பெரியகுளம் (தனி)
கள்ளக்குறிச்சி (தனி)
பண்ருட்டி