விஜய்யை சந்திக்க முடியாமல் தவிக்கும் 4 அமைச்சர்கள்.. வெடித்த கூட்டணி அமைச்சர்களின் அப்செட்!
சென்னை: விஜய் கூட்டணி ஆட்சி அமைந்த 2 மாதங்களிலேயே, அமைச்சரவைக்குள் நிலவும் அதிகார போட்டி மற்றும் அதிருப்தி தொடர்பான செய்திகள் தலைமைச் செயலக வட்டாரங்களில் பெரும் புயலைக் கிளப்பியிருக்கின்றன.
தவெக தலைமையில் நடைபெற்று வரும் ஆட்சியில், அமைச்சரவையில் இடம்பெற்றுள்ள கூட்டணித் தோழமைக் கட்சிகளைச் சேர்ந்த நான்கு அமைச்சர்கள் மனக்கசப்பிலும் அதிருப்தியிலும் இருப்பதாகத் தகவல்கள் வெளியாகியுள்ளன.
அமைச்சரவையில் தங்களுக்கு உரிய மரியாதையோ அல்லது முக்கியத்துவமோ வழங்கப்படவில்லை என்ற குற்றச்சாட்டுதான் இந்த அதிருப்தியின் மையப்புள்ளியாகப் பார்க்கப்படுகிறது. இலாகா ரீதியான முடிவுகளை எடுப்பதிலும், நிர்வாக ரீதியான முக்கிய மாற்றங்களைச் செய்வதிலும் தங்களைக் கலந்தாலோசிப்பதே இல்லை என்ற ஆதங்கம் கூட்டணி அமைச்சர்களிடையே புகைந்துகொண்டிருக்கிறது.
அரசுத் திட்டங்கள், கொள்கை முடிவுகள் மற்றும் அதிகாரிகளின் நியமனங்கள் தொடர்பான அனைத்து நடைமுறைகளும் விஜய்யின் நேரடிக் கட்டுப்பாட்டிலும், அவருக்கு நெருக்கமான சில அதிகாரிகளின் வழிகாட்டுதலிலுமே எடுக்கப்படுவதாகக் கூறப்படுகிறது.
இதன் காரணமாக, பெயரளவிலேயே அமைச்சர்களாகத் தொடர்வதாக உணரும் அந்த நான்கு கூட்டணி அமைச்சர்களும் தங்களின் அதிருப்தியை நேரடியாக முதலமைச்சர் விஜய்யிடம் தெரிவித்து, நிலவும் சூழலுக்கு ஒரு தீர்வு காண முடிவெடுத்துள்ளனர்.
இதற்காக முதலமைச்சரை நேரில் சந்தித்துப் பேச பலமுறை நேரம் கோரப்பட்டதாகவும் செய்திகள் தெரிவிக்கின்றன. ஆனால், அவர்களின் இந்தச் சந்திப்பு கோரிக்கைக்கு இதுவரை முதலமைச்சர் அலுவலகத்திலிருந்து எந்தப் பதிலும் கிடைக்கவில்லை என்றும், அடுத்தடுத்து சந்திப்பதற்கான நேரம் மறுக்கப்பட்டு வருவதாகவும் தலைமைச் செயலக வட்டாரங்கள் தெரிவிக்கின்றன.
முதலமைச்சரைச் சந்திக்க முடியாமல் தொடர்ந்து காத்திருக்கும் சூழல், கூட்டணி அமைச்சர்களின் மன உளைச்சலை மேலும் அதிகரித்துள்ளது. "கூட்டணி ஆட்சியில் பங்கெடுத்திருந்தும், மக்கள் மன்றத்திலும் சரி, அரசு அதிகார அமைப்பிலும் சரி, எங்களின் சுயமரியாதையைக் காப்பாற்றிக் கொள்ள முடியாத சூழல் நிலவுகிறது. துறையின் முடிவுகளைக்கூட நாங்களாக சுயமாக எடுக்க முடிவதில்லை" என்று தங்களின் நெருங்கிய ஆதரவாளர்களிடம் அந்த அமைச்சர்கள் புலம்பி வருவதாகக் கூறப்படுகிறது.
முதலமைச்சர் அலுவலகத்தின் இந்த அணுகுமுறையால் அதிருப்தியில் உள்ள அமைச்சர்கள், அடுத்தகட்ட நடவடிக்கையாகத் தங்களது கட்சித் தலைமைகளின் கவனத்திற்குக் கொண்டு சென்று முறையிடத் திட்டமிட்டுள்ளனர். கூட்டணித் தலைவர்களுடனும் இது குறித்து ஆலோசனைகள் நடத்தப்பட்டு வருவதாகத் தெரிகிறது. அரசு அமைக்கப்பட்ட தொடக்கக் காலத்தில் நிலவிய இணக்கமான சூழல் தற்போது முற்றிலும் மாறிவிட்டதாகக் கருதப்படும் நிலையில், இந்த விவகாரம் கூட்டணிக்குள் விரிசலை ஏற்படுத்துமோ என்ற கேள்வியும் அரசியல் விமர்சகர்களிடையே எழுந்துள்ளது.
பொதுவாகக் கூட்டணி ஆட்சிகளில் அனைத்துத் தோழமைக் கட்சிகளையும் அரவணைத்துச் செல்வதுதான் ஆட்சியின் பலத்திற்கு வழிவகுக்கும். ஆனால், ஆட்சிப் பொறுப்பேற்ற குறுகிய காலத்திலேயே அமைச்சரவைக்குள் நிலவும் இந்தத் தொடர் அதிருப்தியும், முதல்வர் அலுவலகத்தின் மௌனமும் தமிழக அரசியல் களத்தில் பெரும் விவாதங்களை உருவாக்கத் தொடங்கியுள்ளது. கூட்டணி அமைச்சர்களின் கோரிக்கையை ஏற்று முதலமைச்சர் அவர்களைச் சந்திப்பாரா அல்லது இந்த போக்கால் கூட்டணிக்குள் மேலும் அரசியல் முரண்பாடுகள் வெடிக்குமா என்பதைப் பொறுத்திருந்துதான் பார்க்க வேண்டும்.
Click it and Unblock the Notifications
Sign in with Google
