துணை முதல்வராகும் உதயநிதி.. எம்எல்ஏ சம்பளத்தை விட அவரது சம்பளம் கம்மி.. பிற சலுகைகள் என்ன தெரியுமா!

சென்னை: இன்று தமிழ்நாட்டில் 3வது துணை முதல்வராக உதயநிதி ஸ்டாலின் பொறுப்பேற்கிறார். இத்தனை காலம் அமைச்சராக இருந்த அவர் இப்போது துணை முதல்வராக பதவியேற்கும் நிலையில், அவருக்கு அரசு வழங்கும் சம்பளம் எவ்வளவு, அவருக்கான சலுகைகள், அதிகாரங்கள் என்ன என்பது குறித்து நாம் பார்க்கலாம்.

தமிழ்நாடு அமைச்சரவையில் மாற்றம் வரும் என நீண்ட காலமாக சொல்லப்பட்டு வந்த நிலையில், அது ஒரு வழியாக இப்போது நடந்துள்ளது. உதயநிதி துணை முதல்வராக நியமிக்கப்பட்டுள்ளார்.

மேலும், 4 பேருக்கு புதிதாக அமைச்சர் பதவி வழங்கப்பட்டுள்ளது. 3 பேரின் அமைச்சர் பதவி பறிக்கப்பட்டுள்ளது. மேலும், சிலருக்கு துறைகளில் மாற்றம் செய்யப்பட்டுள்ளது. துணை முதல்வராக பதவியேற்கும் உதயநிதியின் சம்பளம், உள்ளிட்ட பிர சலுகள் பற்றி நாம் பார்க்கலாம்.

தமிழ்நாட்டின் முதல் துணை முதல்வர் என்றால் அது தற்போது முதல்வராக உள்ள மு.க. ஸ்டாலன் தான். கருணாநிதி முதல்வராக இருந்த சமயத்தில் 2009 முதல் 2011ம் ஆண்டு வரை மு.க. ஸ்டாலின் துணை முதல்வராக இருந்தார். 2011 முதல் 2017 வரை துணை முதல்வர் பதவியில் யாரும் இல்லை.

ஜெயலலிதா மறைவுக்கு பிறகு அதிமுகவில் பல்வேறு மாற்றங்கள் நடந்தது அனைவருக்கும் தெரியும். அப்போது தனித்தனியாக இயங்கி வந்த எடப்பாடி- ஓபிஎஸ் அணி ஒன்றிணைந்த பிறகு, எடப்பாடி பழனிசாமி முதல்வராகவும் ஓபிஎஸ் துணை முதல்வராகவும் பதவியேற்றனர். அதன்படி 2017ம் ஆண்டு முதல் 2021ம் ஆண்டு வரை 3 ஆண்டுகள் ஓபிஎஸ் துணை முதல்வர் பதவியில் இருந்தார்.

இந்தச் சூழலில் தான் தமிழ்நாட்டின் மூன்றாவது துணை முதல்வராக உதயநிதி ஸ்டாலின் பொறுப்பேற்கிறார். தற்போது இளைஞர் நலன் மற்றும் விளையாட்டு துறை அமைச்சராக உள்ள உதயநிதி துணை முதல்வராக பதவியேற்கும் நிலையில், அவரது சம்பளம் என்னவாக இருக்கும்.. அவருக்கான சலுகைகள் அதிகாரங்கள் என்னவாக இருக்கும் என்ற கேள்வி பலரும் எழும் இது குறித்து நாம் விரிவாக பார்க்காலம்.

துணை முதல்வர் பதவி தொடர்பாக நமது அரசியலமைப்பு நேரடியாக எதுவும் சொல்லவில்லை. ஆளுநர் தனது பணிகளை செயல்படுத்த மற்றும் ஆலோசனை வழங்க முதலமைச்சர் தலைமையில் ஒரு அமைச்சர்கள் குழு இருக்க வேண்டும் என்று அரசியலமைப்பின் பிரிவு 163 (1) தெளிவாக கூறுகிறது. மேலும், முதலமைச்சரை ஆளுநர் நியமிக்க வேண்டும், மற்ற அமைச்சர்கள் முதல்வரின் ஆலோசனையின் பேரில் ஆளுநரால் நியமிக்கப்படுவார்கள் என்று பிரிவு 163 அல்லது பிரிவு 164 (1) கூறுகிறது

அதாது துணை முதல்வர் பதவி குறித்து சட்டம் எங்கும் கூறவில்லை. இதனால் துணை முதல்வர் பதவி என்பது மாநிலத்தில் உள்ள மற்ற கேபினட் அமைச்சருக்கு சமமான பதவி என்றே சட்ட நிபுணர்கள் கூறுகிறார்கள். அதாவது துணை முதல்வர் என்று அழைக்கப்பட்டாலும் முதல்வருக்கான அதிகாரம் எதுவும் இருக்காது. மற்ற அமைச்சர்களின் அதிகாரம், சலுகைகளை போலவே துணை முதல்வருக்கான அதிகாரம், சலுகைகளும் இருக்கும்.

எனவே, சம்பளமும் அமைச்சருக்கு எவ்வளவு சம்பளம் தரப்படுமோ அதே சம்பளம் தான் துணை முதல்வருக்கு கிடைக்கும். தமிழ்நாட்டை பொறுத்தவரை அமைச்சர் பதவியில் இருப்பவருக்கு ரூ. 76,800 சம்பளமாக வழங்கப்படுகிறது. இதை தமிழக அரசே கடந்தாண்டு நீதிமன்றத்தில் கூறியிருந்தது. அதாவது கடந்தாண்டு செந்தில் பாலாஜி கடந்தாண்டு கைது செய்யப்பட்ட போது, சிறையில் இருந்த போதும் சில காலம் அமைச்சராக இருந்தார்.

அதற்கு எதிராக நீதிமன்றத்தில் வழக்கு தொடரப்பட்ட போது, சிறையில் இருப்பவர் அமைச்சர் பதவியில் இருப்பதால் தேவையில்லாமல் சம்பளம் தர வேண்டி உள்ளதாக வாதம் முன்வைக்கப்பட்டது. அப்போது தமிழக அரசு தரப்பு, "ஒரு எம்எல்ஏவின் மாதச் சம்பளம் ₹1.05 லட்சம். அதேநேரம் அமைச்சர் பதவிக்கு உயர்த்தப்பட்ட எம்எல்ஏவின் மாதச் சம்பளம் ₹76,800 மட்டுமே" என்று கூறப்பட்டது.

அதன்படி பார்க்கும் போது இப்போது துணை முதல்வராக பதவியேற்றுள்ள உதயநிதிக்கும் மாதச் சம்பளம் ₹76,800ஆக மட்டுமே இருக்கும். மேலும், அமைச்சருக்கு எப்படி அரசு குடியிருப்பு, அரசு வாகனம் உள்ளிட்ட சலுகைகளும் அதிகாரங்களும் வழங்கப்பட்டுள்ளதோ அதே தான் துணை முதல்வருக்கும் பொருந்தும்.

English summary

Udhayanidhi stalin will receive less salary than of MLAs: Salary and other perks for the post of Tamil nadu Deputy CM Udhayanidhi stalin.