பரந்தூரில் 1700 ஏக்கர் நிலம் இனி என்னவாகும்.. அரசு வட்டாரங்கள் கூறிய உண்மை
சென்னை: காஞ்சிபுரம் மாவட்டம் பரந்தூரில் சர்வதேச விமான நிலையம் அமைக்க கையகப்படுத்தப்பட்ட 1,700 ஏக்கர் நிலத்தை வேறு வகைகளில் பயன்படுத்த தமிழக அரசு பரிசீலித்து வருவதாக அரசு வட்டாரங்கள் சொல்கின்றன. அந்த 1700 ஏக்கர் நிலத்தை பிற தொழில் பயன்பாடுகளுக்குப் பயன்படுத்த திட்டமிட்டுள்ளார்கள். அரசு கையகப்படுத்திய நிலையம் விமான நிலையத்திற்கு மட்டுமே பயன்படுத்த வேண்டும் என்ற கட்டாயமில்லை. இது தொழில் நோக்கங்களுக்கான சட்டத்தின் கீழ் பயன்படுத்த முடியும் என்பதால், தொழிற்பூங்கா அமைக்க முடியும்.
சென்னைக்கு பசுமை விமான நிலையம் அமைக்க திட்டமிடப்பட்டது. சென்னையை சுற்றி பல நிலங்கள் ஆய்வு செய்யப்பட்ட நிலையில், இறுதியாக மத்திய அரசு காஞ்சிபுரத்தில் இருந்து 16 கிமீ தூரத்திலும், சென்னையில் இருந்து 70கிமீ தூரத்திலும் விமான நிலையம் அமைக்கலாம் என முடிவு செய்யப்பட்டது. அதன்படிபரந்தூரைச் சுற்றியுள்ள 13 கிராமங்களை உள்ளடக்கிய சுமார் 5,300 ஏக்கர் பரப்பளவில் இந்த விமான நிலையம் அமைக்கத் திட்டமிடப்பட்டது. சென்னைக்கான இரண்டாவது பசுமைவெளி விமான நிலையத்தை உருவாக்க மத்திய அரசும், திமுக தலைமையிலான மாநில அரசும் ஆண்டுகளுக்கு பிறகு ஒரு வழியாக திட்டத்தை இறுதி செய்தன. இதையடுத்து ஆய்வுப் பணிகள் 2021-ல் தொடங்கியது. இத்திட்டம் ஆகஸ்ட் 2022-ல் அதிகாரப்பூர்வமாக அறிவிக்கப்பட்டது.
இருப்பினும், இத்திட்டம் அறிவிக்கப்பட்ட நாள் முதலே கிராம மக்களிடமிருந்து கடும் எதிர்ப்பு எழுந்தது. விமான நிலையத்தால் விவசாய நிலங்களும் நீர்நிலைகளும் கடுமையாகப் பாதிக்கப்படும் என்று அவர்கள் அச்சம் தெரிவித்தார்கள். இத்திட்டம் செயல்படுத்தப்பட்டால், சில குடியிருப்புகள் - குறிப்பாக ஏகனாபுரம் என்ற கிராமம் முற்றிலுமாக அழியக்கூடும் என்றும் கிராம மக்கள் கூறினர்.
ஏகனாபுரம் பகுதி மக்கள் 1,100 நாட்களுக்கும் மேலாக இரவு நேரப் போராட்டங்களை நடத்தினார்கள். தங்கள் குழந்தைகளை அரசுப் பள்ளிகளுக்கு அனுப்பாமலும் அவர்கள் போராடினர். இத்திட்டத்தை எதிர்த்து கிராமப் பஞ்சாயத்துகள் 16 முறை தீர்மானங்களை நிறைவேற்றின; அதேவேளையில், தங்கள் எதிர்ப்பைப் பதிவு செய்ய கிராம சபை கூட்டங்களைப் பொதுமக்கள் ஏழு முறை புறக்கணித்தார்கள்.
எதிர்ப்புகள் இருந்தபோதிலும், முந்தைய அரசு நிலம் கையகப்படுத்தும் பணிகளைத் தொடர்ந்தது. வீடுகளை இழக்கும் குடும்பங்களுக்கு மாற்று வீடுகளை வழங்கத் திட்டமிடப்பட்டு, மாதிரி வீடுகளும் கட்டப்பட்டன. 2028-க்குள் விமான நிலைய கட்டுமானப் பணிகளை முடிக்க மத்திய அரசு இலக்கு நிர்ணயம் செய்திருந்தது..
இதற்கிடையில், தமிழக வெற்றி கழகம்' கட்சியின் தலைவராக இருந்த சி. ஜோசப் விஜய், கிராம மக்களுக்கு வெளிப்படையாக ஆதரவு தெரிவித்தார். ஜனவரி 2025-ல் ஏகனாபுரத்திற்கு மேற்கொண்ட தனது முதல் பொது வருகையின்போது, தனது கட்சி ஆட்சிக்கு வந்தால் இத்திட்டம் ரத்து செய்யப்படும் என்று அவர் மக்களுக்கு உறுதியளித்தார். அதன்படியே முதல்வர் விஜய் தலைமையிலான தவெக கூட்டணி அரசு அமைந்ததிலிருந்து இத்திட்டம் தொடர்பான பணிகள் முடங்கின; அதேவேளையில், இத்திட்டம் ரத்து செய்யப்பட்டு மாற்று இடம் பரிசீலிக்கப்படும் என்று அமைச்சர்கள் குறிப்பால் உணர்த்தினர்.
நேற்று சட்டமன்றத்தில் முதல்வர் விஜய் வெளியிட்ட அறிவிப்பின் மூலம் இது அதிகாரப்பூர்வமாக மாறி உள்ள. பரந்தூர் திட்டம் கைவிடப்படுகிறது; இத்திட்டத்திற்காக மாற்று இடம் கண்டறியப்படும்; மேலும் தற்போதுள்ள விமான நிலையமே விரிவாக்கம் செய்யப்படும் என்று கூறினார்.
பரந்தூரில் அமையவிருந்த புதிய விமான நிலையத் திட்டத்தை தமிழக அரசு கைவிட்ட நிலையில், அத்திட்டத்திற்காக ஏற்கனவே கையகப்படுத்தப்பட்ட சுமார் 1,700 ஏக்கர் நிலத்தின் பயன்பாடு குறித்த கவனம் தற்போது திரும்பியுள்ளது. அதேவேளையில், சென்னைக்கான இரண்டாவது விமான நிலையத்திற்குப் புதிய இடத்தைத் தேடும் பணியும் நடைபெற்று வருகிறது; கையகப்படுத்தப்பட்ட நிலத்தை வேறு எந்தெந்தத் தொழில் நோக்கங்களுக்காகப் பயன்படுத்தலாம் என்பது குறித்துத் தொழில்துறை ஆய்வு செய்து வருகிறது. விவசாய நிலங்கள் பாதிக்கப்படும் என்பதாலும், விவசாயிகள் மற்றும் அப்பகுதி மக்களின் வாழ்வாதாரம் சீர்குலையும் என்பதாலும் இத்திட்டம் கைவிடப்படுவதாக முதல்வர் சி. ஜோசப் விஜய் நேற்று சட்டசபையில் அறிவித்தார்.
அதேவேளையில், சென்னைக்குக் கூடுதல் விமான நிலையம் தேவை என்பது உறுதி என்றும், விவசாயம் மற்றும் குடியிருப்புகளுக்குக் குறைந்தபட்ச பாதிப்பை ஏற்படுத்தும் வகையில் மாற்று இடம் கண்டறியப்படும் என்றும் முதல்வர் விஜய் தெளிவுபடுத்தினார்.
நில உரிமையாளர்களுக்கு ஏற்கனவே இழப்பீடு வழங்கப்பட்டுவிட்டதால், கையகப்படுத்தப்பட்ட 1,700 ஏக்கர் நிலத்தை மீண்டும் ஒப்படைப்பது அல்லது கையகப்படுத்தலை ரத்து செய்வது குறித்து அரசு பரிசீலிக்கவில்லை என்று உயர்மட்ட வட்டாரங்கள் பிரபல ஆங்கில நாளிழிடம் தெரிவித்தன. 'தொழில் நோக்கங்களுக்காக நிலம் கையகப்படுத்துதல் சட்டத்தின்' கீழ் இந்த நிலங்கள் கையகப்படுத்தப்பட்டதால், இவற்றை வேறு தொழில் பயன்பாடுகளுக்குப் பயன்படுத்த முடியும் என்று அரசு வட்டாரங்கள் கூறின.
"கையகப்படுத்தப்பட்ட நிலத்தை விமான நிலையத்திற்கு மட்டுமே பயன்படுத்த வேண்டும் என்ற கட்டாயமில்லை. இது தொழில் நோக்கங்களுக்கான சட்டத்தின் கீழ் கையகப்படுத்தப்பட்டதால், பிற தொழில் பயன்பாடுகளுக்கும் இதைப் பயன்படுத்தலாம். விமான நிலையத் திட்டம் கைவிடப்பட்ட நிலையில், விவசாயம் சார்ந்த மற்றும் சுற்றுச்சூழலுக்குப் பாதிப்பு ஏற்படுத்தாத தொழில்களை அமைப்பது போன்ற வாய்ப்புகள் பரிசீலிக்கப்பட்டு வருகின்றன," என்று அரசின் மூத்த அதிகாரி ஒருவர் தெரிவித்தார்.
சம்பந்தப்பட்ட துறைகளுடன் கலந்தாலோசித்து, தொழில்துறை இதற்கான விரிவான செயல் திட்டத்தை உருவாக்கும் என்று எதிர்பார்க்கப்படுகிறது. வேளாண் சார்ந்த பதப்படுத்துதல் மற்றும் விவசாயம் சார்ந்த பிற செயல்பாடுகள் பரிசீலிக்கப்படும் விருப்பத் தேர்வுகளில் அடங்கும் என்றும், சிப்காட் தொழிற்பேட்டையை அமைப்பதற்கான சாத்தியக்கூறுகளும் ஆராயப்பட்டு வருவதாகவும் அரசு வட்டாரங்கள் தெரிவித்தன. "கையகப்படுத்தப்பட்ட நிலத்திற்கான தெளிவான செயல் திட்டம் தயாரிக்கப்படும்; அரசு அதை உரிய நேரத்தில் அறிவிக்கும்," என்று அரசு அதிகாரி மேலும் கூறினார்.
பரந்தூர் விமான நிலையத் திட்டமானது, நகரின் நீண்டகால விமானப் போக்குவரத்துத் தேவைகளைப் பூர்த்தி செய்யும் வகையில் ஒரு பெரிய புதிய விமான நிலையத்தை அமைப்பதை நோக்கமாகக் கொண்டிருந்தது. ஆனால், விவசாய நிலங்கள், நீர்நிலைகள் மற்றும் ஏற்கனவே உள்ள குடியிருப்புகள் மீதான பாதிப்பு காரணமாக அப்பகுதி மக்களிடமிருந்து இத்திட்டத்திற்குத் தொடர் எதிர்ப்பு எழுந்தது. தற்போது, மாற்று இடத்தைக் கண்டறியும் பணிகளையும் அரசு மேற்கொண்டு வருகிறது.
விமான நிலையம் தொடர்பாக சாத்தியமான இடங்கள் குறித்து முதல்வர் பலகட்ட ஆலோசனைகளை நடத்தியுள்ளதாகவும், ஆனால் எந்த இடமும் இன்னும் இறுதி செய்யப்படவில்லை என்றும் வட்டாரங்கள் தெரிவித்தன. "சாத்தியமான ஒவ்வொரு இடமும் ஆய்வு செய்யப்பட்டு வருகிறது." "இதுவரை எதுவும் இறுதி செய்யப்படவில்லை; அரசு விரைவில் ஒரு தீர்வை எட்டும்," என்று அரசின் அதிகாரிகள் கூறினார்கள்.
Click it and Unblock the Notifications
Sign in with Google
