திருமணத்துக்கு தங்கம் வாங்க போறீங்களா? கூடவே குண்டுமணி வெள்ளியாவது வாங்கி போடுங்க.. முக்கியம்!

Updated: Sunday, April 13, 2025, 8:41 [IST]

Subscribe to Oneindia Tamil

சென்னை: உலக அளவில் தங்கம் விலை ஏற்றம் இறக்கமாக உள்ளது. முக்கியமாக தங்கத்தின் விலை தொடர்ந்து உயர்ந்த நிலையில் தற்போது சரிய தொடங்கி உள்ளது. இப்படிப்பட்ட நிலையில் வெள்ளி இன்னொரு பாதுகாப்பான முதலீடாக மாறி உள்ளது.

சென்னை நகரில் இன்று 1 கிராம் 24 கேரட் தங்கம் விலை ₹9,540 ஆக உள்ளது, இதேபோல் 1 கிராம் 22 கேரட் தங்கம் விலை ₹8,745 ஆகவும், 1 கிராம் 18 கேரட் தங்கம் விலை ₹7,245 ஆகவும் உள்ளது. 10 கிராம் தங்கம் 95,400 ஆகும். இது 1 லட்சத்தை அடையுமா என்ற கேள்வி எழுந்துள்ளது. இன்று சென்னை நகரில் ஒரு கிராம் வெள்ளி விலை ₹110 ஆகவும், ஒரு கிலோ வெள்ளி விலை ₹1,10,000 ஆகவும் உள்ளது.

தங்கம் விலை குறையும்

உதாரணமாக நீங்கள் திருமணத்திற்கு தங்கம் வாங்கினால் கூடவே வெள்ளி வாங்குவது மிக முக்கியமானதாக பார்க்கப்படுகிறது. அமெரிக்காவைத் தளமாகக் கொண்ட நிதிச் சேவை நிறுவனமான மார்னிங்ஸ்டாரின் பொருளாதார நிபுணர் ஜான் மில்ஸ், தங்கத்தின் விலை அவுன்ஸ் ஒன்றுக்கு $1,820 ஆகக் குறையும் என்று கணித்துள்ளார், இது அவுன்ஸ் ஒன்றுக்கு $3,080 என்ற தற்போதைய நிலையில் இருந்து குறிப்பிடத்தக்க அளவு குறைவு. இது கிட்டத்தட்ட 38-40% சரிவைக் குறிக்கும், இது தங்கச் சந்தையை கணிசமாக பாதிக்கும். இப்போது தங்கம் விலை ஏறினாலும் இனி ஏறுவதற்கு ஏற்ற சூழல் இல்லை என்பதால் இனி குறையவே தொடங்கும் என்று கூறி உள்ளார்.

வெள்ளி விலை உயரும் - அரசு அறிக்கை

நாடாளுமன்றத்தில் தாக்கல் செய்யப்பட்ட பொருளாதார ஆய்வு 2024-25 இன் படி, 2025 ஆம் ஆண்டில் தங்கத்தின் விலை குறையும், அதே நேரத்தில் வெள்ளி விலை உயரக்கூடும் என்று அறிவிக்கப்பட்டு உள்ளது. நாடாளுமன்றத்தில் வெளியான அறிக்கையில் தங்கம் விலை குறையும், வெள்ளி விலை அதிகரிக்கலாம் என எதிர்பார்க்கப்படுகிறது. இரும்புத் தாது, துத்தநாகத்தின் விலை குறைவதால் உலோகங்கள் மற்றும் கனிமங்களின் விலைகள் குறையும் என்று பொருளாதார ஆய்வறிக்கையில் தெரிவிக்கப்பட்டுள்ளது.

இந்தியாவில் தங்கம் இறக்குமதி அதிகரித்துள்ளது. இப்போது நிலவும் பணவீக்கம் காரணமாக தங்கத்தின் விலை குறையும். இப்போது தற்காலிகமாக தங்கத்தின் விலை அதிகரித்தாலும் வரும் காலங்களில் தங்கத்தின் விலை குறையும் என்று பொருளாதார ஆய்வு 2024-25ல் தெரிவிக்கப்பட்டு உள்ளது. பொதுவாக பொருட்களின் விலை 5.1 சதவிகிதத்தில் இருந்து 2026ல் 1.7 சதவிகிதமாக குறையும். இதனால் பெரும்பாலான பொருட்களின் விலை குறையும்.. அதில் தங்கத்தின் விலையும் குறையும் என்று கணிப்பில் தெரிவிக்கப்பட்டு உள்ளது.

வெள்ளி முக்கியம் குமாரே

Rich Dad Poor Dad எழுத்தாளர் Robert Kiyosaki உலக அளவில் வெள்ளி விலை இந்த ஆண்டு இரட்டிப்பாகும் என்று கூறி உள்ளார். வெள்ளியின் வலுவான தேவை மற்றும் குறைந்த விநியோகம் காரணமாக இதன் மதிப்பு இரண்டு மடங்கு உயரப்போகிறது.

வெள்ளியின் தற்போதைய விலை ஒரு அவுன்ஸ் $34. இந்த ஆண்டு வெள்ளி 2 மடங்கு உயர்ந்து ஒரு அவுன்ஸ் $70 ஆக இருக்கும் என்று நான் கணிக்கிறேன், என்று அவர் கூறி உள்ளார். ஏற்கனவே இந்தியாவில் 1 கிலோ வெள்ளியின் விலை 1 லட்சம் ரூபாயை தாண்டி உள்ளது. சைக்காலஜி மார்க் என்று அழைக்கப்படும் 1 லட்சம் ரூபாயை தொட்டதன் மூலம் வெள்ளியின் விலை மேலும் அதிகரிக்கும் என்று எதிர்பார்க்கப்படுகிறது.

சர்வதேச அளவில் வெள்ளியின் விலை தொடர்ந்து உயர்ந்து வருகிறது. கடந்த 12 வருடங்களில் இல்லாத புதிய விலை உயர்வை வெள்ளி அடைந்து உள்ளது. கடந்த 2005 நவம்பரில் 12 ஆயிரம் ரூபாய் இருந்த 1 கிலோ வெள்ளியின் விலை தற்போது 1 லட்சம் ரூபாய். அதிலும் கடந்த 5 வருடங்களில் வெள்ளியின் விலை ஒவ்வொரு வருடமும் 10 ஆயிரத்திற்கும் மேல் உயர்ந்து வருகிறது. இதன் மூலம் சர்வதேச அளவில் தங்கம் அளவிற்கு அல்லது தங்கத்தை விட வரும் நாட்களில் அதிக வேகமாக மதிப்பு உயரும் உலோகமாக வெள்ளி மாறி வருகிறது.