நாளை "ஜனநாயகன்" மறு தணிக்கை.. முடிவுக்கு வரும் விஜய் பட பஞ்சாயத்து.. அப்போ இந்த மாதமே ரிலீஸா?

சென்னை: நடிகர் விஜய் நடிப்பில் உருவாகியுள்ள 'ஜன நாயகன்' சென்சார் பிரச்சனையால் ரிலீஸாகாமல் முடங்கியிருந்தது. இதற்கிடையே 'ஜன நாயகன்' படம் நாளை சென்சார் செய்யப்படவுள்ளதாகத் தகவல் வெளியாகியுள்ளது. எல்லாம் சமூகமாக முடிந்தால் 'ஜன நாயகன்' படம் இந்த மாதமே கூட ரிலீஸ் ஆகலாம் என்று சொல்லப்படுகிறது. இது விஜய் ரசிகர்களுக்கு மகிழ்ச்சியை ஏற்படுத்தியுள்ளது.

இயக்குநர் ஹெச். வினோத் இயக்கத்தில் நடிகர் விஜய் நடித்துள்ள படம் ஜனநாயகன்.. இந்த படம் கடந்த பொங்கலன்று ரிலீஸ் ஆவதாக இருந்தது. அரசியலில் நுழைந்துள்ள விஜய், இனிமேல் படத்தில் நடிக்க மாட்டேன் எனக் கூறிவிட்டதால் எதிர்பார்ப்பு எகிறியது. இருப்பினும், உரிய நேரத்தில் படம் சென்சார் ஆகாததால் பொங்கலுக்கு படம் ரிலீஸ் ஆகவில்லை.

சிக்கல்

படத்திற்கு பெரும் எதிர்பார்ப்பு நிலவி இருந்த சூழலில், படம் வெளியாகாமல் போனது கடும் ஏமாற்றத்தை ஏற்படுத்தியது. இந்த விவகாரத்தில் தயாரிப்பாளர் தரப்பு நீதிமன்றத்திலும் வழக்கு தொடர்ந்தது. உயர் நீதிமன்றம், உச்ச நீதிமன்றம் வரை வழக்கு சென்றது. இருந்தாலும் தயாரிப்பாளருக்குச் சாதகமாக எந்தவொரு முடிவும் வரவில்லை. நீதிமன்றத்தில் வழக்கு இருந்ததால் மறு தணிக்கை பிராசஸ் கூட தொடங்கவில்லை. இதனால் இழுபறியே நீடித்து வந்தது.

வாபஸ்

இந்தச் சூழலில் தான் கடந்த மாதம் வழக்கை வாபஸ் பெறுவதாக ஜனநாயகன் படத்தைத் தயாரித்த KVN புரொடக்‌ஷன்ஸ் தெரிவித்திருந்தது. மறு ஆய்வுக் குழுவை அணுகத் தயாரிப்பாளர் முடிவு செய்துள்ளதால் வழக்கை வாபஸ் பெறுவதாகத் தெரிவிக்கப்பட்டு இருந்தது. கடந்த மாதமே வாபஸ் பெற்றதால் அப்போதே படம் மறு தணிக்கை செய்யப்படலாம் என கூறப்பட்டது. இருப்பினும், மறு தணிக்கைக்கான எந்தவொரு பிராசஸும் நடக்கவில்லை. தேர்தல் அறிவிப்பு வந்துவிட்டால் படம் ரிலீஸ் ஆகாது என்பதில் இதில் குழப்பம் தொடர்ந்தது.

நாளை மறு சென்சார்

இதற்கிடையே 'ஜன நாயகன்' திரைப்படம், நாளை மார்ச் 9ம் தேதி மறு தணிக்கை செய்யப்படுவதாகத் தகவல் வெளியாகியுள்ளது. நாளை பிற்பகல் 2 மணிக்கு, மத்திய திரைப்படச் சான்றிதழ் வாரியத்தின் (CBFC) மறு ஆய்வுக் குழு முன்பு படம் திரையிடப்படும். சான்றிதழ் குறித்து இந்தக் குழு தேவையான முடிவெடுக்கும். எல்லாம் திட்டமிட்டபடி நடந்தால் ஜனநாயகன் படம் இந்த மாதமே கூட ரிலீஸ் ஆக வாய்ப்பு இருக்கிறது.

இருப்பினும், விஜய் அரசியலில் இருப்பதால் தேர்தல் அறிவிப்பை நாம் பார்க்க வேண்டும். ஏனென்றால் தேர்தல் அறிவிப்பு வந்த பிறகு, ஜனநாயகன் சென்சார் ஆகியிருந்தாலும் கூட தேர்தல் முடியும் வரை படத்தை ரிலீஸ் செய்ய அனுமதிக்க மாட்டார்கள். கடந்த காலங்களிலும் இதுபோன்ற சம்பவங்கள் நடந்துள்ளதால் மறு தணிக்கை எப்போது ஆகிறது.. சென்சார் சான்றிதழ் எப்போது கிடைக்கிறது.. தேர்தல் அறிவிப்பு எப்போது வருகிறது ஆகியவை முக்கியத்துவம் பெறுகிறது.

முக்கியம்

கேஜிஎஃப் புகழ் யாஷ் நடிக்கும் 'டாக்ஸிக்' ரிலீஸ் தேதி மாற்றப்பட்டுள்ளது. மார்ச் 19ம் தேதி வெளியாகவிருந்த இந்த படம், இப்போது ஜூன் 4ஆம் தேதிக்கு ஒத்திவைக்கப்பட்டுள்ளது. இது டாக்ஸிக் பட ரசிகர்களுக்கு ஏமாற்றம் என்றாலும் இந்த இடைவெளி 'ஜனநாயகன்' படத்திற்குத் தேவையான ஒரு வாய்ப்பாக அமைந்துள்ளது. எல்லாம் சரியாக நடந்தால் 'ஜனநாயகன்' திரைப்படம் போட்டி இல்லாமல் வெளிவந்து, வசூல் சாதனை படைக்கும்! நாளை மறு தணிக்கை வாரியம் இந்த படத்தில் என்ன முடிவை எடுக்கப் போகிறது என்பதே விஜய் ரசிகர்களின் எதிர்பார்ப்பாக இருக்கிறது.

English summary

Thalapathy Vijay's much-awaited 'Jana Nayagan' heads to CBFC Revising Committee on March 9(ஜனநாயகன் படத்தின் மறுதணிக்கை): Vijay Jana Nayagan Re-Censoring latest news in tamil.