இன்னும் 3 மாநாடு நடத்தினால் போதும்.. விஜய் காலி பெருங்காய டப்பாவாகிவிடுவார்.. அட்டாக் மோடில் திமுக

Updated: Tuesday, August 26, 2025, 19:55 [IST]

Subscribe to Oneindia Tamil

சென்னை: விஜய் இன்னும் 2 அல்லது 3 மாநாடுகளை நடத்தினாலே, காலி பெருங்காய டப்பாவாக மாறிவிடுவார் என்று அமைச்சர் சேகர்பாபு விமர்சித்துள்ளார். முதல்வர் ஸ்டாலின் தரம் தாழ்ந்து விமர்சிக்கும் விஜயின் உயரம் அவ்வளவுதான் என்று கூறிய சேகர்பாபு, ராஜா வேஷம் கலைந்து போய்விட்டதாகவும் விமர்சித்துள்ளார்.

மதுரையில் நடந்த தவெக 2வது மாநில மாநாடு தவெகவுக்கு வெற்றிகரமாக அமைந்தாலும், பெரியளவில் தாக்கத்தை ஏற்படுத்தவில்லை. தவெகவில் 2ஆம் கட்டத் தலைவர்கள் இல்லாததை விஜய்யே வெளிச்சம் போட்டு காட்டிவிட்டு சென்றார். 234 தொகுதிகளிலும் தனது முகத்திற்காக வாக்கு போட வேண்டும் என்று கேட்ட விஜய், திமுகவை கடுமையாக விமர்சித்தார்.

ஆனால் தூய்மைப் பணியாளர்கள் விவகாரம், தேசிய அளவிலான தேர்தல் ஆணையம் மீதான குற்றச்சாட்டு, ஆணவக் கொலைக்கு எதிரான தனிச்சட்டம் உள்ளிட்ட எந்தவித பிரச்சனைகளையும் விஜய் பேசவில்லை. வழக்கம் போல் வாரிசு அரசியல், திமுக மீதான ஊழல் குற்றச்சாட்டு உள்ளிட்டவை குறித்து மட்டுமே பேசினார். அதேபோல் முதல்வர் ஸ்டாலினை அங்கிள் என்றும் அழைத்து சர்ச்சையில் சிக்கினார்.

இதனைத் தொடர்ந்து அமைச்சர்கள் விஜய்க்கு பதிலடி கொடுத்து வருகின்றனர். அந்த வகையில் அமைச்சர் சேகர்பாபு செய்தியாளர்களை சந்தித்து பேசுகையில், தமிழக வெற்றிக் கழகத் தலைவர் விஜய் இதுவரை 2 மாநாடு முடித்துள்ளார். இப்போதே நரியின் சாயம் வெளுத்து போச்சு டும் டும் டும் டும்.. ராஜா வேஷம் கலைந்து போச்சு டும் டும் டும் டும் என்பதை போல் அனைத்து தரப்பு விமர்சனங்களையும் தாங்கி சென்றுள்ளார்.

இன்று அனைவரும் விமர்சனம் வைக்கும் அளவிற்கும் விஜய் தள்ளி வைக்கப்பட்டுள்ளார். விஜய் இன்னும் 2, 3 மாநாடு நடத்தினால் காலி பெருங்காய டப்பாவாகிவிடுவார். ஸ்டாலினை அங்கிள் என்று அழைத்ததன் மூலமாக, அவரின் உயரம் அவ்வளவு தான் என்று தெரியப்படுத்திவிட்டார். திராவிட மாடல் அரசு மத்திய அரசுக்கு மட்டுமல்லாமல் உலகத்திற்காது.

அதனால் விஜயின் சிறுபிள்ளைத்தனமாக பேச்சிற்கு எல்லாம் பதில் சொல்லி எங்களின் நேரத்தை வீணடிக்க விரும்பவில்லை. 2026ஆம் ஆண்டு களத்தில் நோக்கி திமுக சென்று கொண்டுள்ளது. இப்படி சிறுபிள்ளைத்தனமாக பேசுபவரை களத்தில் சந்திப்போம். 200 தொகுதிகளில் திமுக வெற்றி பெறும். அந்த வெற்றியை முதல்வர் ஸ்டாலினின் கரங்களில் ஒப்படைப்போம் என்று தெரிவித்தார்.