அண்ணாமலையா? ஆமா யாரு அவரு? தமிழகத்தில் பாஜகவை நான் பார்த்ததே இல்லையே.. சுப்பிரமணியன் சுவாமி சாடல்
சென்னை: தமிழகத்தில் பாஜக என்ற கட்சி இருக்கிறதா? அண்ணாமலை யார் என்று பாஜக மூத்த தலைவர் சுப்பிரமணியன் சுவாமி கேள்வி எழுப்பிய நிலையில் பிரதமர் மோடியையும் அவர் கடுமையாக விமர்சித்துள்ளார்.
பாஜக மூத்த தலைவர் சுப்பிரமணியன் சுவாமி தனது சொந்த கட்சியையே அவர் அதிகமாக விமர்சித்து வருகிறார். பிரதமர் மோடி, நிர்மலா சீதாராமன் உள்ளிட்டோரையும் அவர் கடுமையாக விமர்சித்துள்ளார். பொருளாதாரமே தெரியாதவர் நிதித்துறை அமைச்சரா என விமர்சித்திருந்தார்.
அது போல் தமிழக பாஜக எப்போது தனித்து போட்டியிடுகிறதோ அப்போதுதான் அதன் பலத்தை நிரூபிக்க முடியும். மற்றபடி கூட்டணி அமைத்து போட்டியிட்டு எத்தனை இடங்களில் வென்றாலும் அதை அக்கட்சியின் பலமாக எப்படி கருத முடியும் என விமர்சித்திருந்தார்.
அது போல் தமிழக பாஜக ஒரு தொகுதியில் கூட வெல்லாது என 2019 ஆம் ஆண்டு நாடாளுமன்றத் தேர்தலில் சுப்பிரமணியன் சுவாமி கூறியிருந்தார். இந்த நிலையில் சென்னை விமான நிலையத்தில் செய்தியாளர்களை சந்தித்தார். அப்போது அவர் கூறுகையில் பொது சிவில் சட்டத்தை எதிர்க்க காங்கிரஸ் கட்சியிடம் ஒன்றுமே இல்லை.
சர்தார் பட்டேல், ஜவஹர்லால் நேரு போன்றவர்கள் காலம் காலமாக பொது சிவில் சட்டம் வேண்டாம் என கூறி வந்தனர். பொது சிவில் சட்டம் வந்துதான் ஆக வேண்டும். நம் நாட்டில் ஆண்களும் பெண்களும் சரிசமமாக உள்ளனர். ஒருவருக்கு 4 மனைவிகள் இருக்க முடியாது. பிரதமர் நரேந்திர மோடியின் செல்வாக்கு குறைந்து வருகிறது என்பது கர்நாடகாவில் காங்கிரஸ் வெற்றி பெற்றதில் இருந்தே தெரிகிறது.
பிரதமர் மோடி சும்மா அது பண்ண வேண்டும் இது பண்ண வேண்டும் என பேசிக் கொண்டிருக்கிறார். ஜனநாயக நாட்டில் யார் வேண்டுமானாலும் யாரையும் விமர்சிக்கலாம். தமிழகத்தில் இரு ஆண்டு ஆட்சியை நிறைவு செய்துள்ள திமுகவுக்கு முன்னேற்ற பாதையில் செல்ல விருப்பமில்லை. வெள்ளைக்காரர்கள் கொடுத்த வரலாற்றையே சொல்லிக் கொண்டிருக்கிறார்கள்.
கோயில்களில் உள்ள வசதிகளை அழித்து வருகிறார்கள். இதுதான் திமுகவின் தில்லுமுல்லுத்தனம். மாமன்னன் குறித்து கேட்கிறீர்களா, திமுகவுக்கு சினிமாவை தவிர வேறு ஒன்றுமே தெரியாது. வரும் தேர்தலில் திமுக கட்டாயம் தோல்வி அடையும். அண்ணாமலையின் செயல்பாடு எப்படி இருக்கு, ஆமா அண்ணாமலை யாரு, தமிழகத்தில் பாஜக இருக்கா, எனக்கு அதை பற்றி எதுவுமே தெரியாதே, தமிழகத்தில் நான் பாஜகவை பார்த்தது கூட கிடையாது என விமர்சித்திருந்தார்.
Click it and Unblock the Notifications
Sign in with Google