இரவில் திடீர்னு குறைந்த பல்ஸ், பிபி! வென்டிலேட்டரில் இருந்த ஈவிகேஎஸ் இளங்கோவனுக்கு நடந்தது என்ன?

Updated: Saturday, December 14, 2024, 14:02 [IST]

Subscribe to Oneindia Tamil

சென்னை: மூச்சுத்திணறல் பாதிப்பால் சென்னையில் உள்ள மியாட் மருத்துவமனையில் சிகிச்சைக்காக அனுமதிக்கப்பட்ட ஈரோடு கிழக்கு தொகுதி எம்எல்ஏ ஈவிகேஎஸ் இளங்கோவன் காலமாகியுள்ள நிலையில் அவருடைய உடல்நிலைக்கு என்ன என்பதை பார்ப்போம்.

காங்கிரஸ் கட்சியின் மூத்தத் தலைவரும் தமிழக காங்கிரஸ் கமிட்டியின் முன்னாள் தலைவருமாக இருந்தவர் ஈவிகேஎஸ் இளங்கோவன். இவருடைய மகன் திருமகன் ஈவெரா, ஈரோடு கிழக்கு தொகுதியில் போட்டியிட்டு எம்எல்ஏவாக தேர்வானார்.

இவருக்கு கடந்த 2023 ஆம் ஆண்டு திடீரென உடல்நிலை குறைவு ஏற்பட்ட நிலையில் அவர் மாரடைப்பால் மரணமடைந்தார். இதைத் தொடர்ந்து அந்தத் தொகுதிக்கு இடைத்தேர்தல் நடத்தப்பட்ட நிலையில் திருமகனின் தந்தை ஈவிகேஎஸ் இளங்கோவனுக்கு வாய்ப்பு வழங்கப்பட்டு அவர் வெற்றி பெற்றார்.

இந்த நிலையில் கட்சி பணிகளிலும் தொகுதி பணிகளிலும் ஈடுபட்டிருந்த இளங்கோவனுக்கு திடீரென உடல்நலக் குறைவு ஏற்பட்டதை அடுத்து கடந்த நவம்பர் 13 ஆம் தேதி இரவு சென்னையில் உள்ள தனியார் மருத்துவமனையில் அனுமதிக்கப்பட்டார்.

மூச்சுத்திணறல் பாதிப்பால் அவதிப்பட்ட இளங்கோவனுக்கு தொடர்ந்து சிகிச்சை அளிக்கப்பட்டு வந்தது. 75 வயதாகும் இளங்கோவனுக்கு தற்போது செயற்கை சுவாசக் கருவியின் உதவியுடன் சிகிச்சை அளிக்கப்பட்டு வந்தது.

அவரது உடல்நிலையில் தொடர்ந்து பின்னடைவு ஏற்பட்டு வந்ததாக மருத்துவர்கள் தெரிவித்தனர். மேலும் அவருக்கு அளிக்கப்படும் சிகிச்சைகளை அவரது உடல் ஏற்கவில்லை என்றும் எனினும் தொடர்ந்து அவரது உடல்நிலையை கண்காணித்து வருவதாகவும் மருத்துவர்கள் தெரிவித்திருந்தனர்.

இந்த நிலையில் நேற்று இரவு முதல் ஈவிகேஎஸ் இளங்கோவனின் உடல்நிலை மோசமடைந்தது. அவருடைய இதயம் துடிக்கும் திறன் குறைந்து, ரத்த அழுத்தமும் குறைந்தே காணப்பட்டது. இதையடுத்து அவற்றை சீரான நிலைக்கு கொண்டு வர மருத்துவர்கள் தீவிர சிகிச்சை அளித்தனர்.

ஈவிகேஎஸ் இளங்கோவனின் உடல்நிலை மோசமடைந்ததாக பரவிய தகவலை அடுத்து தமிழக காங்கிரஸ் கமிட்டி தலைவர் செல்வப்பெருந்தகை மருத்துவமனைக்கு விரைந்தார். அங்கு மருத்துவர்களிடம் பேசிவிட்டு அவரது சிகிச்சை குறித்து செய்தியாளர்கள் சந்திப்பை நடத்துவார் என தெரிவிக்கப்பட்டது. ஆனால் ஈவிகேஎஸ் இளங்கோவன் சிகிச்சை பலனின்றி காலமாகிவிட்டதாக மருத்துவர்கள் தெரிவித்தனர். சுமார் ஒரு மாத காலம் சிகிச்சை பெற்று வந்தார்.

நுரையீரலில் ஏற்பட்ட தொற்று காரணமாக அவர் மருத்துவமனையில் சிகிச்சை பெற்று வந்து காலமாகிய நிலையில் மருத்துவமனைக்கு பலத்த போலீஸ் பாதுகாப்பு போடப்பட்டிருக்கிறது. அவருடைய இறப்புக்கு தமிழக காங்கிரஸ் தலைவர் செல்வப்பெருந்தகை, முன்னாள் தலைவர் கேஎஸ் அழகிரி உள்ளிட்டோர் இரங்கல் தெரிவித்து வருகிறார்கள்.