முதல்வராக ஃபர்ஸ்ட் பர்த் டே.. நாளை சட்டசபையில் ’சம்பவம்’ செய்யும் விஜய்! மகளிருக்கு தான் சர்ப்ரைஸ்!
சென்னை: தமிழக அரசியலில் புதிய அத்தியாயத்தை எழுதிய தமிழக முதல்வர் விஜய், முதல்வராக பதவியேற்ற பிறகு கொண்டாடும் முதல் பிறந்தநாளை முன்னிட்டு நாளை முக்கிய அறிவிப்பு ஒன்றை வெளியிடலாம் என்ற எதிர்பார்ப்பு அரசியல் வட்டாரங்களில் அதிகரித்துள்ளது. குறிப்பாக பெண்களை மையமாகக் கொண்ட நலத்திட்டம் ஒன்றை அவர் அறிவிக்க வாய்ப்பு இருப்பதாக தகவல்கள் பரவி வருகின்றன. அது மாதம் 2500 ரூபாய் மகளிர் உரிமைத் தொகையா? அல்லது அனைத்து அரசு பேருந்துகளிலும் மகளிருக்கு விலையில்லா பேருந்து பயணமா? என எதிர்பார்ப்பு எழுந்துள்ளது.
தமிழ் சினிமாவின் முன்னணி நடிகராக இருந்து அரசியலுக்கு வந்த விஜய், தமிழக வெற்றிக் கழகம் என்ற கட்சியை தொடங்கி மிகக் குறுகிய காலத்திலேயே ஆட்சியை கைப்பற்றியுள்ளார். தேர்தல் பிரசார காலத்தில் அவர் அளித்த பல்வேறு வாக்குறுதிகளில் பெண்கள் நலன், இளைஞர் முன்னேற்றம், கல்வி மற்றும் வேலைவாய்ப்பு போன்றவை முக்கிய இடம் பெற்றிருந்தன.
கடந்த மே 10ஆம் தேதி முதல்வராக பதவியேற்ற விஜய், ஆட்சிப் பொறுப்பேற்ற முதல் நாளிலேயே சில முக்கிய கோப்புகளில் கையெழுத்திட்டு தேர்தல் வாக்குறுதிகளை நிறைவேற்றும் பணியை தொடங்கினார். அதில் மின்சார கட்டண சலுகை உள்ளிட்ட திட்டங்கள் முக்கிய கவனம் பெற்றன.
விஜய் பிறந்தநாள்
இதனால் தேர்தல் அறிக்கையில் இடம்பெற்ற மற்ற வாக்குறுதிகள் எப்போது நடைமுறைக்கு வரும் என்ற எதிர்பார்ப்பும் மக்களிடையே உருவாகியுள்ளது. இந்த நிலையில், நாளை தனது 52வது பிறந்தநாளை கொண்டாடும் விஜய், சட்டப்பேரவையிலேயே முக்கிய அறிவிப்பு ஒன்றை வெளியிடலாம் என கூறப்படுகிறது. குறிப்பாக மகளிரை நேரடியாக பயனடையச் செய்யும் திட்டம் அறிவிக்கப்படலாம் என்ற தகவல்கள் அரசியல் வட்டாரங்களில் பரவி வருகின்றன.
மகளிர் உரிமைத் தொகை
அதில் முக்கியமாக பேசப்படுவது மாதந்தோறும் ரூ.2,500 மகளிர் உரிமைத் தொகை திட்டம். தேர்தல் பிரசாரத்தின் போது பெண்களின் பொருளாதார சுயநிலையை மேம்படுத்தும் வகையில் பல்வேறு திட்டங்கள் குறித்து விஜய் பேசியிருந்தார். அதனைத் தொடர்ந்து, தற்போது தமிழக அரசின் முக்கிய நலத்திட்டமாக இந்த உரிமைத் தொகை அறிவிக்கப்படலாம் என்ற எதிர்பார்ப்பு நிலவுகிறது.
இலவச பேருந்து பயணம்
அதேநேரத்தில் மற்றொரு தரப்பினர், அனைத்து அரசு பேருந்துகளிலும் பெண்களுக்கு இலவச பயண வசதி அறிவிக்கப்படலாம் என கூறுகின்றனர். ஏற்கனவே பல மாநிலங்களில் பெண்களுக்கான இலவச பேருந்து பயண திட்டம் அமலில் உள்ள நிலையில், தமிழகத்திலும் அதுபோன்ற திட்டம் அறிமுகப்படுத்தப்பட்டால் அது மிகப்பெரிய தாக்கத்தை ஏற்படுத்தும் என கருதப்படுகிறது.
சட்டப்பேரவை நிகழ்வு
மகளிர் உரிமைத் தொகையா அல்லது இலவச பேருந்து பயண திட்டமா என்ற விவாதம் அரசியல் வட்டாரங்களில் தீவிரமாக நடந்து வருகிறது. இருப்பினும் இதுவரை அரசு தரப்பில் எந்த அதிகாரப்பூர்வ அறிவிப்பும் வெளியாகவில்லை. அதனால் நாளைய சட்டப்பேரவை நிகழ்வை அனைவரும் உன்னிப்பாக கவனித்து வருகின்றனர்.
நலத்திட்ட நிகழ்ச்சிகள்
முதல்வராக பதவியேற்ற பிறகு முதல் பிறந்தநாளை கொண்டாடும் விஜய்க்கு சட்டப்பேரவையிலும் சிறப்பு வாழ்த்துகள் தெரிவிக்கப்பட உள்ளதாக கூறப்படுகிறது. சபாநாயகர், அமைச்சர்கள், ஆளுங்கட்சி உறுப்பினர்கள் மட்டுமல்லாமல் எதிர்க்கட்சி உறுப்பினர்களும் வாழ்த்து தெரிவிக்க உள்ளனர். மறுபுறம், தமிழகம் முழுவதும் தமிழக வெற்றிக் கழக நிர்வாகிகள் பல்வேறு நலத்திட்ட நிகழ்ச்சிகளுக்கு ஏற்பாடு செய்துள்ளனர்.
மகளிர் நலத்திட்டம்
கோவில்களில் சிறப்பு வழிபாடு, அன்னதானம், ரத்ததான முகாம், மாணவர்களுக்கு கல்வி உதவித்தொகை வழங்குதல், ஏழை மக்களுக்கு நலத்திட்ட உதவிகள் வழங்குதல் உள்ளிட்ட நிகழ்ச்சிகள் நடைபெறவுள்ளன.
கட்சி தொடங்கி இரண்டு ஆண்டுகளுக்குள் ஆட்சியை கைப்பற்றிய விஜய், தற்போது தனது ஆட்சியின் ஆரம்பகட்டத்தில் உள்ளார். இந்த சூழலில் அவரது முதல் பிறந்தநாள் அரசியல் ரீதியாகவும் முக்கியத்துவம் வாய்ந்ததாக பார்க்கப்படுகிறது.
Click it and Unblock the Notifications
Sign in with Google