பிரச்சார வாகனத்தில் இருந்து திடீரென சைக்கிளுக்கு தாவிய விஜய்.. காரைக்குடியில் சூழ்ந்த தவெகவினர்!

சிவகங்கை: காரைக்குடியில் தேர்தல் பிரச்சாரம் மேற்கொள்ள வந்துள்ள விஜய், திடீரென பிரச்சார வாகனத்தில் இருந்து இறங்கி சைக்கிளில் பயணித்து வருகிறார். தவெக தொண்டர்களின் கூட்ட நெரிசல் காரணமாக சைக்கிளும் ஓட்ட முடியாமல் தடுமாறி செல்லும் சூழல் உருவாகி இருக்கிறது. இதனால் அந்தப் பகுதியே பரபரப்புடன் காணப்படுகிறது.

தவெக தலைவர் விஜய் தேர்தல் பிரச்சாரத்திற்காக காரைக்குடிக்கு வந்துள்ளார். காரைக்குடியில் சிவகங்கை மாவட்டத்தைச் சேர்ந்த 4 வேட்பாளர்களுக்கும் ஆதரவாக விஜய் வாக்கு சேகரிக்கிறார். இதற்காக காலையிலேயே சென்னையில் இருந்து தனி விமானம் மூலமாக மதுரை வந்த விஜய், அங்கிருந்து பிரச்சாரம் வாகனம் மூலமாக காரைக்குடிக்கு பயணம் மேற்கொண்டுள்ளார்.

ஆனால் எதிர்பாராத வகையில் மதுரையில் இருந்தே விஜய்யை வரவேற்க தவெகவினர் பலரும் திரண்டனர். இதனால் சுமார் 100 கிமீ தொலைவை விஜய் சுமார் 4 மணி நேரமாக கடக்க வேண்டிய சூழல் ஏற்பட்டது. அதேபோல் பிரச்சார வாகனத்தின் மேல் நின்று மக்களுக்கு வணக்கம் கூறியபடியே விஜய் பயணித்தார். விஜய் வாகனத்தின் முன்பும், பின்பும் அதிகளவில் தொண்டர்கள் திரண்டனர்.

ஒரு கட்டத்தில் பிரச்சார வாகனம் ஆமை வேகத்தில் பயணிக்க வேண்டிய சூழல் உருவாகியது. அப்போது திடீரென விஜய்க்கு தயாராக வைக்கப்பட்டிருந்த சைக்கிள் ஒன்றில் ஏறி பயணிக்க தொடங்கினார். அப்போது தவெக தொண்டர்கள் பலரும் விஜய்யை சூழ்ந்து கொண்டனர். ஒரு கட்டத்தில் சைக்கிளையும் ஓட்ட முடியாமல் விஜய் தடுமாறினார்.

இதனால் காரைக்குடி பகுதியே பரபரப்பாகியது. முன்னதாக 2021 சட்டசபைத் தேர்தலின் போது விஜய் வாக்கு செலுத்த சென்ற போது சைக்கிளில் பயணம் மேற்கொண்டார். தற்போது 2026 சட்டசபைத் தேர்தலில் வாக்கு சேகரிக்க வரும் போது சைக்கிளில் பயணித்திருக்கிறார். இதையடுத்து விஜய் சைக்கிள் ஓட்டும் வீடியோவும், சைக்கிள் ஓட்ட முடியாமல் தடுமாறிய வீடியோவும் சோசியல் மீடியாவில் டிரெண்டாகி வருகிறது.

தொடர்ந்து மீண்டும் பிரச்சார வாகனத்தில் ஏறிய விஜய், காரைக்குடிக்கு வந்து சேர்ந்தார். விஜய்க்கு பிற்பகல் 2.30 மணி வரை மட்டுமே தேர்தல் பிரச்சாரம் செய்ய அனுமதி அளிக்கப்பட்டது. இதன் காரணமாக விஜய் காரைக்குடியில் பேசாமல் அங்கிருந்து புறப்பட்டு சென்றார். இது தவெக தொண்டர்களிடையே ஏமாற்றத்தை ஏற்படுத்தி இருக்கிறது.

English summary

Vijay: Vijay, who has arrived in Karaikudi to conduct his election campaign, suddenly disembarked from his campaign vehicle and began traveling by bicycle. However, due to the dense crowds of TVK cadres, a chaotic situation has arisen where he is struggling to even ride the bicycle.