பெரம்பூர் தொகுதி.. விஜய்யை எதிர்க்க தயாராகும் ஆளூர் ஷா நவாஸ்? சென்னையில் களமிறங்கும் விசிக!
சென்னை: தவெக தலைவர் விஜய் போட்டியிடுவதாக சொல்லப்படும் பெரம்பூர் தொகுதியில் விசிக எம்எல்ஏ ஆளூர் ஷா நவாஸ் போட்டியிடக் கூடும் என்று விவரம் அறிந்தவர்கள் கூறுகின்றனர். சென்னையில் பெரம்பூர், ஆர்கே நகர் மற்றும் ராயபுரம் ஆகிய 3 தொகுதிகளில் ஒன்றை விசிகவுக்கு கொடுக்க திமுக முன் வந்துள்ளதாகவும் சொல்லப்படுகிறது.
சட்டசபைத் தேர்தலில் தவெக தலைவர் விஜய் பெரம்பூர் தொகுதியில் போட்டியிடக் கூடும் என்று தெரிகிறது. விஜய் பெரம்பூர் தொகுதியில் போட்டியிட வேண்டும் என்று சில நாட்களுக்கு முன்பாக தவெக தேர்தல் மேலாண்மை பொதுச்செயலாளர் ஆதவ் அர்ஜுனா தீர்மானம் நிறைவேற்றி இருந்தார். சென்னை மாவட்ட தேர்தல் பொறுப்பாளராக ஆதவ் அர்ஜுனா இருப்பதால், விஜய் அங்கு போட்டியிட அதிக வாய்ப்பு உள்ளது.
இந்த நிலையில் தவெக தலைவர் விஜய்யை எதிர்த்து பெரம்பூர் தொகுதியில் போட்டியிட விசிக துணை பொதுச்செயலாளர் ஆளூர் ஷாநவாஸ் தயாராகி வருவதாக சொல்லப்படுகிறது. கடந்த சட்டசபைத் தேர்தலில் விசிகவுக்கு 6 தொகுதிகள் ஒதுக்கப்பட்டு, 4ல் வென்றது. அதில் ஆளூர் ஷா நவாஸ் நாகை தொகுதியில் போட்டியிட்டு வென்றார்.
ஆனால் இம்முறை திமுக கூட்டணியில் ஏராளமான கட்சிகள் இணைந்திருக்கின்றன. இதனால் கடந்த முறை கூட்டணி கட்சிகள் போட்டியிட்ட தொகுதிகள் மாற்றப்படலாம் என்று சொல்லப்படுகிறது. குறிப்பாக விசிக போட்டியிட்ட நாகை மற்றும் திருப்போரூர் தொகுதிகளில் வேறு கட்சிகள் போட்டியிடலாம் என்று சொல்லப்படுகிறது. நாகையில் திமுக நேரடியாக களமிறங்க முடிவு செய்துள்ளதாக தெரிகிறது.
அதற்கு பதிலாக தலைநகரில் ஒரு தொகுதிகளை ஒதுக்க திமுக தலைமை முன் வந்துள்ளதாக தெரிகிறது. அதன்படி ராயபுரம், ஆர்கே நகர் மற்றும் பெரம்பூர் ஆகிய 3 தொகுதிகளில் ஒன்றை விசிகவுக்கு ஒதுக்க திமுக தலைமை முன் வந்திருக்கிறது. இந்த 3 தொகுதிகளில் சிறுபான்மை சமூக மக்கள் அதிகளவில் இருக்கின்றனர். விஜய் இங்கு போட்டியிட வாய்ப்பு இருப்பதாக சொல்லப்படுவதற்கு இதுவும் ஒரு வலுவான காரணம்.
கடந்த முறை ராயபுரம் தொகுதியில் ஜெயக்குமார் தோல்வி அடைய காரணமும் சிறுபான்மை சமூக வாக்குகள் தான். இதில் பெரம்பூர் அல்லது ராயபுரம் ஒதுக்கப்பட்டால் ஆளூர் ஷா நவாஸும், ஆர்கே நகர் தொகுதி அளிக்கப்பட்டால் விசிக வழக்கறிஞர் எழில் கரோலினும் போட்டியிடலாம் என்று கணிக்கப்படுகிறது. ஆனால் விஜய் பெரம்பூர் தொகுதியில் போட்டியிட்டால் திமுக நேரடியாக களமிறங்கும் என்று சொல்லப்படுகிறது.
Click it and Unblock the Notifications
Sign in with Google