தி லெஜென்ட்: அண்ணாச்சி நல்லாதானே நடிச்சிருக்காரு.. எதுக்கு கலாய்க்கணும்?.. நெட்டிசன்கள் உருக்கம்

சென்னை: லெஜன்ட் அருள் சரவணன் நடித்த தி லெஜென்ட் எனும் திரைப்படம் கடந்த 28 ஆம் தேதி திரைக்கு வந்தது.

இந்த படத்தில் சரவணா ஸ்டோர்ஸ் உரிமையாளர் அருள் சரவணன் நடித்திருந்தார். இவருடன் மறைந்த நடிகர் விவேக், சுமன், நாசர், யோகிபாபு உள்ளிட்டோர் நடித்துள்ளனர்.

இந்த படத்தை அருளே தயாரித்து அதை ஜே டி ஜெர்ரி என்பவர் இயக்கியுள்ளார். இது நாள் வரை அண்ணாச்சி என அழைக்கப்படும் அருள் அவரது கடை விளம்பரங்களில் நடித்து வந்தார்.

விளம்பரங்கள்

பொதுவாக கடை விளம்பரங்களுக்கு மாடல் அழகிகள், நடிகைகள், சின்னத்திரை நடிகர், நடிகைகளை வைத்து எடுப்பதுதான் வழக்கம். ஆனால் தி லெஜென்ட் சரவணா ஸ்டோர்ஸ் ஓனர் அருள் சரவணனே நடித்தார். பளபளக்கும் முகத்துடன் கோட் சூட் அணிந்து கொண்டு மாடல்களுடன் அண்ணாச்சி டான்ஸ் ஆடி நடித்தது மக்களிடையே வரவேற்பை பெற்றது. இவரை பார்த்து போத்தீஸ் உரிமையாளரும் அவரது கடை விளம்பரங்களில் நடித்து வருகிறார்.

உரிமையாளர்கள்

எனவே கடை உரிமையாளர்கள் விளம்பரங்களில் நடிப்பதற்கு டிரென்ட்டைஏற்படுத்தியவர் அருள் சரவணன். இந்த நிலையில் அவர் திரைப்படம் ஒன்றை தயாரித்து அதில் நடித்துள்ளார். இந்த படத்தின் படப்பிடிப்புகள் வெளிநாடுகளில் எடுக்கப்பட்டன. இதை தாண்டி சென்னை, பொள்ளாச்சி, இமயமலைகளிலும் எடுக்கப்பட்டன. சர்க்கரை நோய் குறித்து அதை சரி செய்வது குறித்தும் விழிப்புணர்வு ஏற்படுத்தும் வகையில் இந்த படத்தின் கதை அமைக்கப்பட்டுள்ளது.

விளம்பரங்களில் ஓனர்

விளம்பரங்களில் அருள் சரவணன் நடித்திருந்த நிலையில் நெட்டிசன்கள் அவரை கிண்டல் செய்தனர். "சார் நாங்கள் வரோம், துணி வாங்குறோம். தயவு செய்து விளம்பரங்களில் மட்டும் நடிக்காதீங்கள்" என கிண்டல் செய்து வந்தனர். ஆனால் இந்த படத்தில் அருள் சரவணன் நன்றாக நடித்திருக்கிறார். இத்தனை வயதில் டான்ஸ் ஆடுவது, நடிப்பது எல்லாம் செய்திருக்கிறார். இன்னும் கேட்டால் ஆக்ஷன் படமாகவும் இது அமைந்துள்ளது என்கிறார்கள்.

எப்படி கிண்டல் செய்வது?

இந்த படம் குறித்து இதுவரை மக்கள் கருத்துகளில் யாருமே படம் ஃபிளாப் என்பதை போல் கூறவேயில்லை. இதுவே அருளுக்கு கிடைத்த வெற்றிதான். இது ஒரு புறமிருக்க சமூகவலைதளங்களில் "டேய் அண்ணாச்சியோட லெஜென்ட் படத்தை போடுறேன், வா கலாய்க்கலாம் என ஒருவர் அழைக்கிறார். அதற்கு அந்த நண்பரோ டேய் எங்க வீட்ல குளிக்கிற மக்கிலிருந்து நான் கால்ல போட்ற செருப்பு வரை எல்லாமே அவர் கடையில் வாங்கினது. எப்படிடா அவரை கலாய்ப்பது என்கிறார்கள். ஆக மொத்தம் சுருக்கமாக சொல்ல போனால் இந்த படம் நன்றாக இருக்கிறது என்றே கூறுகிறார்கள். இன்னும் சிலர் கடைக்கு வந்தா கட்டை பை தரமாட்றாங்க, அண்ணாச்சி உங்க படத்திற்கு வர்றவங்களுக்காவது கட்டை பை கொடுங்கள் என்கிறார்கள்.

English summary

The Legend movie: What is the netisans reactions to this movie?