ஜனநாயகன் படம் லீக்.. சென்னை ஹைகோர்ட்டில் படக்குழு முறையீடு! நீதிபதி சொன்ன வார்த்தை

சென்னை: விஜய்யின் ஜனநாயகன் திரைப்படம் தியேட்டர்களில் ரிலீஸ் ஆகும் முன்பே சட்டவிரோதமாக இணையத்தில் முழு படமும் வெளியாகிவிட்டது. இதனால் பேரதிர்ச்சிக்கு உள்ளான ஜனநாயகன் படக்குழு தற்போது இது தொடர்பாக சென்னை உயர் நீதிமன்றத்தில் முறையீடு செய்துள்ளது. முறையாக மனு தாக்கல் செய்தால் விசாரணைக்கு எடுத்துக்கொள்ளப்படும் என்று நீதிபதி செந்தில்குமார் ராமமூர்த்தி தெரிவித்துள்ளார்.

இயக்குனர் ஹெச் வினோத் இயக்கத்தில், நடிகர் விஜய், நடிகை பூஜா ஹெக்டே, மமிதா பைஜூ, பிரகாஷ் ராஜ், பாபி தியோல் உள்ளிட்டோர் நடிப்பில் உருவான ஜனநாயகன் திரைப்படம் கடந்த ஜனவரி 9 ஆம் தேதி வெளியாகும் என படக்குழு அறிவித்து இருந்தது. விஜய் ரசிகர்களும் மிகுந்த எதிர்பார்ப்புடன் இருந்தனர். ஆனால் படத்தில் சில காட்சிகள் சர்ச்சைக்குரிய வகையில் இருப்பதாக கூறி படத்தை மறு ஆய்வுக் குழுவுக்கு அனுப்பி வைத்து சென்சார் போர்டு உத்தரவு பிறப்பித்தது.

ஜனநாயகன் படம் லீக்

இதனை எதிர்த்து படக்குழு தரப்பில் தாக்கல் செய்யப்பட்ட வழக்கை விசாரித்த தனி நீதிபதி, படத்திற்கு உடனடியாக சென்சார் சான்றிதழ் (யூ/ஏ சான்றிதழ்) வழங்குமாறு சென்சார் போர்டுக்கு உத்தரவிட்டது. இதனால் விஜய் ரசிகர்கள் உற்சாகமடைந்தனர். ஆனால் தனி நீதிபதியின் உத்தரவை எதிர்த்து உடனடியாக மேல்முறையீடு செய்யப்பட்டது. இந்த மனுவை விசாரித்த இரு நீதிபதிகள் அமர்வு, ஜனநாயகன் படத்திற்கு உடனடியாக சென்சார் சான்று வழங்குபடி உத்தரவிட்ட தனி நீதிபதியின் உத்தரவை ரத்து செய்தது.

வழக்கை மீண்டும் விசாரிக்கும் படி உத்தரவிட்டது. இதையடுத்து தனி நீதிபதி முன் விசாரிக்கும் வழக்கினை படக்குழு திரும்பப் பெற்றுக் கொண்டாது. பின்னர் படக்குழு மறு ஆய்வுக் குழுவுக்கு படத்தை பார்க்கும் படி ஜனநாயகன் படத்தை அனுப்பி வைத்தது. இதன்படி சென்சார் போர்டின் மறுஆய்வுக் குழுவில் படம் இருந்து வந்தது. தேர்தல் நடத்தை விதிகளும் அமலுக்கு வந்ததால் படம் மே மாதம் முதலில் வெளியாகும் என கூறப்பட்டது. இந்த நிலையில் யாரும் எதிர்பாராத விதமாக சட்டவிரோதமாக ஜனநாயகன் படத்தின் சில காட்சிகள் இணையத்தில் வெளியானது.

உயர் நீதிமன்றத்தில் முறையீடு

முதலில் 5 நிமிட காட்சிகள் வெளியான நிலையில், சிறிது நேரம் கழித்து முழு படமும் ஹெச்டி தரத்தில் சட்டவிரோதமாக இணையத்தில் வெளியானது. இதனால் படக்குழுவினர் மிகுந்த அதிர்ச்சியடைந்தனர். திரை பிரபலங்கள், தயாரிப்பாளர்கள் சங்கமும் இந்த சம்பவத்திற்கு கண்டனம் தெரிவித்து இருந்தன. முழு படமும் வெளியான நிலையில் படக்குழு தரப்பில் போலீசில் புகார் அளிக்கப்பட்டது.

இது தொடர்பாக சைபர் கிரைம் போலீசார் விசாரணை மேற்கொண்டு வரும் நிலையில் இதுவரை 6 பேரை கைது செய்து விசாரணை நடத்தி வருகிறது. இந்த நிலையில் ஜனநாயகன் படம் சட்டவிரோதமாக இணையத்தில் லீக் ஆனது தொடர்பாக படக்குழு தரப்பில் சென்னை உயர் நீதிமன்றத்தில் முறையீடு செய்யப்பட்டுள்ளது. நீதிபதி செந்தில் குமார் ராமமூர்த்தி முன்பாக இந்த விவகாரம் தொடர்பாக முறையீடு செய்யப்பட்டு இருக்கிறது.

மனுதாக்கல் செய்யப்படுமா?

இதைக் கேட்ட நீதிபதி செந்தில்குமார் ராம மூர்த்தி, ஜனநாயகன் படம் லீக் தொடர்பாக முறையாக மனுவாக தாக்கல் செய்தால் விசாரணைக்கு எடுத்துக்கொள்ளப்படும் என்று கூறியுள்ளார். இதையடுத்து படக்குழுவும் மனுவாக தாக்கல் செய்ய உள்ளதாக கூறப்படுகிறது. இன்று படக்குழு மனு தாக்கல் செய்தால், இந்த மனு நாளை விசாரணைக்கு எடுத்துக்கொள்ளப்படும் என்று கூறப்படுகிறது.

English summary

Actor Vijay film Jana nayagan was illegally leaked online before its theatrical release, shocking the team. The makers have approached the Madras High Court, where Justice Senthilkumar Ramamoorthy said the case will be heard after a formal petition is filed.