வேட்டையன் படம் பார்க்க தேவி தியேட்டருக்கு மாறுவேடத்தில் வந்த நடிகர் விஜய்! இது அந்த கெட்டப்பாச்சே!
சென்னை: சென்னை அண்ணா சாலையில் உள்ள தேவி திரையரங்கிற்கு நடிகர் விஜய் வேட்டையன் திரைப்படம் பார்ப்பதற்காக வந்த காட்சிகள் வைரலாகி வருகிறது.
நடிகர் ரஜினிகாந்த் நடித்த வேட்டையன் படம் இன்று திரையரங்குகளில் வெளியாகியுள்ளது. ஞானவேல் இயக்கியுள்ள இந்த படத்தில் ரஜினிக்கு ஜோடியாக மஞ்சு வாரியர் நடித்துள்ளார். இந்த படத்தில் பகத் பாசில், அமிதாப் பச்சன், அபிராமி, துஷாரா விஜயன், ரித்திகா சிங் உள்ளிட்டோர் நடித்துள்ளனர்.
இந்த படத்திற்கு அனிருத் இசையமைத்துள்ளார். இந்த படத்தில் மனசிலாயோ பாடல் படம் ரிலீஸுக்கு முன்பே பட்டித்தொட்டி எங்கும் பரவியது. இந்த பாடல் இல்லாத ரீல்ஸே இல்லை எனலாம். அது போல் இந்த பாடல் இல்லாமல் இந்த ஆண்டு புத்தாண்டு கொண்டாட்டமும் முடிவடையாது.
இந்த நிலையில் இன்று உலகமெங்கும் படம் வெளியான நிலையில் தியேட்டரின் முன்பு ரசிகர்கள் பட்டாசு வெடித்தும் இனிப்பு வழங்கியும் ரஜினியின் கட் அவுட்டிற்கு பாலாபிஷேகம் செய்தும் மகிழ்ச்சி அடைந்தனர். ரசிகர்கள் மட்டுமில்லாமல் திரை பிரபலங்களும் படத்தை பார்க்க ஆர்வம் காட்டி வருகிறார்கள்.
அந்த வகையில் காலை 9 மணிக்கு வேட்டையன் படத்தின் முதல் காட்சி சென்னையில் உள்ள ரோகிணி தியேட்டரில் தனுஷ் கண்டு களித்தார். அது போல் இசையமைப்பாளர் அனிருத்தும் தனுஷுடன் படம் பார்த்தார். இந்த நிலையில் நடிகரும் தமிழக வெற்றிக் கழகத்தின் தலைவரும் வேட்டையன் படத்தை பார்த்தார்.
அவர் அண்ணா சாலையில் உள்ள தேவி தியேட்டரில் வேட்டையன் படத்தை கண்டு மகிழ்ந்தார். விஜய் தலையில் தொப்பி அணிந்து கொண்டு, முகத்தில் முகமூடி போட்டுக் கொண்டு வந்திருந்தார். அவர் சினிமா பார்த்துவிட்டு காரில் ஏறிச் சென்ற காட்சிகள் வைரலாகி வருகிறது.
இதே போல் கடந்த 2016 ஆம் ஆண்டு நடந்த ஜல்லிக்கட்டுவுக்கு ஆதரவான போராட்டத்தின் போதும் மெரினாவில் மக்களோடு மக்களாக கலந்து கொண்டு போராட்டத்திற்கு ஆதரவு தெரிவித்தார். இதே போல் முகத்தை கைக்குட்டையால் மூடியவாறு அவர் வந்திருந்தார். ஆனால் அப்போது தொப்பி அணிந்திருக்கவில்லை என்பது குறிப்பிடத்தக்கது.
Click it and Unblock the Notifications
Sign in with Google