"விஜய் 2026 தேர்தலில் நிச்சயம் தாக்கத்தை ஏற்படுத்துவார்! ஆனால்...” ட்விஸ்ட் கொடுத்த அண்ணாமலை
சென்னை: பாஜக மாநிலத் தலைவர் அண்ணாமலை இன்று செய்தியாளர்களைச் சந்தித்தார். அப்போது பாஜக உட்கட்சிப் பூசல் புகார் தொடங்கி பல்வேறு விஷயங்கள் குறித்தும் அவர் விளக்கமளித்தார். அப்போது விஜய் அரசியல் தொடர்பாகச் சில கேள்விகள் எழுப்பப்பட்ட நிலையில், விஜய் நிச்சயம் 2026 தேர்தலில் தாக்கத்தை ஏற்படுத்துவார் என்று அண்ணாமலை குறிப்பிட்டார்.
தமிழ்நாடு அரசியலில் இப்போது பரபரப்பான சூழல் நிலவி வருகிறது. 2026க்கான கூட்டணி குறித்த கணக்குகள் இப்போதே மாறி வருகின்றன. குறிப்பாக அதிமுக பாஜக கூட்டணி அமைந்த பிறகு கூட்டணியில் பல மாற்றங்கள் நடந்து வருகின்றன. ஏற்கனவே ஓபிஎஸ் பாஜக கூட்டணியில் இருந்து வெளியேறிவிட்ட நிலையில், டிடிவி தினகரனும் கூட்டணியில் இருந்து விலகுவதாக அறிவித்தார்.
இதற்கிடையே செய்தியாளர்களிடம் பேசிய அண்ணாமலை சில முக்கிய தகவல்களைத் தெரிவித்தார். கூட்டணியில் இருந்து பிரிந்து சென்றுள்ள ஓபிஎஸ் மற்றும் டிடிவி தினகரனுக்கு அவர் அழைப்பு விடுத்தார். மேலும், விஜய் அரசியல் தொடர்பாகக் கேட்கப்பட்ட கேள்விக்கும் அண்ணாமலை மிக விரிவான விளக்கத்தைக் கொடுத்தார்.
செய்தியாளர்களிடம் அண்ணாமலை மேலும் பேசுகையில், "2026ல் விஜய் எதாவது தாக்கத்தை ஏற்படுத்துவாரா என்றால் நிச்சயம் தாக்கத்தை ஏற்படுத்துவார். அதில் மாற்றுக் கருத்தே இல்லை. ஏனென்றால் புதியவர்களுக்கு எப்போதுமே வாய்ப்பைத் தரும் மாநிலமாகத் தமிழ்நாடு இருக்கிறது. மாற்றம் வேண்டும் என நினைக்கும் 10% மக்கள் எப்போதுமே புதியவர்களுக்கு வாக்களிக்கிறார்கள். மாற்றத்தை பற்றிப் பேசுவோருக்கு அனைவருக்கும் தமிழக மக்கள் மரியாதை தருவார்கள்.
ஆனால், இங்குக் கேள்வி யார் ஆட்சியை அமைப்பார்கள் என்பது தான். ஏனென்றால் அரசியலில் தாக்கத்தை ஏற்படுத்துவாரா இல்லை என்பது வேறு.. யார் ஆட்சியைப் பிடிக்கிறார்கள் என்பது வேறு! இரண்டிற்கும் வித்தியாசம் இருக்கிறது. விஜய்யை பொறுத்தவரை அவர் பெரிய நடிகர். அவருக்கென மிகப் பெரிய ரசிகர் பட்டாளம் இருக்கிறது. சினிமாவில் உச்சத்தில் இருந்து அரசியலுக்கு வந்துள்ளதாக அவரே சொல்கிறார்.
அவர் அரசியலில் தாக்கத்தை ஏற்படுத்துவாரா என்றால் நிச்சயம் ஏற்படுத்துவார். அதேநேரம் எங்களுடைய பாஜகவின் என்டிஏ கூட்டணி ஆட்சியை அமைக்கும் அதுவே எனது நம்பிக்கை" என்று அவர் தெரிவித்தார்.
Click it and Unblock the Notifications
Sign in with Google