இந்த மாதம் பலருக்கும் மின் கட்டணத்துடன் கூடுதல் கட்டணம் வந்தது ஏன்? மின்சார வாரியம் விளக்கம்

சென்னை: விஜி என்பவருக்கு இந்த மாதம் 600 யூனிட் பயன்படுத்தியதற்கு ரூ.2750 கட்டணம் வந்துள்ளது. ஏசிசிடி கட்டணம் 1030 என்று வந்துள்ளது. மொத்தம் 3780 ரூபாய் கட்டணம் வந்திருந்தது. இதுபற்றி விளக்கம் தருமாறு அவர் கேட்டிருந்த நிலையில் தமிழ்நாடு மின்சார வாரியம் விளக்கம் அளித்துள்ளது.

ACCD- Addl Current Consumption Deposit என்பது இரண்டு வருடங்களுக்கு ஒரு முறை தங்களின் பாதுகாப்பு வைப்பு தொகை பரிசீலிக்கப்படும். வட்டி பணமும் கணக்கிலெடுத்துக் கொள்ளப்படும் என்று மின்சார வாரியம் தெரிவித்துள்ளது.

மின்சார வாரியம் என்ன சொல்ல வருகிறது என்றால், எல்லாரும் மின் இணைப்பு பெறும் பொழுது ஒரு டெபாசிட் தொகை கட்டியிருப்போம்.. ஒவ்வொரு இணைப்புக்கும் சராசரியாக இவ்வளவு மின்சார பயன்பாடு ஒதுக்கீடு கணக்கு உண்டு.

அந்த அளவை தாண்டும் பொழுது.. நமக்கு நமது இணைப்பின் பயன்பாடு வரம்பை உயர்த்தி அதற்கு ஏற்றார் போல டெபாசிட் தொகையின் பற்றாக்குறை தொகை நம்மிடம் வசூலிக்கப்படும். அதுதான் ACCD(Additional current consumption deposit) இது இரண்டு ஆண்டுகளுக்கு ஒரு முறை சரிபார்க்கப்பட்டு ஏப்ரல்/மே மாத மின் கட்டணத்துடன் வசூலிக்கப்படும்.

ACCD கணக்கிடும் முறை: கடைசி 12 மாதங்களுக்கு நம்முடைய மின்கட்டணத்தின் சராசரி 3 மடங்கு தொகை டெபாசிட் தொகையில் இருக்க வேண்டும்.

உதாரணத்திற்கு கடைசி 12 மாதத்தில் நம்முடைய மொத்த மின் கட்டணம் 12 ஆயிரம் எனில்.. அதற்கான சராசரி தொகை 1000 அதன் 3 மடங்கு தொகை 3000 ரூபாய் நம்முடைய டெபாசிட்டில் இருக்க வேண்டும். ஒருவேளை 2000 உங்கள் டெப்பாசிட் இருக்கும் பட்சத்தில்.. மீதம் உள்ள 1000 ரூபாய் உங்களுடைய மின் கட்டணத்துடன் சேர்த்து வசூலிக்கப்படும்.

ஒருவேளை உங்களின் வருட மொத்த மின் கட்டணமே.. 6000 எனில் 6000/12 = 500 அதன் 3 மடங்கு தொகை 1500 ஏற்கனவே 2000 ரூபாய் டெபாசிட்டில் இருந்தால் மேற்கொண்டு எந்த தொகையும் வசூலிக்கப்படாது. ஒருவேளை தங்களுடைய மின் இணைப்பை திரும்ப ஒப்படைத்தால்.. இந்த டெபாசிட் தொகையை மின்வாரியம் தங்களுக்கு திருப்பி தர வேண்டும். இதுதான் நடைமுறையாகும். இதை பற்றி தான் தமிழ்நாடு மின்சார வாரியம் விளக்கம் அளித்துள்ளது.

அதன்படி தான் விஜி என்பவருக்கு இந்த மாதம் 600 யூனிட் பயன்படுத்தியதற்கு ரூ.2750 கட்டணம் வந்துள்ளது. ஏசிசிடி கட்டணம் 1030 என்று வந்துள்ளது. மொத்தம் 3780 ரூபாய் கட்டணம் வந்திருந்தது. அதாவது கடைசி 12 மாதங்களுக்கு அவருடைய மின்கட்டணத்தின் சராசரி 3 மடங்கு தொகை டெபாசிட் தொகையில் இல்லை. அதாவது இரண்டு மடங்கு தான் இருந்தது. அதனால் தான் அவருக்கு ஏசிசிடி கட்டணம் 1030 சேர்த்து மொத்தம் 3780 ரூபாய் கட்டணம் வந்துள்ளது.

English summary

TANGEDCO explain about Addl Current Consumption Deposit in tamilnadu. Why did many people get additional charges with their electricity bills this month? check here.