10 சீட்டுகளை வெல்லும் தவெக.. 23.9 சதவிகித வாக்குகளை கைப்பற்றும் விஜய்.. லோக்போல் கருத்துக்கணிப்பு

சென்னை: தமிழக சட்டசபைத் தேர்தலில் விஜய்யின் தவெக 8 முதல் 10 தொகுதிகளில் வெல்வதற்கு வாய்ப்பு உள்ளதாக லோக்போல் (Lok Poll) நிறுவனம் கருத்துக் கணிப்பை வெளியிட்டுள்ளது. அதுமட்டுமல்லாமல் விஜய்யின் தவெக 23.9% வாக்குகளை பெறும் என்றும் கணிக்கப்பட்டுள்ளது. இது தவெக தொண்டர்கள் மத்தியில் உற்சாகத்தை ஏற்படுத்தி இருக்கிறது.

தமிழ்நாட்டில் சட்டசபைத் தேர்தல் ஏப்ரல் 23ஆம் தேதி நடைபெற உள்ளது. திமுக, அதிமுக உள்ளிட்ட கட்சிகள் கூட்டணி பேச்சுவார்த்தை, தொகுதி பங்கீடு, வேட்பாளர்கள் அறிவிப்பு உள்ளிட்டவற்றை முடித்து பிரச்சாரத்தை தொடங்கிவிட்டன. அதேபோல் விஜய்யின் தவெக மற்றும் நாம் தமிழர் கட்சி தனித்து போட்டியிடுகிறது. அத்தனை கட்சிகளும் வேட்பாளர்களை அறிவித்துவிட்ட சூழலில், தேர்தல் ஃபீவர் உச்சத்தில் இருக்கிறது.

இம்முறை விஜய் களமிறங்கி இருப்பதால், தேர்தல் யார் வெல்வார்கள் என்ற கேள்வி அனைவரிடமும் எழுந்துள்ளது. திமுக அல்லது அதிமுக ஆகிய கட்சிகளில் யாரின் வாக்குகளை விஜய் அதிகம் பிரிப்பார் என்றும் விவாதிக்கப்பட்டு வருகிறது. இந்த நிலையில் தேசிய அளவில் பிரபலமான கருத்துக்கணிப்பு நிறுவனமான லோக்போல் தனது கருத்துக் கணிப்பை வெளியிட்டுள்ளது.

ஒவ்வொரு தொகுதிக்கும் சுமார் 500 வாக்காளர்களிடம் கருத்துக்களை பெற்றுள்ள லோக்போல், மொத்தமாக 1.17 லட்சம் பேரிடம் கருத்துக்கணிப்பை எடுத்திருக்கிறது. அதன்படி திமுக கூட்டணி 181 முதல் 189 தொகுதிகளையும், சுமார் 40.1 சதவிகித வாக்குகளையும் கைப்பற்றும் என்று கணித்துள்ளது. அதேபோல் அதிமுக - பாஜக கூட்டணி 38 முதல் 42 சீட்டுகளை மட்டுமே பெறும் என்று கூறப்பட்டுள்ளது.

அதுமட்டுமல்லாமல் அதிமுக - பாஜக கூட்டணி 29% வாக்குகளை கைப்பற்றும் என்று சொல்லப்பட்டுள்ளது. அதேபோல் விஜய்யின் தவெக 8 முதல் 10 சீட்டுகள் வரை கைப்பற்ற வாய்ப்பு உள்ளதாகவும், சுமார் 23.9 சதவிகித வாக்குகளை பெறும் என்றும் கணிக்கப்பட்டுள்ளது. சீமானின் நாம் தமிழர் கட்சி ஒரு தொகுதியில் கூட வெல்லாது என்றும், 4.9 வாக்குகளை பெறும் என்றும் தெரிவிக்கப்பட்டுள்ளது.

மற்ற கட்சிகள் 2.1 சதவிகித வாக்குகளை பெறலாம் என்று கணிக்கப்பட்டுள்ளது. தவெக தலைவர் விஜய் முதல்முறையாக தேர்தலை சந்திக்க உள்ளார். முதல் தேர்தலிலேயே சுமார் 24% வாக்குகளை பெறுவார் என்று கணித்திருப்பது விவாதமாகி இருக்கிறது. இந்த கருத்துக்கணிப்பு தவெக தொண்டர்களிலேயே உற்சாகத்தை ஏற்படுத்தி இருக்கிறது.

English summary

Vijay: The polling agency Lokpoll has released an opinion survey suggesting that Vijay's TVK stands a chance of winning 8 to 10 constituencies in the Tamil Nadu Assembly elections. Furthermore, it has been projected that Vijay's TVK will secure 23.9% of the votes. This has generated a wave of enthusiasm among TVK cadres