மோடி பற்றி பேசியதை வாபஸ் வாங்க மாட்டேன்.. நான் எந்த கட்சிக்கும் சப்போர்ட் இல்லை.. இளையராஜா பரபரப்பு!

Updated: Sunday, April 17, 2022, 15:29 [IST]

Subscribe to Oneindia Tamil

சென்னை: பிரதமர் மோடி குறித்து எழுதிய கருத்தை திரும்ப பெற மாட்டேன் என்று இசையமைப்பாளர் இளையராஜா தெரிவித்து இருப்பதாக நியூஸ் 18 தமிழ் ஊடகம் செய்தி வெளியிட்டுள்ளது.

ப்ளூ கிராப் டிஜிட்டல் பவுண்டேசன் நிறுவனம் மூலம் 'மோடியும் அம்பேத்கரும்' என்ற புத்தகம் வெளியிடப்பட்டுள்ளது. இதற்கு இசையமைப்பாளர் இளையராஜா முன்னுரை எழுதியுள்ளார்.

மோடி அம்பேத்கர்

அதில், மோடியின் ஆட்சியின் செயல்பாடுகளை கண்டு அம்பேத்கரே பெருமைப்படுவார். அம்பேத்கரும் மோடியும் இந்தியா குறித்து பெரிய கனவு கண்டவர்கள். நாட்டில் சாலைகள், ரயில் போக்குவரத்து, மெட்ரோ ரயில், விரைவு எக்ஸ்பிரஸ் சாலைகள் போன்றவை உலகத் தரத்துடன் அமைக்கப்பட்டுள்ளன. பெண் குழந்தைகளை பாதுகாப்போம் - பெண் குழந்தைகளுக்கு கற்பிப்போம்' திட்டம், முத்தலாக் சட்டம் மூலம் பெண்களை முன்னேற்றி இருக்கிறார் மோடி.

பாராட்டு

பெண்களின் திருமண வயதை உயர்த்தும் முடிவின் மூலம் பெண் சமுதாயத்தை வளர்ச்சிப் பாதையில் கொண்டு சென்று இருக்கிறார் மோடி, என்று இளையராஜா தனது முன்னுரையில் குறிப்பிட்டுள்ளார். இந்த நிலையில் இளையராஜா கருத்துக்கு நெட்டிசன்கள் பலர் கடுமையாக விமர்சனம் செய்தனர். பாஜக எதிர்ப்பாளர்கள் பலர் இளையராஜா கருத்தை கடுமையாக விமர்சித்தனர். அதே சமயம் இளையராஜா தனது கருத்துரிமையை வெளிப்படுத்தி உள்ளார்.

பாஜக இளையராஜா

இதை விமர்சிக்க கூடாது என்று பாஜக தலைவர்கள் பலர் இளையராஜாவிற்கு ஆதரவாக பேசினார்கள். இந்த நிலையில் பிரதமர் மோடி குறித்து எழுதிய கருத்தை திரும்ப பெற மாட்டேன் என்று இசையமைப்பாளர் இளையராஜா தனது சகோதரர் கங்கை அமரனிடம் தெரிவித்து இருக்கிறார். கங்கை அமரன் இது தொடர்பாக நியூஸ் 18 தமிழ் ஊடகத்திற்கு அளித்த பேட்டியில், மோடி குறித்து இளையராஜா பேசியது பற்றி அவருக்கே போன் செய்து கேட்டேன். உங்களை நிறைய பேர் விமர்சிக்கிறார்களே என்று நேற்று இளையராஜாவிடம் கேட்டேன்.

மோடி இளையராஜா கருத்து

அதற்கு பிரதமர் மோடி குறித்து எழுதிய கருத்தை திரும்ப பெற மாட்டேன் என்று இளையராஜா என்னிடம் சொன்னார். அது தன்னுடைய சொந்த கருத்து என்றார். அதே சமயம் தன்னுடைய கருத்து பற்றி மற்றவர்கள் சொல்லும் கருத்தை விமர்சிக்கவும் மாட்டேன் என்று என்னிடம் கூறினார். பிரதமர் மோடி பற்றிய அந்த புத்தகத்தை நான் முழுமையாக படித்தேன். புத்தகத்தை முழுமையாக படித்த பின்புதான் நான் என் கருத்தை தெரிவித்தேன்.

உண்மையை மறைக்க முடியாது

மோடியின் பல திட்டங்களை மறைக்கப்பட்டுவிட்டால்.. அவை மறைந்துவிடுமா என்று என்னிடம் இளையராஜா கேட்டார். இதை நான் அரசியலாக்க விரும்பவில்லை. நான் எந்த கட்சியும் சேர்ந்தவன் இல்லை. மோடிக்கு ஓட்டு போடுங்கள் என்று சொல்லவும் மாட்டேன்.. ஓட்டு போடாதீங்க என்றும் பிரச்சாரம் செய்ய மாட்டேன். நான் படத்திற்கு போட்ட ட்யூனை திரும்ப பெற மாட்டேன். அதேபோல்தான் நான் சொன்ன கருத்தும். அதை திரும்ப பெற வேண்டிய அவசியம் கிடையாது.

இளையராஜா மோடி அம்பேத்கர்

உண்மையை சொல்ல நான் தயங்க மாட்டேன் என்று என்னிடம் இளையராஜா தெரிவித்தார். என்னுடைய கருத்தை நான் தெரிவிப்பேன். அதை என்னுடைய கருத்தாக மட்டும் நினையுங்கள். அதை ஏன் தவறாக நினைக்க வேண்டும். என்னை பற்றி விமர்சனம் செய்பவர்கள் செய்யட்டும். அந்த புத்தகத்திற்கு விமர்சனம் கேட்டார்கள். அதற்காக சொன்னேன். அவ்வளவுதான், என்று இளையராஜா என்னிடம் தெரிவித்தார் என கங்கை அமரன் அந்த பேட்டியில் குறிப்பிட்டு இருக்கிறார்.