ஆதவ் அர்ஜுனாவுக்கு பெரிய ஷாக்.. வில்லிவாக்கத்தை மிஸ் செய்யும் தவெக! வெளியான கருத்துக்கணிப்பு

Published: Monday, April 20, 2026, 23:10 [IST]

Subscribe to Oneindia Tamil

சென்னை: வில்லிவாக்கம் சட்டமன்ற தொகுதியில், தமிழக வெற்றிக் கழகத்தின் சார்பில் ஆதவ் அர்ஜுனா களமிறங்கியிருக்கும் நிலையில், அவருக்கான வெற்றி வாய்ப்பு குறித்து கருத்துக்கணிப்புகள் வெளியாகியுள்ளன.

மின்னம்பலம் செய்தி ஊடகம், தமிழ்நாடு முழுவதும் தொகுதி வாரியாக வெற்றி, தோல்வி குறித்து கருத்துக்கணிப்புகளை மேற்கொண்டிருந்தது. இந்நிலையில், வில்லிவாக்கத்தில் யாருக்கு வெற்றி என்பது குறித்தும் கணிப்பை வெளியிட்டிருக்கிறது.

வில்லிவாக்கம் தொகுதி தற்போது திராவிட முன்னேற்றக் கழகத்தின் வசமுள்ளது. 2021 சட்டமன்றத் தேர்தலில் திமுக வேட்பாளர் ஏ. வெற்றி அழகன், அதிமுக கூட்டணி வேட்பாளர் ஜே.சி.டி. பிரபாகரனை சுமார் 37,000 வாக்குகள் வித்தியாசத்தில் தோற்கடித்து வெற்றி பெற்றார்.

இந்தத் தொகுதியில் நீண்டகாலமாக பல்வேறு பிரச்சனைகள் இருக்கின்றன. இதற்கு தீர்வு காண வேண்டும் என்று மக்கள் தொடர்ந்து வலியுறுத்தி வருகின்றனர். குறிப்பாக வில்லிவாக்கம் மார்க்கெட் மற்றும் பேருந்து நிலையம் பகுதிகளில் நிலவும் கடும் போக்குவரத்து நெரிசல் ஒரு தீராத குறையாகவே பார்க்கப்படுகிறது.

அதேபோல கடந்த சில ஆண்டுகளில் பல மேம்பாடுகள் செய்யப்பட்டிருந்தாலும், தாழ்வான பகுதிகளில் மழைக்காலங்களில் நீர் தேங்கும் பிரச்சினை இன்னும் முழுமையாக தீரவில்லை. சிட்கோ பகுதியில் உள்ள சிறு மற்றும் குறு தொழிலாளர்களின் நலன் சார்ந்த கோரிக்கைகளும், உள்கட்டமைப்பு மேம்பாடுகளும் முக்கியமானவை.

அதேநேரம், ஆளும் கட்சி தரப்பில் கொண்டுவரப்பட்ட பல திட்டங்கள் மக்கள் மத்தியில் கவனம் பெற்றிருக்கின்றன. வில்லிவாக்கம் பகுதிக்கு மெட்ரோ நிலையம் வர இருப்பது, இப்பகுதி மக்களிடையே பெரிய நிம்மதியை ஏற்படுத்தியிருக்கிறது.

இந்தமுறை தொகுதியில் திமுக சார்பில் கார்த்திக் மோகன், தவெக சார்பில் ஆதவ் அர்ஜுனா, அதிமுக சார்பில் எஸ்.ஆர்.விஜயகுமார், நாதக சார்பில் ரோஷினி களமிறங்கியிருக்கின்றனர். இந்நிலையில் இதில் யாருக்கு வெற்றி வாய்ப்பு இருக்கிறது என்பது குறித்த கணிப்பை 'மின்னம்பலம்' செய்தி ஊடகம் வெளியிட்டிருக்கிறது.

திமுக கூட்டணி - 41%
அதிமுக கூட்டணி - 24%
தவெக - 26%
நாதக - 6%

என கணிப்பு வெளியிடப்பட்டிருக்கிறது.

Published On April 20, 2026