பாஜக நிகழ்ச்சிகளில் தலைகாட்டாத நடிகை நமீதா! தொடர்ந்து ஆப்சென்ட்! பின்னணி என்ன?

Updated: Saturday, March 12, 2022, 13:16 [IST]

Subscribe to Oneindia Tamil

சென்னை: தமிழக பாஜகவில் செயற்குழு உறுப்பினராக உள்ள நடிகை நமீதா கடந்த சில மாதங்களாகவே கட்சி நிகழ்ச்சிகளில் தொடர்ந்து ஆப்சென்ட் ஆகி வருகிறார்.

5 மாநில தேர்தல் பிரச்சாரம், பொதுக்கூட்டம் என எதிலுமே நடிகை நமீதா பாஜகவுக்காக தலைகாட்டவில்லை .

இதன் பின்னணி குறித்து நாம் விசாரித்ததில், இடையே ஏற்பட்ட உடல்நலக் குறைவும் இப்போது மும்பையில் ஓய்வில் இருப்பதும் தான் காரணமாக கூறப்பட்டது.

பாஜகவில் நடிகை

தமிழக பாஜக தலைவராக எல்.முருகன் இருந்தபோது அக்கட்சியின் தேசியத் தலைவர் ஜே.பி.நட்டா முன்னிலையில் பாஜகவில் இணைந்தார் நடிகை நமீதா. கட்சியில் சேர்ந்த புதிதில் பாஜக நிகழ்ச்சிகளில் தொடர்ந்து பங்கேற்ற நடிகை நமீதா, கடந்த சட்டமன்றத் தேர்தலின் போது பாஜக வேட்பாளர்களுக்காக தமிழகம் முழுவதும் பிரச்சாரமும் செய்தார். நடிகை நமீதா கட்சிப்பணிகளில் காட்டிய சுறுசுறுப்பு காரணமாக அவருக்கு தமிழக பாஜக செயற்குழு உறுப்பினர் பொறுப்பும் வழங்கப்பட்டது.

தேர்தல் பிரச்சாரம்

இந்தச் சூழலில் சட்டமன்றத் தேர்தல் முடிவுக்கு பிறகு பாஜக நிகழ்ச்சிகளில் நடிகை நமீதாவை அதிகம் காணமுடிவதில்லை என்பது குறிப்பிடத்தக்கது. தமிழக நகர்ப்புற உள்ளாட்சித் தேர்தல் பிரச்சாரம், 5 மாநில சட்டமன்றத் தேர்தல் பரப்புரை உட்பட பாஜக நிகழ்ச்சிகளிலும் அவர் பங்கேற்கவில்லை. இதனிடையே டிஜிட்டலில் சொந்த தயாரிப்பில் சில நிகழ்ச்சிகளை தயாரிக்க தொடங்கிய அவர், அது தொடர்பான பணிகளில் கவனம் செலுத்தி வந்தது குறிப்பிடத்தக்கது.

என்ன காரணம்?

கட்சி நிகழ்ச்சிகளில் பிடிப்பின்றி திடீரென நடிகை நமீதா ஒதுங்கியதற்கான காரணம் குறித்து நாம் விசாரித்ததில், ஓரிரு மாதங்களுக்கு முன்பு அவருக்கு உடல் நலகுறைவு ஏற்பட்டதாகவும் இதனால் தற்போது மும்பையில் ஓய்வெடுத்து வருவதாகவும் தகவல் கிடைத்தது. விரைவில் மீண்டும் அவர் பொதுநிகழ்ச்சிகளில் கலந்துகொள்வார் எனவும் தெரிவிக்கப்பட்டது. மற்றபடி இந்த விவகாரத்தில் வேறு எந்த காரணமும் இல்லை என கூறப்பட்டது.

சினிமா பிரபலங்கள்

தமிழக பாஜக தலைவராக எல்.முருகன் இருந்த போது நடிகர்கள், நடிகைகள், இயக்குநர்கள், தயாரிப்பாளர்கள், என பல சினிமா பிரபலங்கள் பாஜகவில் இணைந்தது குறிப்பிடத்தக்கது. இதனிடையே நாடாளுமன்ற பொதுத்தேர்தலுக்கு இன்னும் இரண்டு ஆண்டுகளே உள்ளதால் அது தொடர்பான முன்னெடுப்பு பணிகளை தமிழக பாஜக இப்போதே தொடங்கிவிட்டது கவனிக்கத்தக்கது.