இதென்ன.. பாஜக பிரமுகர்களுடன் நாதக காளியம்மாள்.. தீயாகப் பரவும் படங்கள்.. எங்கே நடந்த மீட்டிங்?
நாம் தமிழர் கட்சியின் காளியம்மாள் பாஜகவின் அலிஷா அப்துல்லாவை சந்தித்தது பற்றிய தகவல்கள் வெளியாகியுள்ளன.
சென்னை : நாம் தமிழர் கட்சியின் மகளிர் பாசறை ஒருங்கிணைப்பாளர் காளியம்மாள், பாஜக நிர்வாகி அலீஷா அப்துல்லாவுடன் இருக்கும் படங்கள் சமூக வலைதளங்களில் பரவி பரபரப்பை ஏற்படுத்தியது.
நாம் தமிழர் கட்சியை பாஜகவின் பி டீம் என்று திமுக உள்ளிட்ட கட்சிகளும், அதிமுகவின் வாக்குகளைப் பிரிப்பதால், திமுகவின் பி டீம் என்று பாஜகவினரும் மாறி மாறி விமர்சித்து வருகின்றனர்.
இந்நிலையில், பாஜகவின் பெண் பிரமுகர்களுடன் நாதக நிர்வாகி காளியம்மாள் இருக்கும் படங்கள் சமூக வலைதளங்களில் தீயாகப் பரவின.
காளியம்மாள்
நாகப்பட்டினம் மாவட்டத்தைச் சேர்ந்த காளியம்மாள், நாம் தமிழர் கட்சியின் மகளிர் பாசறை ஒருங்கிணைப்பாளராகப் பொறுப்பு வகித்து வருகிறார். அக்கட்சியின் நட்சத்திர பேச்சாளராகவும் விளங்குகிறார். 2019 மக்களவைத் தேர்தலில் காளியம்மாள் நாம் தமிழர் கட்சியின் சார்பாக வட சென்னை தொகுதியில், கரும்பு விவசாயி சின்னத்தில் போட்டியிட்டு தோல்வி அடைந்தாலும், 60 ஆயிரத்திற்கும் அதிகமான வாக்குகள் பெற்றார்.
நாதகவின் முக்கிய முகம்
பின்னர் 2021 சட்டமன்றத் தேர்தலில் பூம்புகார் தொகுதியில் நாம் தமிழர் கட்சி வேட்பாளராக போட்டியிட்டு தோல்வியடைந்தார். நாம் தமிழர் கட்சியில் மாநில மகளிர் பாசறை ஒருங்கிணைப்பாளர் பொறுப்பில் இருக்கும் காளியம்மாள், நாதகவின் மகளிர் நிர்வாகிகளில் முக்கியமான முகம் என்பது குறிப்பிடத்தக்கது. சமீபத்தில் நடந்த ஈரோடு கிழக்கு இடைத்தேர்தல் களத்திலும் நாதக வேட்பாளருக்கு ஆதரவாக தீவிர வாக்கு சேகரிப்பில் ஈடுபட்டார் காளியம்மாள்.
பரவிய புகைப்படம்
தேர்தல் பிரச்சாரக் களத்தில் திமுக, அதிமுக, பாஜக என ஒரு கட்சியையும் விடாமல் ரவுண்டு கட்டி விளாசும் காளியம்மாள், பாஜகவின் பெண் நிர்வாகிகளுடன் இணைந்தும், அவர்களுடன் சிரித்தபடி பேசிக்கொண்டிருப்பது போலவும் இருக்கும் படங்கள் சமூக வலைதளங்களில் வெளியாகின. இதனைப் பகிர்ந்து திமுக உள்ளிட்ட கட்சிகளைச் சேர்ந்த பலரும் விமர்சித்து வருகின்றனர். இந்நிலையில், அந்தப் படங்கள் ஒரு விருது விழாவில் எடுக்கப்பட்ட படங்கள் எனத் தெரியவந்துள்ளது.
விருது விழா
சென்னையில் உள்ள அமிட்டி குளோபல் பிசினஸ் ஸ்கூல் சார்பாக பல்வேறு துறைகளிலும் சிறந்து விளங்கும் பெண் ஆளுமைகளுக்கு 'வொண்டர் வுமன்' என்ற பெயரில் விருதுகள் வழங்கப்பட்டன. இதில் பாஜகவைச் சேர்ந்த அலிஷா அப்துல்லா, நாதகவைச் சேர்ந்த காளியம்மாள் உள்ளிட்ட பெண்கள் விருது பெற்றுள்ளனர். இதற்கான விருது வழங்கும் விழாவில் இருவரும் பங்கேற்ற புகைப்படங்களே தற்போது சமூக வலைதளங்களில் பரவி வருகின்றன.
Click it and Unblock the Notifications
Sign in with Google