ஜனநாயகன் படம் தியேட்டரில் வெளியாகணும்! ஓடிடி, சாட்டிலைட்டில் ரிலீஸானாலும் ரசிப்போம்! விஷால்
சென்னை: நடிகர் விஜய்யின் ஜனநாயகன் திரைப்படம் ஓடிடி , சாட்டிலைட் தளங்களில் வெளியானாலும் ரசிகர்களாகிய நாங்கள் விசிலடித்து மகிழ்வோம் என நடிகர் விஷால் தெரிவித்துள்ளார்.
நடிகர் விஜய்யின் "ஜனநாயகன்" திரைப்படத்தின் காட்சிகள் கசிந்து இணையத்தில் வெளியானதால், ரசிகர்கள் மத்தியில் பெரும் ஏமாற்றமும் வருத்தமும் நிலவுகிறது. படக்குழுவினரின் கடின உழைப்பும் அர்ப்பணிப்பும் வீணடிக்கப்படுவது குறித்து பலரும் ஆழ்ந்த கவலையை வெளிப்படுத்தியுள்ளனர்.
கடந்த இருபது ஆண்டுகளுக்கும் மேலாக விஜய்யின் தீவிர ரசிகரான நானும் அவரது பிற ரசிகர்களும், திரையரங்குகளில் அவரது படங்களை கண்டு, ஆரவாரம் செய்து கொண்டாடி வந்துள்ளோம்.
"ஜனநாயகன்" நேரடியாக OTT அல்லது செயற்கைக்கோள் தொலைக்காட்சியில் வெளியானாலும், அதே உற்சாகத்துடன் வீடுகளுக்குள்ளேயே ரசிப்போம். அப்போது ஒரே ஒரு வித்தியாசம்தான் இருக்கும்-திரையரங்கிற்குப் பதில் எங்கள் வீட்டிற்குள்ளேயே எங்களது பிரியமான நடிகருக்காக விசில் அடிப்போம்.
தயாரிப்புத் தரப்புக்கு இது ஒரு கடினமான பொருளாதார முடிவு என்பதை நாங்கள் உணர்கிறோம். மேலும், திரைப்படம் சர்ச்சைக்குரியதாகத் தோன்றாவிட்டாலும், தணிக்கை வாரியத்தின் முடிவுகளை மதிக்கிறோம். சட்டபூர்வமாக, 'ஜனநாயகன்' விரைவில் திரையரங்குகளில் வெளியாக வேண்டும் என்பதே எங்களின் ஒட்டுமொத்த எதிர்பார்ப்பு. நாங்கள் அனைவரும் உங்கள் திரைப்படத்தை விரைவில் சட்டப்பூர்வமாகப் பார்க்கக் கிடைக்கும் என்று நம்புகிறோம். இறைவன் உங்களை ஆசீர்வதிப்பாராக! என்றும் விஷால் தெரிவித்துள்ளார்.
நடிகர் விஜய் நடிப்பில் ஹெச் வினோத் இயக்கத்தில் கே வி என் ப்ரொடக்ஷன்ஸ் பட நிறுவனம் சார்பில் சுமார் 500 கோடி ரூபாய் பட்ஜெட்டில் பிரமாண்டமாக தயாரிக்கப்பட்ட ஜனநாயகன் படம் சென்சார் சிக்கல்களால் இன்றுவரை தணிக்கை சான்றிதழ் பெற முடியாமல் போராடிக் கொண்டிருக்கிறது.
இந்த நிலையில் நேற்றைய தினம் இந்த படத்தின் ஒரு குறிப்பிட்ட காட்சி வெளியான நிலையில் இன்று அதன் முழு படமும் எச்டி பிரிண்டில் வெளியாகியுள்ளது பலருக்கு அதிர்ச்சியை ஏற்படுத்தியுள்ளது.
இதுகுறித்து தயாரிப்பு நிறுவனமான கேவிஎன் புரொடெக்ஷன்ஸ் வெளியிட்டுள்ள அறிக்கையில் கூறியிருப்பதாவது: விஜயின் ஜனநாயகன் படம் சட்டவிரோதமாக இணையதளங்களில் முழுமையாக வெளியாகியுள்ளது.
மர்ம நபர்கள் சிலர் ஜனநாயகன் படத்தை பதிவிறக்கம் செய்து அதிக அளவில் பகிர்ந்து வருவது கண்டுபிடிக்கப்பட்டது. ஜனநாயகன் படத்தை பதிவிறக்கம் செய்பவர்கள் மற்றும் பகிர்வோர் மீது கிரிமினல் நடவடிக்கை எடுக்கப்படும்.
அது போல் படத்தை செல்போனில் வைத்திருப்பவர்கள், பார்ப்பவர்கள் மீதும் கிரிமினல் நடவடிக்கை எடுக்கப்படும். வாட்ஸ்ஆப், இன்ஸ்டா, டெலிகிராம் மூலம் ஜனநாயகன் படத்தை பகிர்வோரை கண்டுபிடிப்பது எளிது. சமூகவலைதளம் மூலம் வரும் ஜனநாயகன் படத்தை பகிரவோ, செல்போனில் சேமித்தோ வைக்க வேண்டாம். அப்படி வைத்திருந்தால் அதை பார்க்காமல் அழித்து விடுங்கள் என தயாரிப்பு நிறுவனம் தெரிவித்திருந்தது.
ஜனநாயகன் படத்திற்கு சென்சார் பிரச்சினை வந்த போதும் விஷால் கடுமையாக விமர்சித்திருந்தார் என்பது குறிப்பிடத்தக்கது.
Click it and Unblock the Notifications
Sign in with Google