விஜய்யை எதிர்த்து.. பெரம்பூரில் களமிறங்கும் பாமகவின் திலகபாமா! அன்புமணியின் மூவ்!

சென்னை: பெரம்பூர் சட்டமன்ற தொகுதியில், தமிழக வெற்றிக் கழகத்தின் தலைவர் விஜய் களமிறங்கியிருக்கிறார். அவரை எதிர்த்து, பாட்டாளி மக்கள் கட்சியின் சார்பில் திலகபாமா போட்டியிடுவதாக அறிவிக்கப்பட்டிருக்கிறது.

விஜய் போட்டியிடுவதால் பெரம்பூர் ஸ்டார் தொகுதியாக மாறியிருக்கிறது. இந்நிலையில் திலகபாமா போட்டியிடுவதாக அறிவிக்கப்பட்டிருப்பதால் இந்த தொகுதி குறித்த எதிர்பார்ப்பு அதிகரித்திருக்கிறது.

பாமகவின் நிலைமை

அதிமுக தலைமையிலான என்டிஏ கூட்டணியில், அன்புமணி தலைமையிலான பாமகவுக்கு 18 தொகுதிகள் ஒதுக்கீடு செய்யப்பட்டிருந்தது. இந்த எண்ணிக்கை மிக குறைவுதான். குறிப்பாக கடந்த 33 ஆண்டுகளில் 20 தொகுதிகளுக்கும் கீழ் பாமக போட்டியிடுவது இதுவே முதல்முறை. இப்படி இருக்கையில் தற்போது அன்புமணி, கட்சியின் இரண்டாம் கட்ட வேட்பாளர்களை அறிவித்திருக்கிறார்.

பெரம்பூரில் திலகபாமா

இதில் தவெக தலைவர் விஜய் போட்டியிடும் பெரம்பூர் சட்டமன்ற தொகுதியில் பாமகவின் பொருளாளர் திலகபாமா வேட்பாளராக அறிவிக்கப்பட்டிருக்கிறார். இது குறித்து செய்தியாளர்களிடம் பேசிய அவர், "யாரையும் எதிர்த்து போட்டியிட இங்கு வரவில்லை. மக்களுக்காக பணி செய்ய வந்திருக்கிறேன்" என்று கூறியிருக்கிறார். இவர் திண்டுக்கல் மாவட்டத்தை சேர்ந்தவராக இருந்தாலும், கட்சியின் முன்னணி நிர்வாகி என்பதன் அடிப்படையில் தற்போது பெரம்பூரில் களமிறக்கப்பட்டிருக்கிறார்.

விஜய் vs என்டிஏ

விஜய்யை பொறுத்தவரை, தொடக்கத்தில் அதிமுக கூட்டணிக்குள் அவரை இழுத்துவிடலாம் என்று எடப்பாடி பழனிசாமி கணக்கு போட்டியிருந்தார். எனவே விஜய்யை பெரிய அளவில் அதிமுக விமர்சிக்கவில்லை. ஆனால், கடைசியில் கூட்டணி கணக்கு பொய்த்து போனது. எனவே விஜய் மீது சரமாரியான விமர்சனங்களை அதிமுகவினர் அடுக்க தொடங்கினர். தவெகவை தோற்கடிக்க வேண்டும் என்று உறுதியாக சொல்லி வந்தனர்.

எடப்பாடியின் நகர்வு

ஆனால், தொகுதி பங்கீடு என்று வருந்த போது, பெரம்பூரில் விஜய் போட்டியிடுவார் என்று தெரிந்து.. நைஸாக அந்த தொகுதியை கூட்டணி தலையில் கட்டிவிட்டார் எடப்பாடி பழனிசாமி. ஆனால், திமுக இதில் உறுதியாக இருந்தது. பெரம்பூரை சிபிஎம் கேட்டபோது, அதெல்லாம் முடியாது.. விஜய்யை எங்கள் சின்னத்தில்தான் தோற்கடிப்போம் என்று கூறி, பெரம்பூரில் திமுக போட்டியிடுவதாக அறிவித்தது.

விஜய் vs திலகபாமா

இப்படி இருக்கையில் அதிமுக கூட்டணியில் பெரம்பூர் தொகுதியை வாங்கிய பாமக தற்போது வேட்பாளரை அறிவித்திருக்கிறது. திலகபாமா தவெகவில் முக்கிய புள்ளிதான். ஆனால், விஜய்யை எதிர்கொண்டு தோற்கடிக்கும் அளவுக்கு முக்கிய புள்ளியா என்பது சந்தேகம்தான் அரசியல் விமர்சகர்கள் கூறி வருகின்றனர்.

English summary

Vijay, the leader of the Tamilaga Vettri Kazhagam, has entered the fray in the Perambur Assembly constituency. It has been announced that Thilagabama will contest against him on behalf of the Pattali Makkal Katchi.