விஜய் அரசியலுக்கு வந்தால் யாருக்கு பாதிப்பு? 'ஒன்இந்தியாதமிழ்' போல் முடிவில் ஆச்சரியம்!

சென்னை: நடிகர் விஜய் அரசியலுக்கு வந்தால் யாருக்கு பாதிப்பு என்று 'ஒன்இந்தியா தமிழ்' நடத்திய ஆன்லைன் போல் வித்தியாசமான முடிவுகளை கொடுத்துள்ளது.

சர்கார் திரைப்பட ஆடியோ வெளியீட்டு விழாவில், நடிகர் விஜய் அரசியல் பஞ்சுகளை பேசினாலும் பேசினார், அரசியல் வருகை குறித்த யூகங்கள் றெக்கை கட்டி பறக்கின்றன.

இந்த நிலையில்தான், நமது 'ஒன்இந்தியா தமிழ்' இணையதளத்தில், ஆன்லைன் போல் ஒன்றை நடத்தினோம்.

முதலிலேயே எஸ்கேப்

இந்த ஆன்லைன் வாக்குப்பதிவில், விஜய் அரசியலுக்கு வந்தால் யாருக்கு பாதிப்பு? என்ற கேள்வி முன் வைக்கப்பட்டது. அதற்கு 6 ஆப்ஷன்கள் தரப்பட்டன. நோ கமெண்ட்ஸ் என்ற ஆப்ஷனும் வழங்கப்பட்டது. இதில் கமெண்ட் அளிக்க விருப்பமில்லை என்று 11.72 சதவீதம் பேர் தெரிவித்துள்ளனர். மற்றவர்கள் என்ன சொல்லியுள்ளார்கள் என்று பார்ப்போம்.

திமுகவிற்கு பாதிப்பு

விஜய் அரசியல் வருகை, திமுவிற்கு பாதிப்பை ஏற்படுத்தும் என்று, 10.4 சதவீதம் பேர் தெரிவித்துள்ளனர். அதிமுகவிற்கு பாதிப்பு என்று 7.79 சதவீதம் வாசகர்கள் கருதுகிறார்கள். விஜய் எடுக்கும் நிலைப்பாடுகள், திமுக கொள்கைகளுடன் இயைந்து இருப்பதனால் திமுகவுக்கே அதிக பாதிப்பை ஏற்படுத்தும் என்று கருதுகிறார்கள் நமது வாசகர்கள்.

பாஜக குறைவுதான்

ரஜினி மற்றும் கமல் ஆகியோருக்குதான் விஜயால் பாதிப்பு ஏற்படும் என்று 7.61 சதவீதம் பேர் தெரிவிக்கிறார்கள். இது அதிமுகவிற்கு பாதிப்பு என்று கூறியோரைவிட சற்று குறைவாக உள்ளது. அதேநேரம் பாஜகவிற்கு பாதிப்பு என்று 2.7 சதவீதம் பேர்தான் கூறுகிறார்கள். பாஜகவை பெரிய போட்டியாளராக கருதவில்லை என்பது இதன் மூலம் தெரிகிறது.

விஜய்க்கே பாதிப்பு

பிற கட்சிகளுக்கு பாதிப்பு ஏற்படும் என்று, 4.49 சதவீதம் பேர் கூறுகிறார்கள். ஆனால் இதில் ஆச்சரியப்படத்தக்க ரிசல்ட் என்னவென்றால், விஜய் அரசியலுக்கு வருவது அவருக்குதான் பாதிப்பை ஏற்படுத்தும் என்று 55.29 சதவீதம் பேர் தெரிவித்துள்ளனர். இவர்கள் விஜய் சினிமாவில் நடிப்பதே போதும் என்ற மனநிலையில் உள்ளவர்கள். இந்த மனநிலையை, விஜய் தரப்பு கவனத்தில் எடுக்கும் என்று நம்பலாம்.

English summary

Who will get affect if Vijay entered in to politics, here our readers caste their votes.