Vishal Sai: விஷால் வீட்டில் சாய் தன்ஷிகாவுடன் நிச்சயதார்த்தம்! தடபுடல் விருந்தும் ரெடி!

Updated: Friday, August 29, 2025, 14:35 [IST]

Subscribe to Oneindia Tamil

சென்னை: விஷால்- சாய் தன்ஷிகாவின் நிச்சயதார்த்தம், அவருடைய அண்ணா நகர் இல்லத்தில் எளிமையாக நடந்து முடிந்தது. இருவரும் நெருங்கிய உறவினர்கள் மத்தியில் மோதிரம் மாற்றிக் கொண்டனர். இதையடுத்து இவர்களுக்கு ரசிகர்களும் திரை பிரபலங்களும் வாழ்த்துகளை தெரிவித்து வருகிறார்கள்.

'செல்லமே' படத்தின் மூலம் 2004 ஆம் ஆண்டு அறிமுகமானவர் விஷால். இவர் 'சண்டகோழி', 'திமிரு', 'சிவப்பதிகாரம்', 'தாமிரபரணி', 'மலைக்கோட்டை', 'சத்யம்', 'தோரணை', 'தீராத விளையாட்டு பிள்ளை', 'அவன் இவன்', 'தீயா வேலை செய்யணும் குமாரு', 'பட்டத்து யானை', 'பாண்டியநாடு', 'நான் சிகப்பு மனிதன்', 'பூஜை', 'ஆம்பள', 'பாயும் புலி' உள்ளிட்ட படங்களில் நடித்துள்ளார்.

கடந்த 2013 ஆம் ஆண்டு எடுக்கப்பட்ட மதகஜராஜா படம் தற்போது 12 ஆண்டுகளுக்கு பிறகு ரிலீஸானது. இந்த நிலையில் ஆர்.பி சவுத்ரி தயாரிப்பில் மகுடம் என்ற படத்தில் விஷால் நடித்து வருகிறார். இது அவரது 35 ஆவது படமாகும்.

48 வயதாகும் விஷாலுக்கு எப்போது திருமணம் என்ற கேள்வி எழுந்த போது நடிகர் சங்க கட்டடம் கட்டி முடித்தால்தான் திருமணம் என தெரிவித்து வந்தார். இந்த நிலையில் சென்னையில் யோகி பட விழாவில் கலந்து கொண்ட அவர், அந்த படத்தின் ஹீரோயின் சாய் தன்ஷிகாவை காதலிப்பதாகவும் இருவருக்கும் ஆகஸ்ட் 29ஆம் தேதி திருமணம் என்றும் தெரிவித்திருந்தார்.

ஆனால் இந்த திருமண தேதி நெருங்க நெருங்க இருவரும் எந்த ஏற்பாடுகளையும் செய்ததாக தெரியவில்லை. இந்த நிலையில் இன்றைய தினம் அவருக்கு திருமணம் நடக்கவில்லை என தெரியவந்தது. இதனால் ரசிகர்கள் அதிர்ச்சி அடைந்தனர்.

இதுகுறித்து விஷால் தரப்பு கூறுகையில், நடிகர் சங்கம் கட்டும் பணியில் குறைந்தபட்சம் சில பணிகள் உள்ளன. அவற்றை முடித்துவிட்டு அங்கு திருமணம் செய்து கொள்வார். அதற்கான தேதியை பிறகு அறிவிப்பார் என்றனர்.

அது போல் இன்று விஷாலுக்கு பிறந்தநாள். இதையொட்டி ஆதரவற்றோர் இல்லத்தில் நலத்திட்ட உதவிகளை வழங்கிய விஷால் செய்தியாளர்களை சந்தித்தார். அப்போது அவர் "இன்று பிற்பகலில் முக்கிய அறிவிப்பை வெளியிடுவேன். என் திருமணம் இந்த ஆண்டுக்குள் நடக்கும்" என்றார்.

இந்த நிலையில் சென்னை அண்ணாநகரில் உள்ள விஷால் இல்லத்தில் தன்ஷிகாவுடன் திருமண நிச்சயதார்த்தம் நடந்தது. இது எளிமையாக நடந்தது. இரு வீட்டார், உறவினர்கள், நண்பர்கள் மட்டுமே கலந்து கொண்டனர். நிச்சயதார்த்தம் முடிந்ததும் தடபுடல் விருந்துக்கும் ஏற்பாடு செய்யப்பட்டுள்ளது. மேலும் விஷால்- சாய் தன்ஷிகா நிச்சயதார்த்த புகைப்படங்கள் சமூகவலைதளங்களில் வைரலாகி வருகிறது.