டெய்லி 6 ரூபாய் போட்டால் போதும்.. ஒரு லட்சம் வரை கவரேஜ்! குழந்தைகளுக்கான நல்ல காப்பீடு திட்டம்

சென்னை: இந்தியாவில் இப்போது பலருக்கும் காப்பீடு குறித்த புரிதல் இல்லாமலேயே இருக்கிறது. எதிர்பாராத நேரங்களில் இவை தான் நமக்கு பெரியளவில் உதவும். அதுபோன்ற ஒரு காப்பீடு திட்டம் குறித்து நாம் பார்க்கலாம்.

நமது நாட்டில் இன்சூரன்ஸ் எனப்படும் காப்பீடு திட்டத்தை எடுக்கும் பழக்கம் மிக மிகக் குறைவாகவே இருக்கிறது. எதிர்பாராத நிகழ்வுகள் எதாவது நடக்கும் போது இதுபோன்ற காப்பீட்டுத் திட்டங்கள் தான் நமக்கு கை கொடுக்கும்.

இதனிடையே இந்திய தபால் துறை வழங்கும் ஒரு காப்பீடு திட்டம் குறித்து நாம் பார்க்கலாம். இத்திட்டத்தின் கீழ் தினசரி வெறும் 6 ரூபாய் செலுத்தி ரூபாய் ஒரு லட்சம் வரையிலான காப்பீட்டை நம்மால் பெற முடியும்.

காப்பீடு திட்டம்: பால் ஜீவன் பீமா யோஜனா என்பது இந்தியத் தபால் அலுவலகத்தால் வழங்கப்படும் குழந்தைகளுக்கான ஆயுள் காப்பீட்டுத் திட்டமாகும். இந்தத் திட்டத்தின் கீழ், பெற்றோர்கள் தபால் அலுவலகக் கணக்கில் ஒரு நாளைக்கு ரூ. 6 மட்டுமே டெபாசிட் செய்ய வேண்டும். குழந்தை எதிர்பாராதவிதமாக விதமாக அல்லது விபத்தில் உயிரிழந்தால் பெற்றோருக்குக் காப்பீட்டுத் தொகையாக ரூ.1 லட்சம் கிடைக்கும்.

எதிர்பாராதவிதமாகக் குழந்தையை உயிரிழந்தால் ஏழைக் குடும்பங்களுக்கு இது குறைந்தபட்ச நிதிப் பாதுகாப்பை வழங்குகிறது. தினசரி 6 ரூபாய் மட்டுமே டெபாசிட் செய்தால் போதும் என்பதால், காப்பீடு போடுவோரின் குடும்பத்தின் மீது நிதிச்சுமையும் ஏற்படாது. இதனால் நமக்கு ரூ. 1 லட்சம் வரை காப்பீட்டுத் தொகையைக் கிடைக்கும். ஒரு லட்ச ரூபாய் என்பது ஏழ்மை நிலையில் இருப்போருக்கு நிச்சயம் பெரியளவில் உதவவே செய்யும்.

ஊக்குவிக்கும்: இதேபோல இந்த பால் ஜீவன் பீமா யோஜனாவின் குழந்தைகளிடையே சேமிப்பு பழக்கம் மற்றும் நிதி ஒழுக்கத்தை ஊக்குவிக்கிறது. குழந்தைகளையே நேரடியாகத் தபால் நிலையத்திற்குச் சென்று தொகையைச் செலுத்த வைப்பதன் மூலம் அவர்களுக்குச் சேமிப்பு பழக்கத்தை ஊக்குவிக்கலாம்.

பால் ஜீவன் பீமா யோஜனாவிற்கு விண்ணப்பிக்க, பெற்றோர் அல்லது பாதுகாவலர் தங்களுக்கு அருகிலுள்ள தபால் நிலையத்திற்கு நேரில் செல்ல வேண்டும். அங்கே பால் ஜீவன் பீமீ யோஜனாவுக்கு என இருக்கும் படிவத்தைப் பெற்று பூர்த்தி செய்து அளிக்க வேண்டும். அதில் பெயர், வயது மற்றும் முகவரி எனக் குழந்தை பற்றிய விவரங்களும், நாமினி பற்றிய விவரங்களையும் நிரப்பித் தர வேண்டும். மேலும், குழந்தையின் அடையாளம் அட்டை ஒன்றும் முகவரிக்கான அடையாள அட்டையையும் வழங்க வேண்டும்.

யார் விண்ணப்பிக்கலாம்: பால் ஜீவன் பீமா யோஜனா திட்டத்தில் 8 முதல் 12 வயது வரையிலான குழந்தைகள் விண்ணப்பிக்கலாம். விண்ணப்பிக்கும் போது குழந்தைக்கு என்ன வயது இருக்கிறதோ அதுவே கணக்கில் எடுத்துக் கொள்ளப்படும். மேலும் குழந்தைக்கு 18 வயது ஆகும் வரை இந்த காப்பீடு செல்லுபடியாகும்.

அதாவது, பெற்றோர் தங்கள் 10 வயதுக் குழந்தையைப் பால் ஜீவன் பீமா யோஜனாவில் சேர்க்க விரும்புகிறார்கள் என்று வைத்துக் கொள்வோம். அப்போது பெற்றோர் தங்களுக்கு அருகில் உள்ள தபால் நிலையத்திற்குச் சென்று விண்ணப்பப் படிவத்தைப் பூர்த்தி செய்து தினசரி ரூ.6 டெபாசிட் செய்யத் தொடங்கலாம். குழந்தை 18 வயதை அடையும் முன் எதிர்பாராத விதமாக குழந்தை இறந்துவிட்டால், காப்பீட்டுத் தொகையான ரூ.1 லட்சம் வழங்கப்படும்.

English summary

Invest Rs 6 daily in this post office scheme and get Rs 1 lakh: All things to know about Bal Jeevan Bima and its usage.