உற்சாகத்தில் திளைக்கும் கமல்.. முதல்வருடன் திடீர் சந்திப்பு.. அந்த விஷயத்துக்கு நன்றி சொன்னாரா?

Published: Tuesday, June 14, 2022, 20:38 [IST]

Subscribe to Oneindia Tamil

சென்னை : முதல்வர் மு.க.ஸ்டாலினை நடிகரும் மக்கள் நீதி மய்யம் கட்சியின் தலைவருமான கமல்ஹாசன் இன்று நேரில் சந்தித்தார்.

விக்ரம்

லோகேஷ் கனகராஜ் இயக்கத்தில் நடிகர் கமல்ஹாசன் நடித்த 'விக்ரம்' திரைப்படம் திரையரங்குகளில் வெற்றிகரமாக ஓடிக்கொண்டிருக்கிறது. பஹத் பாசில், விஜய் சேதுபதி, சூர்யா, காயத்ரி, செம்பன் வினோத் என பலர் நடித்துள்ள இந்தப் படம் விமர்சன ரீதியாகவும் நல்ல வரவேற்பைப் பெற்றதோடு, வசூல் ரீதியாகவும் பல்வேறு சாதனைகளை படைத்து வருகிறது. இந்தப் படத்தை உதயநிதி ஸ்டாலினின் ரெட் ஜெயண்ட் மூவீஸ் நிறுவனம் வெளியிட்டது குறிப்பிடத்தக்கது.

உற்சாகத்தில் கமல்

‘விக்ரம்' படம் வெளியாகி 10 நாட்களைக் கடந்துள்ள நிலையில், உலகம் முழுவதும் ரூ.300 கோடி வசூலை நெருங்கி வருகிறது. 'விக்ரம்' படம் பெருவெற்றி பெற்றதையடுத்து, இயக்குநர் லோகேஷ் கனகராஜ், உதவி இயக்குநர்கள் உள்ளிட்டோருக்கு பரிசுகளை வழங்கி இன்ப அதிர்ச்சி கொடுத்தார் கமல்ஹாசன்.

ரசிகர்களுக்கு நன்றி

படத்தின் வெற்றிக்கு ரசிகர்களிடம் நன்றி தெரிவிக்கும் விதமாக நடிகர் கமல்ஹாசன் வீடியோக்களையும் வெளியிட்டுள்ளார். படம் வெற்றி பெற்றதற்கு வாழ்த்து தெரிவிக்கும் வகையில், அண்மையில் நடிகர் கமல்ஹாசன், லோகேஷ் கனகராஜை வீட்டிற்கு அழைத்து விருந்து வைத்தார் தெலுங்கு நடிகர் சிரஞ்சீவி.

முதல்வருடன் சந்திப்பு

இந்நிலையில், நடிகரும், மக்கள் நீதி மய்யத்தின் தலைவருமான கமல்ஹாசன் 'விக்ரம்' வெற்றியையொட்டி, முதல்வர் மு.க.ஸ்டாலினை இன்று நேரில் சந்தித்து பூங்கொத்து கொடுத்தார். இந்தச் சந்திப்பின்போது ‘விக்ரம்' திரைப்படத்தின் இணை தயாரிப்பாளர் ஆர். மகேந்திரன் உடனிருந்தார்.

சிறப்புக் காட்சிக்கு நன்றி?

‘விக்ரம்' வெளியான முதல் 3 நாட்களுக்கு சிறப்பு காட்சிகளை திரையிட தமிழக அரசு அனுமதி அளித்திருந்தது. இந்நிலையில் இன்று முதல்வர் ஸ்டாலினை சந்தித்த கமல்ஹாசன், சிறப்புக் காட்சிகளை வெளியிட அனுமதி அளித்ததற்கு நன்றி தெரிவித்ததாகவும் தகவல் வெளியாகியுள்ளது.

Published On June 14, 2022