2 டார்கெட்.. "ரரக்களை" அழைத்த இபிஎஸ் - ஓபிஎஸ்.. தொடங்கிய அதிமுக மா.செக்கள் கூட்டம்! இதுதான் பின்னணி!

Updated: Tuesday, June 14, 2022, 10:38 [IST]

Subscribe to Oneindia Tamil

சென்னை: அதிமுக மாவட்ட செயலாளர்கள் கூட்டம் இன்று காலை 10. 30 மணிக்கு ராயப்பேட்டை அதிமுக அலுவலகத்தில் நடக்க உள்ளது.

பெரும் பரபரப்பிற்கு இடையில் அதிமுக கூட்டம் இன்று நடக்க உள்ளது. அதிமுக செயற்குழு மற்றும் பொதுக்குழுக் கூட்டம் வரும் 23-ந் தேதி சென்னையில் நடைபெறும் என்று அக்கட்சியின் தலைமை ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி ஆகியோர் அறிவித்துள்ளனர்.

பல்வேறு முக்கியமான முடிவுகளை எடுப்பதற்கான இந்த கூட்டம் நடத்தப்படுகிறது.

அதிமுக கூட்டம்

இன்று நடக்கும் இந்த கூட்டத்தின் முதல் நோக்கம், பொதுக்குழு தொடர்பானது. வரும் 23ம் தேதி நடக்க உள்ள பொதுக்குழு கூட்டத்தில் அதிமுகவின் அவை தலைவரை தேர்வு செய்ய ஆலோசனை செய்யப்பட உள்ளது. தற்போது அதிமுக அவை தலைவராக தமிழ் மகன் உசேன் இருக்கிறார். இவரின் பதவியை கைப்பற்ற அதிமுக மூத்த நிர்வாகிகள் பலர் முயன்று வருகின்றனர். ஆனால் மூத்த நிர்வாகிகளுக்கு இந்த பதவி வழங்கப்படாமல்.. தமிழ் மகன் உசேனுக்கே தொடர்ந்து இந்த பதவியில் இருக்க அனுமதி அளிக்கப்படும் என்று எதிர்பார்க்கப்படுகிறது.

பொதுக்குழு

23ம் தேதி இந்த கூட்டம் நடக்க உள்ள நிலையில், அதை பற்றி இன்று ஆலோசனை செய்ய உள்ளனர். பொதுக்குழுவில் என்ன பேசலாம் என்பது தொடர்பாக மாவட்ட செயலர்களிடம் இரட்டை தலைமை விசாரிக்க உள்ளது. மாவட்ட செயலாளர்களின் குறைகளை இன்று நிர்வாகிகள் கேட்பார்கள். பின்னர் அதை பொதுக்குழுவில் பேசுவார்கள் என்று எதிர்பார்க்கப்படுகிறது. மேலும் ஆளும் திமுக தரப்பிற்கு எதிராக பல்வேறு தீர்மானங்களை நிறைவேற்றுவது குறித்து ஆலோசனை செய்யப்பட உள்ளது. மாவட்ட செயலர்கள் தவிர்த்து இன்னும் சில மூத்த ரத்தத்தின் ரத்தங்களுக்கும் இந்த மீட்டிங் அழைப்பு சென்றுள்ளது.

குறிக்கோள்

இரண்டாவது குறிக்கோள், குடியரசுத் தேர்தல் குறித்து ஆலோசனை நடத்துவது ஆகும். குடியரசுத் தலைவர் தேர்தலில் யாருக்கு ஆதரவு கொடுப்பது என்பது பற்றி அதிமுக நிர்வாகிகள் இன்று ஆலோசனை செய்ய உள்ளனர். சமீபத்தில் திமுக தொடர்பாக இது பற்றி ஆலோசனை செய்யப்பட்டது. திமுக எதிர்க்கட்சிகள் முன்னிறுத்தும் வேட்பளாருக்கு ஆதரவு தரும் என்று எதிர்பார்க்கப்படுகிறது. அதிமுக என்ன நிலைப்பாடு எடுக்கும் என்ற கேள்வி எழுந்துள்ளது.

அதிமுக - பாஜக

அதிமுக - பாஜக இடையில் உறவு சுமுகமாக இல்லை. கடந்த சில வாரங்களாக அதிமுக பாஜக கூட்டத்தில் நிறைய விரிசல்கள் ஏற்பட்டுள்ளது. இதனால் இன்று நடக்கும் கூட்டத்தில் பாஜக - அதிமுக இடையிலான மோதல், கூட்டணியில் என்ன செய்யலாம் என்று பேச உள்ளனர். அதோடு குடியரசுத் தலைவர் தேர்தலில் பாஜகவிற்கு ஆதரவு அளிக்கலாமா என்பது பற்றியும் ஆலோசனை செய்ய உள்ளனர். இந்த ஆலோசனை கூட்டம் காலை10:30 மணிக்கு நடைபெற உள்ளது.